كركر

إتفضل انت .لا إنتي .لأ بقا انت

ايه اللي بيحصلنا ده ايه البلبلة دي ...لخبطونا ولخبطوا دماغنا حرام عليهم
الختان حرام ولا حلال ..المسيارحلال ولا حرام والشيخ ابورضعة ..وشيخ زواج المتعة...
خالد الجندي يحرم العرفي ويطلع متجوز عرفي من مسيحية
د. علي جمعة   2003    الختان مكرمة وله أصل في الشريعة والسنة
د .علي جمعة   2007 الختان حرام ولم يرد فيه نص شرعي
اذا كان ده المفتي امال صُباينه الصغيرين بيعملوا ايه؟؟؟؟؟
ياناس ياللي ماسكين السبحة ومربين الدقن .....ايه الهباب اللي بتهببوه ده؟
نفس الشيء حدث مع آراء الدكتور محمد سيد طنطاوي شيخ الأزهر التي كانت آراؤه السابقة تؤكد
 مشروعية الختان ومنها فتواه الصادرة عن دار الإفتاء عام 1987  والتي أكد فيها أنه طبقا للنصوص الشرعية وكتب السنة
 والفقه فإن الختان للرجال والنساء من صفات الفطرة التي دعا إليها الإسلام وحث علي الالتزام بها
 علي النحو الذي بينه رسول الله (ص )ليتراجع عن هذا الرأي أثناء مؤتمر
مؤسسة تارجت معلنا أن الختان مجرد عادة وأن الختان للرجال فقط  وأن أحاديث ختان المرأة رويت من أوجه مخدوشة
طبعا مش باتكلم في الختان ..انا باتكلم في مصداقية شيوخنا الكبار
  بالذمة دول بني ادمين نسمعلهم كلام ..ده الحرامي مابيغيرش مبدأه ولا كلمته.دول مكانهم بالكتير فقها يقروا في ترب الغفير...
وياكلوا قرص ميتين عل قد مقامهم برضه(يعني بالسمن البلدي)وبلح أبريمي وجوافة
او يشتغلوا حانوتيه بس دول لو شالوا ولي في خشبتهم يودوه النار
 واالله دول ممكن يأذوا الميتين ...الميتيين بيحتاجوا هدوء وسكينة وسلام.. ودول سبب كل بلبلة ولخبطة في دماغنا
يعني الميت من دول هايقولهم حرام عيكوا انتوا ورانا ورانا  سبنا لكم الدنيا جايين برضه ورانا
او يشتغلوا حانوتية (بس دول لو شالوا ولي  صالح على خشبتهم يودوه النار)
هايقابلوا ربنا ازاي ويقولوا له ايه... احنا ماشين حسب ماتقول الارصاد الجوية
في برنامج المذيع المبدع دائما  آحمد عبدون (صاحب برنامج الإتجاه المعاكس النسخة الشرشوحية المصرية)
اللي مابيرتاحش ولا يهناله بال غير لما يجيب اتنين دعاه مش طايقين بعض كل واحد ماسك نبوت في ايده مخبيه
تحت الترابيزة يرزعه في دماغ الشيخ اللي جنبه أثناء الفاصل حتى لاحظوا دايما ان شكلهم بيتغير بعد الفاصل    
في مرة مانساهاش جيه الجهبزالعظيم وهو  نجوم الدعوة  والفضائيات اللي ظهروا على الساحة (صبري عبد الروؤف )
كانوا بيتكلموا  عن قضايا اثبات النسب وقال بالحرف اللي زنا بواحدة وجاب منها عيل مايتجوزهاش يستغفر ربنا 3 مرات في اليوم
اما المراة تتحمل نتيجة غلطها كأنها يعني خلفت لوحدها بالانقسام الميتوزي
لانها فاجرة وزانية ومش عاوزين نفتح باب اثبات النسب بالDNAلان كل واحدة طمعانة في راجل غني هاتغريه وتوقعه وتخلف عيل
يقش كل حاجة ونبقى حققنا اللي هيا عاوزه ...كأن الراجل ده بريالة ..وياعيني مستني اي واحدة تشاورله ولا تغمزله  خلاص يقع من طوله
ويبقى مسلوب الإرادة بعد ماالست الشريرة خلته يشرب حاجة اصفرةى...ايه المنطق  الذكوري الاهبل ده
للاسف انا مش قادرة اصدق نقائهم وتدينهم ومظهرهم اللي غير مخبرهم
مرتين حصل موقف يدل على ان الناس دي الايمان مش في قلوبهم
واحدةشابة اتصلت وقعدت تعيط انا الزوجة التانية وجوزي اخد كل فلوسي ومش سائل فيا وحابسني ليل نهار في البيت وقاعد مع مراته الاولى
وانا بافكر ااقتله وهاقتله لو فكر يرميني وكانت منهارة جدا ...يقوم عبدون المذيع اللئيم يقولهم ل(سعاد صالح وفرحات المنجي)
طيب الدكتورة سعاد صالح هاتقابلك وتجيلك...انا افتكرت ان دموعها هاتنزل واحمد عبدون هايديها كلينكس تمسح بيه مناخيرها 0اسفه قصدي دموعها
الهانم  اتخضت واتنفضت وقالت لأ ..الشيخ فرحات هوا اللي يروح وفرحات  يقولها لأ انتي يادكتورة اللي تروحي ...لأ انت.. لأ انتي
والله مافي في قلوبهم لادين ولا رحمة ...طبعا هما فاضين لواحدة بتفكر تقتل جوزها من الظلم اللي هيا فيه..
والمرة التانيه برضه كان في خراب بيت واحدة ست والعيال هايشردوا  واستنجدت بيهم بس كانت في محافظة بعيدة عن القاهرة
قعدت تتخانق الام الحنون سعاد صالح مع الدكتور صبري انت اللي تروح   اتفضل .. لأ انتي.. لأ انت ..لأ بقا انتي
ده غير بقا لما اتنين دعاة محترمين..يجوا يقعدوا جنب بعض ويفتوا في امر من الامور كل واحد براي وكل واحد بشكل ولبس ودقن
ودي ست بطرحة وواحدة بخمار واحدة لابسة جوانتي وواحدة من غير واحدة عاملة حواجبها وواحدة لا
ومش مكفيهم ضيف او اتنين لا بقوا يجيبوا 3 اه والله ملكة يوسف ذرار جنب  امينة نصير  جنب سعاد صالح
والاخيرة بالذات(اللي واقفة دايما عند باب شقتها مستنية اي برنامج يطلبها تبقى جاهزة علطول)وكل واحدة ليها راي ومافيش واحد بتدي فرصة لغيرها يتكلم
لاهي اخلاق دعاة ابدا  ..تحس 3 ستات من امبابة عامليين قعدة مسطبة ونازلين لت وعجن
دول ناس كل اللي اتعلموه قشور الدين ...سبوبة يعني ..من برنامج لبرنامج وعبي في جيبك ياواد
هنا ندوة وهنا مؤتمر وهنا برنامج وهنا انا ضيف... على خط المحمول اتصل علطول تبقى دلدول..الهاتف الإسلامي والهاتف البتنجاني...الخ
كل ده استنزاف اموال الناس باسم الدين
لأ وكنا ناقصين كمان يطلعلنا أحمد عبدون هاتف الفضفضة ..بسلامته يبقا ايه في المجتمع عشان الناس تكلمه بعد نص الليل تفضفض(ايه اللي أخششه؟)
ويقولك ايه اي حاجة مضايقاك ...كلمني وانا هارد عليك بعد 24 ساعة يعني لو واحدة عاوزة تقتل جوزها ومنهارة تتصل  تفضفض وبعد يوم  كامل يكلمها
يكون الراجل  جوزها ..الشعب بيلم جثته المتعبية في اكياس من الشوارع والأنهار والترع والمستنقعات ..
ولا واحد يائس من عيشته بيفكر في الإنتحار ومتشعلق خلاص في البلكون
يتردد شوية ..يفتكر الإعلان ..يتصل بهاتف الفضفضة ..يتكلم ويعيط ويفضفض ويستنى ..ماحدش يرد ..بعد 24 ساعة لما دكتور عبدون يرد عليه
يكون الراجل ايديه تعبت من الشعلقة ماقدرش يتحمل ويصمد ..فوقع اتفشفش ..يعني برضه انتحر غصب عن عينه
ده غير فتوى ارضاع الموظفة زميلها في العمل (الشحط يعني يرضع من الست عشان يتحرم عليها)
لأ و كمان تغير له البامبرز  (الحجم العائلي للتوفير)وتحطله البزازة في بقه بس تعبيهاله شوربة كوارع..وتجيب له سرير هزاز 7 متر
الناس دول متسلطين علينا عشان كل يومين تلاته يفرقعوا قنبلة الناس تتلهي فيها ..وينسى الشعب مصايبه ورغيف العيش ونقعد نتكلم في المسيار وخلافه
هوا الشاب ياعيني طايل يتجوز عشان نقوله مسيار ونقيم سنه النبي(ص)في تعدد الزوجات والناس مش لاقيه الطوب تاكله
يعني مافيش شيخ عنده ضمير يتكلم على ظلم الحكام والمسئولين وسرقة الشعب من الحرمية الكبار وعقابهم عند ربنا ..
والتزوير في الإنتخابات وأزمة رغيف العيش وتدهور حالنا واقتصادنا بسبب الظلم البين الواقع على الشعب
اللي فضل لنا الحواجب حلال ولا حرام ورضاع الكبير والختان والحمام ندخله بالشمال ولا اليمين  ..الخ
والله الغرب له حق يستهزأ بينا..   امتى هايكون عندنا دعاة بجد مخلصين للإسلام وبس                                                                      

كتاباتك متميزة بجد

05/29/2008

،

03:33 م

.. من قبل masryeen

..

..

من أجمل المدونات في الموقع
حقيقي انتي متميزة في كتاباتك لكي اسلوب رائع في نفس الوقت مش سهل
باضحك من قلبي في كل مدوناتك حتى ام وتلات عيال
وبرضه تناقشي فكرة هامة بتقولي رايك فيها بكتابة خفيفة رشيقة على قلوبنا...بتحدى نفسي كل مرة وانا داخل المدونة وااقول مش هاضحك ...بس ماباقدرش
عجبني السطر بتاع شوربة الكوارع

ياريت تستمري ...بجد بتخففي عنا كتير
معاكي حق ...الشيوخ اللي طلعولنا موضة هم مجرد لسان الحكومة ...لايفيدوا المسلم الإفادة الجادة بل يسببوا بلبلة احنا في غنى عنها

مدونتك في نجاح متصاعد واتوقع لها الزيادة
شكرا على الإبتسامة

محمود

شكرا للمصريين كلهم

05/29/2008

،

06:15 م

.. من قبل ameera1977

..

..

كلماتك أخجلتني

اسعد كثيرا عندما احقق غايتي في مدونتي من شد انتباه القارئ لقضيتي مع رسم الابتسامة على وجهه

شكرا لكلمات التشجيع

السلام عليكم ورحمة الله وبركاته

05/29/2008

،

06:33 م

.. من قبل AhmedAlmuslim

..

..

أحب أن أبدأ تعليقي بأن هناك شيء يضايقني جدا في تدوينتك هذه أتدرين ما هي ؟ .
إنه حرف الصاد فإنك على الرغم من كتابتك الطويلة والمسلية والمفيدة في نفس الوقت إلا أنك لا تكتبين صلى الله عليه وسلم وتختصرينها في ( ص ) فلماذا لا تكتبينها صلى الله عليه وسلم وتأخذين ثواب الصلاة على النبي صلى الله عليه وسلم وأجر كل من يقرأ المقالة فيصلي هو بدوره على النبي صلى الله عليه وسلم ؟ .

ثانيا أريد أن ألفت نظرك لشيء هام غاب عنك يا أختي وهو احترام أهل العلم والعلماء ، فيا أختي من الطبيعي جدا أن يخطئ العالم حتى وإن كان إنه يجوز إرضاع الكبير ولكن ذلك العالم الذي أفتى بذلك أخطاء ولكننا لا نحقره ولا نعتبره جاهلا فهذا لا يجوز فعله مع العلماء .

هناك من العلماء من أفتى بتحريم لبس الذهب للمرأة مثلا وهذا أمر عجيب ولكنه أخطاء ومن منا لا يخطئ ؟ ولكن نتأدب معهم ولا نسيئ الظن بهم ؟ .

أنا لا أنكر أن هناك علماء باعوا دينهم من أجل الكرسي فأفتوا بما لم يكن في الدين وهناك علماء يتعاملون مع الدين كتجارة لا تبور وتدر عليهم أرباحا .

البلبلة التي تتحدثين عنها شيء واقع وهو ليس في الدين وحسب بل في السياسة وفي المجتمع وفي كل شيء لو كنت تتفكرين فيمن حولك لأدركت ذلك ولكن ما الحل ؟ .

الحل هو أن نستعين بالله ثم بأهل العلم الثقات مثل الشيخ عطيه صقر رحمه الله ومن هم على شاكلته من أهل العلم الذين لا يخشون في الحق لومة لائم وكذلك يجب عليك أن تجمعين العديد من الكتب الدينية لتعرفي من خلالها الأحكام الشرعية والفقهية وإن كان الأفضل أن تدرسين العلم الشرعي لتتحصني به بعيدا عن الفتاوى المنسقة مع الحكومات .

أيضا أريد أن أنبهك لشيء هام جدا وهو ليس كل ما يقال عن أهل العلم والدعاة حقيقيا فهناك أكاذيب كثيرة تقال عليهم والغرض من ذلك هو ألا نحترمهم ونفقد الثقة فيهم وبالتالي نبقى جهلاء بديننا ونظن أن كل الناس منافقين فلنكن كذلك أيضا !!! .

أطلت عليك ولكن رجائي أن أكون قد أفدتك بشيء والسلام ختام

شكرا لك أخي أحمد

05/29/2008

،

07:20 م

.. من قبل ameera1977

..

..

اشكرك اخي احمد على اهتمامك بقراة المدونة وهذا شرف لي

اما بالنسبة لحرف الصاد .أعتذر وأعدك الا اكررها ومعك الحق ولو ان الله يعلم اني نطقتها ولم اكتبها

اما بخصوص دفاعك المستميت هذا عن اهل العلم
فلا افهمه أي علم هذا ...انت تدافع ياسيدي وكانك تدافع عن الاسلام نفسه

هؤلاء ليسوا حجة على الإسلام ..والله ان قلوبهم بعيدة جدا عن روح الايمان
لم اتطاول على احد منهم ...وماذكرته ليس ادعاءات بل هو اقل من الحقيقة

فويل كل الويل لمن يطلقون على انفسهم علماء دين
ويؤثرون في المسلمين هذا التاثير السلبي
فهو يضلل ولا يهدي

بخصوص عباراتك وهاهو نصها

أيضا أريد أن أنبهك لشيء هام جدا وهو ليس كل ما يقال عن أهل العلم والدعاة حقيقيا فهناك أكاذيب كثيرة تقال عليهم

تقصد ماأشرت له انا عن خالد الجندي
ايه اكاذيب التي تتحدث عنها اذا كان هو نفسه اعترف في اكثر من برنامج بزواجه هذا ومن مسيحية

بل والادهى ان رجل العلم كما تطلق انت عليه ادخل بناته
مدرسة الراهبات المسيحية
الشيوخ الذين تدافع عنهم فيهم كثيرون يتزوجون واحدة تلو الاخرى بدعوى احياء سنة النبي صلى الله عليه وسلم

هل هذا يعقل؟؟؟

انا احترم الكثيرون والذين يستحقوا الاحترام مثل الشعراوي
ومحمد حسان ومحمود المصري ووجدي غنيم وعمر عبد الكافي وكثيرون

اما من تحدثت عنهم فهم اشبه بنجوم ستار اكاديمي
هذه الحقيقة وان لم تراها بعينك فهي واضحة وضوح الشمس

حققوا اموالا طائلة نعرفها بالارقام ويسعون وراء الاضواء
الا من رحم ربي

فمن لا يحرم السجائر(الطنطاوي) ويقول ان الافراط في كل شئ حرام ولكن الاعتدال مطلوب كيف تدافع عنه

ارجوك لا تجعلهم انت في سله واحدة وتطلق عليهم اهل العلم فهؤلاء عقابهم عند ربنا ضعفين لانهم اضلونا

وشكرا لسعة صدرك

السلام عليكم ورحمة الله وبركاته

05/29/2008

،

07:51 م

.. من قبل AhmedAlmuslim

..

..

لا يا أختي أنا لا أتحدث عن كل من يظهرون على الفضائيات أنهم من أهل العلم ولم أكن أقصدهم جميعا ولكني أحدد لي ولك المبدأ العام الذي ينبغي أن يكون نهجنا وهو أن نتحرى الدقة في أقوالنا عن أهل العلم خاصة الصادقين منهم فمثلا قالوا مرة أن الشيخ محمد جبريل قد رأوه في حانة مثلا وهكذا فلا يجب أن نصدق ما يقال لأن هناك أناس تريد أن تنال من أهل العلم ودعاة المسلمين وهذا كان قصدي .

أيضا أحببت أن أنبهك لأن من أهل العلم من يخطئ مثل من أفتى بإرضاع الكبير فلا أعتقد أن الرجل الذي أفتى بذلك يريد أن يحدث بلبلة ولكنه خطأ لا يقصده وأعتقد أنه عدل عن فتواه لذا قلت علينا احترامهم لأنه من الطبيعي أن يخطئوا فليس من الائق أن نسلخ جلدهم لأنهم أخطأوا كما يفعل للأسف بعد الجهلاء أو المنافقين الآن .

أنا لا أدافع عن عالم بعينه ولكني أدافع عن المبدأ أن نحترم علمائنا ودعاتنا بصفة عامة أما الذين يفتوننا بأهوائهم أو أهواء حكوماتهم فلا أعنيهم وأسأل الله أن يكفينا شرهم وإضلالهم وفقني الله وإياك لما يحبه ويرضاه والسلام ختام

اتفق معك يا اميرة فى كل حرف

05/29/2008

،

09:17 م

.. من قبل fadiabatisha

..

..

اختى الغالية اميرة

كلامك فى منتهى الصدق

وهو حال يبكينا اكثر مما يضحكنا

القضية تحولت الى تجارة واعلانات ومصدر للرزق

الامة كلها حاليا متخبطة بين تناقض الفتاوى

وخناقات من يطلقون على انفسهم رجال الدين

تكلمتى بصدق وصراحة و ابداع كعادتك دائما

لك كل الشكر والتقدير على كتاباتك الاكثر من رائعة

فادية

بل الشكر لكي يافادية

05/30/2008

،

12:34 ص

.. من قبل ameera1977

..

..

شرف لي متابعتك الدائمة لمدونتي المتواضعة

ماتكلمت عنه ترددت كثيرا في إثارته لما له علاقة بالدين

وبعد ان تاكدت ان من اتحدث عنهم ليسوا من الدين في شئ تكلمت بصدق بحال كل من يراهم

كلنا نعرف ولا يغيب علينا الصالح فيهم والطالح ولا نجمعهم ابدا في سلة واحدة

كل ماتمنى ان اراه ان يكون العالم كما تستحق الكلمة
فيه دماثة خلق الاسلام وروح التسامح وحب مساعدة الغير ورقة القلب على المحتاجين والمساكين والتواضع لله

وكثير كثير لانراه فيمن هم على الساحة الان الا من رحم ربي دمتي بخير

تعليق بدون عنوان

05/30/2008

،

02:14 ص

.. من قبل نجلاء فتحي

..

..

أولا : مدونة رائعة وزي مابيقولوا جيتي على الوجيعة وإلى الأمام دائما
ثانيا: للأخ اللي بيقول إحتمال أخطاء العالم مع الإحترام ليهم جميعا لكن اللي بيخطأ يخطأ مره مرتين مش النهارده يقول شيء وبعد سنه أوسنتين يقول عكس اللي قاله قبل كده، وبعدين اللي يخطأ الناس العاديين مش علماء أظن إن ناس زي دول المفروض أنهم يتأكدوا من الفتوى مره وعشره قبل مايفتوا فيها والله العظيم شتتوا الناس والناس ماعادة عارفة ده صح ولا غلط وإلا كمان فاتوة الرضاعه بالذمة دي غلطة واحد عاقل ولاطفل حتى.
ثالثا: الفتاوي الجديده زي من حوالي شهر فتوى غريبة لأنها معروفة بيقولك إن تعذيب الحيوانات حرام لكن إنهم يفتوا إن التعذيب في فلسطين والعراق وحتى اللي عاملينوا حكامنا فينا وفبلدنا مش حرام ولاحد يفتح بقه بكلمة واحده مش بيتشطروا إلاعلى الناس الغلابة

شكرا نجلاء لزيارتك مدونتي المتواضعة

05/30/2008

،

02:47 ص

.. من قبل ameera1977

..

..

انا معاكي في كل الي قلتيه

نرى في زماننا هذا الأعاجيب ..الشاطر اللي يفقسهم ويبعد عن شرهم

واستفتى قلبك وان افتوك
الواحد بالفطرة في اغلب الامور بيعرف الصح من الغلط
ويحس اللي يرضي ربنا ايه

واحسن حاجة لما نشوفهم نقلب بالريموت

دمتي بكل خير

رفقا بأهل العلم

05/30/2008

،

11:15 ص

.. من قبل Ahmed Almuslim

..

..

أحب أن أوضح شيئا للأخت نجلاء وهو أنه من الممكن أن يفتي العالم بفتوى ثم يعدل عنها بعد فترة من الزمن وهذا أمر موجود ومعروف لأن العالم قد يجد في مجتمع أمورا تختلف عن مجتمع آخر مثل ما حدث مع الشافعي رحمه الله وليس ذلك لأنه يفتي بما يمليه عليه الحاكم وإنما هو يرى ذلك بنفسه وليس معنى كلامي أنه لا يوجد علماء يفتون بما تمليه عليه حكوماتهم فأنا أقر بذلك .

قالت نجلاء أن العلماء لا يجب أن يخطئوا وأن الناس العاديين هم من يخطئون وهذا كلام غير صحيح فلكل عالم خطئه وأخطائه أيضا فكل يؤخذ من قوله ويرد أي يمكن أن نرد عليه إن أخطأ ويدخل في ذلك كل العلماء بلا استثناء .

لكن لا يجب أن نهيج على من أفتى بهذه الفتيا ثم إعتذر ولم يقبل الأزهر إعتذاره وأراد معاقبته في حين أنه كان من الممكن أن يقبل إعتذار الدنمارك التي سبت النبي صلى الله عليه وسلم .

إخوتي لا تسيروا كما يسير عامة الناس فأي عالم يخطئ ولكن لا يجب أبدا أن نسلخ جلد العالم لأنه أخطأ اتقوا الله والسلام ختام

القرآن !

05/30/2008

،

08:29 م

.. من قبل lastdinner

..

..

أنا ريحت دماغي من كل الصداع ده و معنديش غير القرآن
و تفسيره لأني مش ناقص هرشه دماغ
الصاد بتاعتك واقعيه و فعّاله ونا بعمل كده في كتاباتي
أخوكي حازم

ياريت نقدر نريح دماغنا

05/30/2008

،

08:52 م

.. من قبل ameera1977

..

..

اخي حازم
نحن مطالبين بمتابعة سنة النبي عليه الصلاة والسلام
والامور التي وضحها لنا والتي لم تذكر في القران

ولذلك فنحتاج غالبا الى فتوى في امور فقهية فماذا نفعل؟

لنا الله
شكرا لك

حرية الرأي

05/31/2008

،

05:07 ص

.. من قبل نجلاء فتحي

..

..

مع الإعتذار للأخ أحمد ، أناقلت اللي بيخطأ يخطأ مره إتنين مش كل يوم والتاني أخطاء يعني غلطة الرضاعة يغلطها شيخ أزهر ، آه لو كان اللي قال الكلام ده إنسان عادي كانوا على طول قالوا عليه مجنون ولازم يدخل مستشفى المجانين فورا ،

إحنا مش هايجيمن عليهم ولا حاجه بس دي حقيقة
وبعدين مين اللي قال إننا قبلنا إعتذار الدنمارك ، على فكره اللي قبل إعتذارها المرة الأولى الشيخ القرضاوي وقال الناس إعتذرت خلاص وده كان رأيه بس فضلنا مقاطعينها .

وبالنسبة لموضوع الختان كان زمان مش حرام ودلوقت بقى حرام لما الناس اتكلموا على حالات الوفاة بقى حرام لكن أيام زمان مش حرام قال يعني زمان ماكانش فيه حالات وفاة حسبنا الله ونعمى الوكيل .

على العموم كل واحد حر في رأيه وباين عليك شيخ منهم ياريت بس تدافع بالحق ، وعلى العموم كل ده علشان يلهونا على الظلم اللي في العالم كله سواء الرضاعة ولا الدنمارك ولا أي موضوع يشغلوا الناس بيه على كل اللي بيحصل في فلسطين أو في مصر اللي حكامنا ضيعوها وباعوها ، وياريت شايفين تغيير في بلدنا بالفلوس دي بل بالعكس كل مادا وهي في النازل شويه وهنلقيهم بايعين شققنا ويقولوا علشان مصلحة مصر وفي الآخر يقولوا ضحينا بالأم والجنين علشان مصر تعيش

والسلام عليكم ورحمة الله وبركاته

أرسل تعليق
من:	*  عضو مسجل: [ دخول / التسجيل ]
* عنوان الموقع:
* البريد الإلكتروني:
الموضوع:
* النص:
* الرمز: