كركر

مراتي ..ولا هيفاء وهبي

مراتي ..ولا هيفاء وهبي؟

انتوا معايا ياجماعة ان الرجالة انانين ولا لأ وخصوصا زمانا ده
ااقدر ااقولكم ان اغلب الرجالة اللي بيتفرجوا على الفضائيات وماأدراك مالفضائيات
واللي بتسرسبه (قصدي بترشه)علينا من الفاتنات الرشيقات الجميلات الدلوعات أمثال(اليسا صاحبة اكبر رقم قياسي
 في وزن السليكون في صدرها  وهيفاء الفيحاء الفرعاء صاحبة الوسط اللي محيطة 3 ميلمميتر ونانسي عجرم القطقوطة الننوسة
 الفسفوسة )اغلب الرجالة بيقارن بين مراته الغلبانة اللي قاعدة تربي العيال وبين الفاتنات دول والله حرام
اعرف راجل من قرايبنا ماسك مراته في الرايحة والجاية ...شفتي الستات اهي دي الستات ولا بلاش ستتات تحل من على المشنقة
بصي لنفسك في المراية خسي شوية وبطلي اكل محشي
اه لو الواحد كان معاه فلوس كان جدد شبابه مع مذه صغيره(تجدد ايه بس هيا رخصة عربية)
ياراجل يامعفن واالله انت حق ربنا تتقطع وتتشفى وتتحط في 3 اكياس كبار واحد لونه اسود والتاني بقا اسود والتالت برضه اسود
بس لما تتقطع يبقى مش بالساطور ..انصح كل زوجة بأصافة الضوافر حته حته من غير بنج عشان يتعذب على اصوله

يعني كل راجل بيذل مراته بشكلها اللي اتغير بعد الهم والغم اللي شايفاه بسلامتها على ايديه
يعني من كتر ياخويا مانت مهنيها اوي ..مانت مشغلها في البيت ولا الخدامة وموريها المر
يعني في الرايحة والجاية تقولها ماتعملي شعرك عند الكوافير وتغيري لونه هوا انتي مش شايفة الستات عاملين ازاي
تقوله هات ياحبيبي 120 جنيه
ياشيخة بلا هده وكلام فارغ سرحيه انتى ياروحي
ياراجل يامأياح مستخسر فيها ملاليم وعاوزها تبقى زي هيفاء وهبي
انت عارف هيفاء وهبي دي بيتصرف عليها كام عشان تطلع كده ..بتاع 35 عملية تجميع
طب ده حلال ولا حرام
الراجل ده مابصش لخلقته في المراية  وقال كلمة حق(والله كويس ان الست دي مستحمله اللي انا شايفه ده)
 ماشافش صلعته اللي بيزحلق عليها العيال في الشتا بعد ماالدنيا تمطر
ماشافش كرشه اللي مخبي ومحوش فيه  محشي وبط وفراخ و97 كيلو رز وتموين من 10 سنين فاتوا يفكوا ازمة الغلابة
الست وبتحمل وبطنها تكبر مع الحمل وده بياثر على شكلها وانت ياستاذ بطنك بتكبر ليه بالذمة ليك عذر
مش جايز مراتك قرفانة من سحنتك بس كاتمة في قلبها وبتسر
طب اتقي الله هيا واحدة زي هيفاء الفرعاء الجدعاء الفيحاء هاتبصلك على ايه حتى لو معاك فلوس
مش تحمد ربنا ان مراتك راضيه بيك تشوف سحنتك عالصبح وبالليل والضهر واناء الليل واطراف النهار
ومستحملة شخيرك اللي بيصحي الجيران اللي في الدور التاسع ويقوم الديوك من عششهم تدن نص الليل
فكرت انت مرة تحسن شكلك وتغير حياتك
فكرت تقوم من مكانك الي انت متبت فيه من 4 ساعات قدام التلفزيون تساعد الغلبانة اللي بتطبخ وتغسل وتنضف وتذاكر للعيال
وتدلع في سحنتك كمان ..قوم اتلحلح احرق شوية البلاوي اللي شايلها على قلبك
هوا انت ليك نفس.. والست مالهاش نفس تشوف حاجة عليها الطلا
مافكرتش مرة تروح للميكانيكي يظبطلك بلاويك ويعملك عمره ..الشكمان اللي مخروم في مناخيرك
الرفارف اللي ضربت لبره وكمان واحد اكبر من التاني
التانك بتاعك اللي معبيه دهن بدل البنزين
الإزاز القدامني المدغشش (عينك ياعني)اهو يركبلك مساحات
ولا تلبخ صلعتك دي لبخة زبل حمام جايز تزرع وتنبت من تاني كسبرة خضراء ولا بقدونس
يعني اتقي الله هوا الزمن ماشي عليها لوحدها ولا عليك انت كمان
يعني مافيش مراية تبص فيها ..
عايش في الماضي وفاكر نفسك حسونة فهمي...ياراجل انت بالكتير حسونة الفطاطري
بطلوا يارجالة تذلوا ستاتكم ....ده هما شايلين عنكم تعب كتير
انت بتشتغل وترجع من شغلك  تبقى عواطلي تلزق في الكنبة لما كرشك يدلدل وعيالك يتكعبلوا فيه وهما بيجروا ..
وتتأمر عليها وهيا برضه راجعة من الشغل زيك وتعبانة
ده حتى تلاقيها هيا اللي اشترت الحاجة من السوق
خلصت الغدا.. لسه كتير ..جعانيييييييييييييييييييين..ماتهز طولك قوم يامقطف
طب اعملي لنا كوبايةشااااااااااااااااااااي
يعني ماعندكش ذرة رحمة ...ده لو هارون الرشيد اللي هوا هااااااااااااااااااروووووووون الرشيد كان زمانه  قام عمل كوباية الشاي دي
ارحم الغلبانة دي شوية ..يتغدى ويقوم يشخر وهيا  تفضل صاحية تشطب مواعين وتذاكر للعيال وتحضر لسيادته هدومه وتكويها
الهي تتكوي يابعيد في نار جهنم يامفتري ياظالم
وعايزها تهتم بنفسها هيا لاقية وقت تغسل وشها حتى... انت مديها فرصة تشم نفسها
الست ربنا خلقها تتستت وتتدلع ..امال عاوزين تبقوا قوامون ازاي بس ؟؟؟ قوامون ببلاش ؟والله الست في مصر بتتحمل  بلاوي جوزها اللي
بيخليها تشيل حمل تقيل قد جبال الألب...مفكرتش في يوم الحساب هاتقول لربنا ايه؟
على العموم انا قلبي مع كل زوجة بتشتغل وتساعده كمان  في مصاريف البيت وقايمة بكل شغل البيت وبتذاكر لولادها وووووو   الخ
باحترمها ولا احترم جوزها اللي ربنا خلقه قوام عليها ..القوامة رجولة ومسئوليه وتحمل وخدمة من تقوم عليه وتلبية احتياجاته
وماحدش يقولي إن هيا اللي طالبت بالمساواة ...والله دول ضحايا ستات تانين مرفهات من مجتمع تاني هاي كلاس فاضيين قعدوا يطالبوا بالمساواة
لحد ماحملوا الستات الغلابة فوق طاقتهم وحطوهم في وضع لازم تشارك في مصاريف البيت عشان تعيش
وبعد كل ده عاوز يتجوز واحدة تانية اصغر واحلى وارفع ..والله الست لها حق في الساعه دي تدك جتته في سيخ محمي
على قنطار فحم ملتهب.. وتهوي بسرعة وتجيب الجيران معاها يهووا كمان ..وتعمل منه شيش بالوظ
الرحمة والعدل ..بلاش نكران جميل.. بلاش تجرح الست في انوثتها بمقارنتها بالعاهرات ولا انت ياخي عاوز واحدة دلوعة
تبسطك وتبسط الخلق كلها معاك زي اللي بنشوفهم دول
كل راجل بيقرا المدونة لازم تقدر مراتك صح ..وبطل تعيش في الاوهام بلا هيفاء وهبي بلا خيبة يعني انت كمان ياخويا
كنت مستر إيجيبت ..ولا حصلت مستر كاراتيه كمان..خليها في سرك بقا وخلي الطابق مستور

كل اللي فات ده للراجل الظالم لمراته وبيهنها ويجرحها من غير مايحس قد ايه كلماته تأذيها ..خلي بالكم ياقوم

واشكر كل اللي يحترم مراته وبيجبلها ولو منديل يؤية..ويقدرها ويحترمها ..كل الشكر

يكونش حضرته احمد السقا

05/31/2008

،

11:51 م

.. من قبل fadiabatisha

..

..

يا اميرة انت محصلتيش

عظمة على عظمة يا ست

بالفعل بعض الرجال يستحقون ان يتم توزيع كلماتك عليهم

يمكن الواحد منهم يحط عى عينه حصوة ملح

وانا معك الست المصرية من ارقى وارق النساء

لكن المطلوب منها اكثر جدا من قدرة اى انسان

بجد ماشاء الله عليك وربنا يسعدنا دائما بكل ما تكتبينه

فادية

شكرا استاذتنا فادية

06/ 1/2008

،

09:32 ص

.. من قبل ameera1977

..

..

انا مبسوطة ان المدونة عجبتك بصراحة الواحد كان نفسه في شوية شتيمة زيادة دفاعا عن الستات الغلابة دول
بس قلت لايميها يابت كفاية كده اهم خدوا شوية في جنابهم في التمام
دمتي بخير

ولا تقوليش كريم عبد العزيز

06/ 1/2008

،

12:04 م

.. من قبل نجلاء فتحي

..

..

السلام عليكم أولا
أناعاوزه أشكرك ياأميره على كل مواضيعك زي ماتكوني بتقرأي أفكار الواحد ، والله بشوف رجاله مع ستاتها عجب

ثانيا النوعيه دي من الرجاله عاوزه الدبح بسكينه وتكون تلمه على رأي المثل اللي بقول أطبخي ياجاريه كلف ياسيدي ياعني عاوزها كده وديها لدكاتره تعمل العمليات اللي بيعملوها وهتلها خدامه ومدرسين لعيالك وهيه هتبقى زيهم ياتتنيل على عينك وتحط في بقك جزمه قديمه وتسكت مش كفايه الغم والعكننه اللي إنت موريهلها وكمان بتتأمر

والله عندي عمي مراته كانت زي القمر جميله ورغم كده راح إتجوز عليها واحده إستغفر الله العظيم الكل ماكانوش مصدقين إنه يسيب دي ويتجوز دي بالرغم إنها كانت ست بيت رائعه وحنينه وطيبه بس الرجاله معظمها عينهم فارغه وربنا يعين الستات والله، هايلقوها منين ولا منين

بصراحه بتجيبي مواضيع جامده جدا وربنا يوفقك ويهديلك عيالك وإلى الأمام دائما

نجلاء فتحي انتي احلى من نجلاء فتحي

06/ 1/2008

،

02:04 م

.. من قبل ameera1977

..

..

باشكرك على متابعتي دايما ولو اني مش عارفة هاكتب ايه بعد كده
بس انا معاكي ان اغلب الرجالة يستاهلوا الدبح بسكينة قديمة جدا بقالها بتاع 36 سنه عشان تكون مش تلمة بس لأ ومصدية كمان
قال هيفاء قال
ده لو اتجوز هيفاء وداقت المر اللي في عيشته
3 ايام بس وهاتبقى شبه محمد منير


حرّر بواسطة ameera1977 في 06/ 1/2008 عند 04:30 م

حرام عليكوا يا حريم مصر !

06/ 1/2008

،

02:31 م

.. من قبل lastdinner

..

..

قاعده حريم و عمالين تقطعوا في فروه الرجاله الغلابه بأه
يعني لا يبقي حقيقه ولا خيال يحلم بيه الغلبان الشقيان في الشغل و بعدبن البيت و طلبات البيت و مسؤليات البيت و همّ المصاريف و الجزار و الميكانيكي و السوبرماركو و حل خلافات أم العيال مع أمه و تقل دم حماه....إلخ
و بعد كده مستخسرين فيه يتفرج و يتخيل إنه متجوز نانسي ولا هيفاء و عايزينه يدلع المتبدهله النكديه أم صوت عالي ليل نهار ؟؟
حرام عليكوا و اشوف فيكوا يوم من أميره لنجلاء لفاديه يا قادر يا كريم
ههههههههههه
أخوكوا حازم

حرّر بواسطة lastdinner في 06/ 1/2008 عند 04:57 م

تعليق بدون عنوان

06/ 1/2008

،

03:27 م

.. من قبل starlight

..

..

ههههههههههااي
يا مجرمة يا أميرة .. بالاصافة وكمان من غير بنج ؟؟ هههههههههااي
مش خاييفة من الرجالة في المدونة ليشطوكي برة أكتب ؟
بس والله عندك حق في كل كلمة قولتيها
انتي تعرفي يا أميرة أن المرأة في الاسلام غير مطالبة بخدمة زوجها ؟
بل يجب على الزوج أنه يوفر لها خدامة تخدمها
وإن خدمة الست لزوجها وبيتها وأولادها دي تطوع منها .
......................
لو زي ما بتقولي يا أميرة والراجل راح شاف نفسه في المراية كان قال " كتر خيرها مراتي أنها مستحملاني وبتحبني "
بس تعرفي .. والله والله ما هي غيرة ستات .. بس أنا مش شايفة في هيفا وهبي وإليسا بالذات أي أنوثة أو شئ يجذب الرجل
يمكن نانسي جميلة شكلاً وقالباً ..وبالعكس .. العمليات اللي عملتها شوهت جمالها.
لكن الأعلام هو اللي عطاهم أكتر مما يستحقوا ..
لا . مش أكتر .. عطاهم شئ مش يستحقوه أصلاً
لأنهم مفيش عندهم أي نوع من أنواع الجمال .
الجمال جمال الروح .. جمال القلب .. جمال الخلقة اللي ربنا خلقنا عليها
عرفة ومتأكدة أن كل راجل هيقرا كلامي هيقول عني ايه .
يقولوا اللي يقولوه .. بس هي دي الحقيقة .
أقل ست تقدر تكون زيهم مع شوية مكياج وحتى بدون عمليات ولا يحزنون .
لكن هي دي طبيعة الانسان وخصوصا الراجل في مجتمعنا .
::::: ::::: ::::::::
لكن في النهاية لي كلمة لكل ست ..
:: لازم يكون عندك ثقة في نفسك وفي جمالك وفي قدرتك على تحسين مظهرك
لازم يكون عندك عزيمة تتحدي جوزك وتكوني أجمل من كل الفاتنات المزيفات دولا
أنتِ مش أقل منهم في اي شئ
يمكن أنتِ أحسن وأفضل وأكتر منهم أنوثة وجمال .
المشكلة في عقول الرجالة اللي مابقاش فيها غير الجسد ولغة الجسد وبس .
أميرة .........
كفاية عليهم كدا .
يسلم فكرك وقلمك يا قمرنا وأميرتنا
وأحلى بوسة لأميرة الحلوة . أتخيلهيا أنتي بقى .. ههههاي

استاذ حازم الكريم

06/ 1/2008

،

03:48 م

.. من قبل ameera1977

..

..

طبعا كلامك كلام فارغ
حقيقة ايه وخيال ايه
ببتكلم ان الراجل مايدلعش المتبهدلة النكدية
هيا بقت كده من نفسها ولا من الوكسة اللي اتحطت فيها

الست اللي متستته في بيت جوزها بجد بيبان عليها
وتفضل شباب علطول
وبعدين كل واحد يبص لنفسه بقا
هيفاء وهبي تتجوز احمد عز.. ممكن..انما الباقين دول يلموا الدور ويقصروا بقا
كل كلامي نراعي مشاعرها ..حتى لو هاتبص من تحت لتحت ماتحسسهاش بده وتذلها في الرايحة والجاية

حبيبتنا ستار لايت

06/ 1/2008

،

03:56 م

.. من قبل ameera1977

..

..

شوفي الستات هايحسوا بكلامي ده أما الرجالة الانانين
مش هايفهموه

كلامك زي السكر بس اللي يفهم ويصدق
زي ماديننا الاسلام العظيم حرم على الست النظرة حرم على الرجل ولم يفرق بينهم
اشمعنا الست تصون جوزها ومشاعره وهو يجرحها ويكسر مأديفها اتقوا الله
الله يرحم ايااااااااااااام زمااااااااااااااااااااااان ايام ماكان كل امال الراجل انه مراته تبقى شبه كريمة مختار
مش لشكلها ولكن لحنيتها ومعاملتها ودعواتها...الخ
لكن بتوع اليومين دول عاوزين الحش
كل تفكيرهم بلاوي سودا ..اتقوا الله واحسبوا يوم الحساب
ورفقا بالقوارير
وعلى رايك انتي كفايه انها اتنازلت عن حقوق كتير
منها الخدامة ..من فقرهم وأشفهم
يبقى يشيلوها على دماغهم لانها مش ملزمة
وحكاية شغال وشقيان.. امال انت لازمتك ايه في الحياه
ماتبطل شغل كمان وهيا بقا تصرف عليك ده اللي ناقص

اشكرك ياستار لايت ومنورة دايما

حرّر بواسطة ameera1977 في 06/ 1/2008 عند 04:03 م

مش عارف ااقول ايه

06/ 1/2008

،

05:20 م

.. من قبل masryeen

..

..

لولا انك خلتيني أنفجر من الضحك المتواصل طول مأنا بقرا المدونة لكنت كتبت لك نقد لاذع ...جايز يكون معاكي بعض الحق ..بس انتي بهدلتي الرجالة خالص...يعني خدت بتار كل الستات الغلابة زي مابتقولي

عجبني مقارنتك بين حسونة فهمي وحسونة الفطاطري
السطر ده خليني اضحك لما موت من الضحك
وعلى العموم انا معاكي برضه ان الراجل لازم يقدر مراته ام عياله ..لانهابتتحمل معاه بس بلاش حكاية الأصافة دي
ولا السيخ المحمي

ويبقا كتر خيرك

الكلام الفارغ !

06/ 1/2008

،

06:03 م

.. من قبل lastdinner

..

..

أختي العزيزه أميره
لو إني مبحبش أرد عل الرد و أخش في لعب عيال
لكن فعلاً إتضايقت من إن الرد عليا يكون إن " كلامي فارغ" لمجرد إنه مُخالف ليكي في الرأي !
نفسي ننضج و نحترم أراء بعض و نرد على بعض برد موضوعي يحمل وجهه نظر صاحبه و يحترم وجهه نظر الآخر مهما كانت ، بدون تسفيه
أنا يا ستي قولتلك رأي راجل من الرجاله
ناقشيه ، إرفضيه حتى..........دا حقك
لكن تسفهيه و تهنيه لأنه رأي مخالف ؟!
القاريء ليه إحترامه زي الكاتب بالظبط لأننا إرتضينا نشر أفكارنا و بالتالي إرتضينا تلقي اي رأي و إلا نكتب تحت مدوانتنا بأه "إكتب تعليقك لو كله مدح فيا و موافقه على كلامي بس " !
انا في قُراء شتموني في تعليقاتهم و ممكن ترجعي لمدوناتي و تشوفيها و مع ذلك عمري ما رديت على واحد أو واحده قولت له أو ليها كلامك فارغ أو إنتا ما بتفهمش !
لأن دا رأيه شأت أم ابيت
و لو فضلت مش مقتنع بيه.......فا على الأقل لازم أحترمه لأنه كلف نفسه و قرالي و إهتم إنه يكتب لي تعليقه
و اشكرك على كل حال
أخوكي حازم

الأستاذ حازم

06/ 1/2008

،

08:40 م

.. من قبل ameera1977

..

..

تفاجئت بهذه الحساسية الشديدة ..من يعرفني جيدا يفهم قصدي
لم أقصد المعنى الذي تضايقت منه
تدوينتي هذه بالذات فكهاية وساخرة جدا
وكذلك ردودي على التعليقات لو لاحظتها فهي في نفس السياق الفكهاهي
وردي عليك هو على سبيل الدعابة التي يجوز انك لم تفهمها .والدليل على ذلك كلماتي هذه في ردي عليك

وبعدين كل واحد يبص لنفسه بقا
هيفاء وهبي تتجوز احمد عز.. ممكن..انما الباقين دول يلموا الدور ويقصروا بقا

.وخصوصا انت من قراء مدونتي الدائمين..وكم تقبلت نقدك دائما حتى في مدوناتي السابقة
اعتذر رغم عدم قصدي الإهانة

وشكرا لمرورك

حرّر بواسطة ameera1977 في 06/ 2/2008 عند 07:01 ص

تحياتي للمصرين

06/ 1/2008

،

08:55 م

.. من قبل ameera1977

..

..

كويس جدا ان ده راي رجل فهم قصدي من المدونة
وكويس ان الضحك اللي ضحكته ..لايم الامور شوية
اما موضوع الأصافة والسيخ فهو فقط للرجالة الظلمة اللي بيجرحوا ستتاتهم علشان خاطر اللي ماتستاهلش

ودائما انت من زوار مدونتي الكرام

وشرف لي ان شاعرا كبير مثلك ذو ثقافة واسعة يداوم على زيارة مدونتي المتواضعة
وتنال إعجابه

فلا تحرمنا هذا الشرف

وشكرا لمرورك العطر دائما

تحياتى للاستاذ : ابو عمرو

06/ 2/2008

،

10:54 ص

.. من قبل AbouMazen

..

..

مش هرد عليكِ يا مفترية

انا وكلت اخونا ابو عمرو فى الرد واخذ التار

ثم حضرتك بتعيبى على خلقه ربنا وتقولى صلعتك ابصر ايه وكرشك مش عارف ايه

حرام عليكى يا شيخه هتروحى من ربنا فين ..واء واء واااااء

_________ انتهى الفاصل الفكاهى

احسنتى اميرة ... وعندك حق .. وحقك علينا ..
كان فاضل بس انك تقولى للنساء ,,, رغم كل الصعاب والتعب والشقى ... لازم يكون فيه وقت للزوج ، للراجل

معهوش 120 جنيه معلش ، هاتى انتى صابغه واصبغى فى البيت ... مبتعرفيش اتعلمى

مش عيب تلبيس حلو وتحطى برفان ، مش عيب

_________ نكته سمعتها

رجل اشترى قميص نوم لمراته .. بدل جلباب المطبخ الاحمر التى لا تستبدل الا بجلباب النوم الزرق

الرجل ميل على مرات وقال
قومى يا شيخى البسى القميص الجديد بدل الجلبيه الوحشه دى ..

بصت له بدهشه وقالت .... جرى ايه يا راجل هو انت غريب
_________ انتهت ومش عارف ابتسم لسه

______________________

معلومه تاريخية

ما ورد الينا عن هارون الرشيد صورة غير حقيقيه تاريخيا وعلميا ..فهارون الرشيد قضى ولايته (عام للجهاد وعام للحج ) هذا هارون الذى شوهوه او بالاصح هما مش حبين نعرفه ..

وحتى احمد عز يا اميرة وحسونه فهمى وهيفاء واليسا اللى انا بحب صوتها جدا

دى الامثله والنماذج اللى هما عايزينا نتشبه بيهم

__________ لكن الامثله الاجدر بالاقتداء بها

أمرأه جعلت مهرها ان يسلم الرجل المتقدم للزوج منها
فاسلم

بعد اعوم مات طفلهم .. فغسلته وكفنته ووضعته جانبا

فلما عاد زوجها .. اعدت له طعامه وفراشه وضاجعته فقضى منها وتره

وفى الصباح قالت ان كان لاحد جيراننا امانه فجاء يطلبها هل تحزن فقال لا

قالت فلقد استرد الله امنته وحكت له ما حدث
فعز عليه ان ابنه مات وهو فى حضن زوجته يعاشرها معاشره الازواج

فذهب شاكيا الى رسول الله ...قال صلى الله عليه وسلم
بارك الله فى ليلتكما هذه

واستجاب الله لدعاء رسوله فانجبا عشرة اولاد كلهم كانوا من حفظه القراءن

___________ حاجه تانيه

رسول الله قال : صلى الله عليه وسلم (فيما معناه )

لو طلبها تاتيه ولو في يدها العجين يختمر )

العجين تخبزه وهيبوظ لو تركته لكن لو طلبها تذهب فى احسن صوره ... متقلش والغسيل اللى فى ايدى ..متقلش والطبيخ اللى على النار ... متقلش عيب بقى احنا كبرنا على الحاجات دى

_____________ احسنتى استاذه اميرة فيما قدمتى
وما تعقيبى هذا الا محاوله مجرد محاوله لاكمال الصورة

حرّر بواسطة AbouMazen في 06/ 2/2008 عند 11:01 ص

أميرة،أنا عائد

06/ 2/2008

،

11:56 ص

.. من قبل mounirbahi

..

..

اهلا أيتها المدهشة حتى في غضبك
أميرة...
منعتني انشغالات ومازالت من أن أترك توقيعي هنا.
لي ملاحظات.
انتظريها مني...قريبا جدا.
بلغتك كي لا تغلقي الأبواب مبكرا.
سلامي

انوثه

06/ 2/2008

،

08:08 م

.. من قبل Anonymous

..

..

عزيزتي اميره اوفقك في معظم ما قلتيه مع تحفظي لوصف فنانات
بالعاهرات. و هم يعني الرجاله كلهم حسين فهمي ومحمود قابيل ولا كيفين كوستنر..
لكن المطلوب الست تحب نفسها شويه لو حبت نفسها هتعتني بنفسها اكتر من كده ويمنعش تدلع جوزها من وقت لتاني تحياتي ليكي اختي الكريمه

الاستاذ الكريم ابو مازن

06/ 2/2008

،

09:33 م

.. من قبل ameera1977

..

..

تعليقك دائما ليس مجرد راي أو نقد أو إطراء ولكنه ماشاء الله مدونة بذاتها
تكمل فيه بقلمك مافاتني في مدونتي
ارائك وقصصك تكمل أفكار كتبت من أحداث حصلت في الماضي أو عظة وعبرة نستفيد منها

شكرا لقلمك المبدع دائما

الشاعر الكبير الاستاذ منير

06/ 2/2008

،

09:35 م

.. من قبل ameera1977

..

..

لن تغلق الابواب ابدا ان شاء الله

دائما لك مكان محفوظ بين القراء المتميزين في مدونتي
والذين أسعد دائما بتعليقاتهم ..حتى وإن كانت نقدا
انتظر دائما زيارتك لمدونتي المتواضعة لتضع فيها لمسات شاعر كبير

انوثة الغالية الرقيقة

06/ 2/2008

،

09:41 م

.. من قبل ameera1977

..

..

تشريفيني دائما بزيارتك ..وأسعد بها وبارائك السديدة

بس لفظك فنانات ده انا مش موافقة عليه خاااااااالص
بصراحة اللي انا ذكرت اسمائهم في المدونة .اللي بيعملوه في اغانيهم وكليباتهم لايمكن يكون فن واللفظ اللي قلته والله بحق ربنا يستحقوه
الفنانة دي ممكن تكون واحده زي نجاة.. فايزة احمد ..شادية
ولا انتي رايك ايه؟؟؟؟؟

شيء من ملاحظاتي

06/ 3/2008

،

04:19 م

.. من قبل mounirbahi

..

..

المدهشة أميرة..
أولا أنا خجول جدا من اللقب الكبير الذي تثقلين به كاهلي...وأعرف أن هذا من باب التقدير المتبادل..
لكني سأكون سعيدا لو خلصتني منه حتى لايمنعني من الكتابة بعفوية التي لا تخلو من زلات..فكيف يرتكب الشاعر الكبير زلاته بضمير مرتاح؟
....
ثانيا ملاحظتي المتواضعة:
لن أكرر مجددا اعجابي بالطاقة الكوميدية الكبيرة التي تتفجر بسلاسة من بين يديك،ولا الفكر المتوقد الحاد الذي تلبسه كتاباتك...
وأراك حسب قراءاتي المتواضعة البسيطة واحدة من الأقلام الأكثر خفة في محيطنا العربي،وليس في الأمر مبالغة...
....
إلا أن الكوميديا أوالسخرية او الفكاهة بغض النظر عن الاختلافات الجوهرية بينها تهدف الى نقد السائد بغية تغييره وإعطاء البديل المنتظر من المثل والقيم التي تتناقض تماما مع ما هو كائن وتنتقده أصلا..
وفي هذه الكتابة التي اعترف بأنها اضحكتني استفزني فيها أمر واحد وقد ينسحب على كتابات أخرى. وليس في الأمر أي انتصار للرجال ولكن انتصارا للقيم..

تأملي معي أيتها الأميرة هذه العبارات:
...........
"ياراجل يامعفن واالله انت حق ربنا تتقطع وتتشفى وتتحط في 3 اكياس كبار واحد لونه اسود والتاني بقا اسود والتالت برضه اسود ".

"لما تتقطع يبقى مش بالساطور ..انصح كل زوجة بأصافة الضوافر حته حته من غير بنج عشان يتعذب على اصوله.."

"والله الست لها حق في الساعه دي تدك جتته في سيخ محمي
على قنطار فحم ملتهب.. وتهوي بسرعة وتجيب الجيران معاها يهووا كمان ..وتعمل منه شيش بالوظ..."
................
كم هي دموية هذه الصورة
كم هي عنيفة حتى ولو كانت الغاية هي الإضحاك..
أعيدي قراءتها بعيدا عن الضحك...أمر صعب فعلا.
أتصور أن عمرو سيقرأ مرة هذا الكلام...
أتصور أن يصدق الأطفال أن نوعا من الرجال يستحق كل هذا التعذيب والقتل الرهيبين...ويكون بالتالي مبررا لجرائم بشعة من هذا النوع.وبالتأكيد أن الأخبار تتوارد من مصر خاصة عن جرائم ترتكبها زوجات في حق أزواجهن بمثل هذه البشاعة:قتل،ذبح،تقطيع،حشر في أكياس...بتواطؤ مع العشيق أو الأخ أو الأبناء...
....
أعلم أن هذا واقع موجود.
واعلم أنك فقط تسخرين..
لكن
تمنيت من أجل عمرو ومن أجل نقاء روحك،لو كانت هذه الأمنيات الدموية على لسان نساء أخريات لا على لسانك..
تمنيت أن تتركي المسافة بينك وبينهن..
أو أن تعقبي مثل هذا الكلام بكلمات جادة تنتقد مثل هذه الأماني الداعية الى القتل والشي والسحل..
........
أميرة
هذه ملاحظتي المحدودة
وهذا تقديري اللامحدود

الشاعر الكبير الاستاذ منير

06/ 3/2008

،

09:39 م

.. من قبل ameera1977

..

..

هذا هو لقب تستحقه حتى وإن كنت تتمنى ان تكتب بعفوية بها من الزلات القليل

شكرا اولا على الإطراء والذي اجده أكبر من حجمي

ثانيا : قد علمت حين كتبت تعليقك الأول بانك ستترك ملاحظات تأكدت من العبارات التي ستلومني عليهاا وقد كان ماتوقعته
اعتبرها فراسة او حاسة سادسة
ولكني قد علمت انه حينما سياتي لزيارة مدونتي شاعر كبير مثلك بأنه سوف ينزعج من مثل هذه الصور
هذا هو الطبيعي ولو حدث غير ذلك لكان أمرا غريبا على الشاعر الكبير الملئ دائما بالخيال والعذوبة
بالنسبة للنقطة التي اثرتها عن العنف في الكلمات واتخاذ
الصور الدموية هذه المرة بشكل زائد
لا أنكر ومعك كل الحق
مع العلم باني كشخصية بعيدة كل البعد عن هذا العنف حتى اني لا أطيق ان أرى طيرا يذبح
فقط ياسيدي ألم تلاحظ ان هناك نفوسا كثيرة قد استراحت
ألا وهم النساء من قراء مدونتي
لم يعترض ا احد منهم على بشاعة الصور لأن شعور المراة بخصوص ماكتبت عنه في حال جرحها زوجها في أنوثتها يكون أعظم مما يتخيل الرجل
أما انا فقمت بدور الطبيب النفسي والذي يأتي بدميه كبيرة ليسدد لها الشخص المغتاظ اللكمات
هو مجرد تنفيس لا يمت للواقع بشئ من الحقيقة
فقط أردنا تخويف الرجال وتحذيرهم باللهجة الشديدة حتى لا يعودوا فيؤذوا شريكتهم في الحياة
اما انا فاعتذر اذا كانت عباراتي قد صدمتك.. ولكن فقط أحببت ان يكون موضوعي هذه المرة حاد كمرارة المرأة المجروحة أرجو ان تكون فهمت وجهة نظري
وسعدت جدا هذه المرة لأنك تنتقد مدونتي نقدا بناءا

دمت بخير وعافية

اتفق معك ولكن...

06/ 4/2008

،

04:25 ص

.. من قبل mounirbahi

..

..

أميرة
شكرا جزيلا على ردك الرقيق.
أنا أيضا حاستي السادسة لم تخطئ حين كنت متأكدا من أنك تمزحين، ومن أنك نقية الروح باعتبار الكتابات العفوية شفافة،وكتاباتك إبداعا وتعاليق تكشف هذا النقاء.
...............
أتفق معك فيما قلتِ،تنفيس عن النساء اللواتي يقرأن المدونة،ولهذا لم يعترضن.
وهناك من تحمل شعورا أفظع..
وكل هذه الصور من أجل تخويف الرجال...
............
لكن،
أنت تتحدثين عن النساء هنا والآن.
وتخوفين الرجال هنا والآن.
وأنا أتحدث عن هناك وغدا.
لا أرى في كتاباتك تدوينات محدودة في الزمان والمكان.
بل أرى كتابات تربي جيلا قادما نريده لو يتخلص من أعطابنا وعيوبنا ونقائصنا.
لن تكون الرغبة في القتل تنفيسا.
ولن يكون سحل الرجال وتقطيعهم تحويفا لأمثالهم.
القتل وتشويه الجثث أول الحلول التي اكتشفها الانسان الأول لحل الخلاف (هابيل وقابيل).
وبعد آلاف السنوات لم نستطع أن نبتدع حلولا أخرى غير الرغبة في استعادة خطيئتنا الأولى على الأرض.
أنت تتحدثين عن حسونة..
وأنا أردتك أن تتحدثي عمرو...
وليس كل الآباء كأب عمرو بالتأكيد.
.........
أعذريني أيتها الأميرة إن لمست في كلامي جدية أكبر..
ولكني أناقش الفكرة من حيث المبدأ وليس لأنك أوردتها في كتابتك.
.......
ورغم الجريمة الواضحة في النص إلا أني من قلبي عذرتك.
ورغم الدماء السائلة من تلك الصور...إلا أنني والله في كثير من المواقف ضحكت..
..........
هل تقبلين تقديري واحترامي؟

شاعرنا الكبير

06/ 4/2008

،

07:07 م

.. من قبل ameera1977

..

..

شكرا لتفهمك قصدي
وأعلم أنك تريد الخير لمدونتي وللرجال ايضا ولأجيال قادمة

أما تقدير وإحترام من شاعر كبير مثلك فهو شرف لنا كما هو شرف كبير تواجدك بيننا
وأعدك والقراء بأن أحاول كبح جماح قلمي هذا الذي تنساب منه كلماتي كالطوفان الثائر في بعض الأحوال

أرسل تعليق
من:	*  عضو مسجل: [ دخول / التسجيل ]
* عنوان الموقع:
* البريد الإلكتروني:
الموضوع:
* النص:
* الرمز: