كركر

أزأز لب

جعان؟طب أزأز لب

مينا فينا مش بيحب اللب كلنا طبعا لزوم التسالي يعني لمة حلوة قدام التلفزيون مع فيلم يخليك تجيب اللي في بطنك لمحمد سعد
ولا قعدة رومانتيكية على الكورنيش ماتكملش من غير أزأزة اللب
وطبعا كلنا عارفين ان حكومتنا الرشيدة الجامده اوي صاحبة المخ الالمعي
حكومة الموبايلات والاتصالات (قصدي كلام نظيف عن التقدم اللي احرزته الحكومة المصرية السنة اللي فاتت بدليل ارباح
 شركات الاتصالات بالمليارات سنويا  هههههههه)ياحلاوة التقدم ياحلاوة
من الاخر ...حنية ماوردتش على الشعب ماتلاقيهاش في اي حكومة لاي شعب تاني في العالم
اسالوني ليه؟ قولتوا لي ليه
لان كل الحكومات في العالم بتدور على تلبية مطالب الشعب من غذاء وتعليم وصحة وانتاج وخلافه بس حكومتانا حكومة مزاج عالي
 احنا حاجة تانية ....من كتر الحنية بتسهر ويجافي عنيها النوم ...تفكر ازاي الشعب يتسلى يبقى لازم نزرع لب ..اه والله لب
مع تحريم زراعة القمح ...
لأن القمح بيكلف مصر جدا ماء واسمده وبيهلك التربة فاستيراده اوفر واسهل واقل تكلفة...ويعاقبوا الفلاح اللي يزرع قمح
طيب ....صدقنا الكلام وبعدين
 وصل بينا الحال دلوقتي ان نجيب رغيف العيش بالبطاقة او الرقم القومي يعني لو عيل عنده 12 سنة يفضل واقف جعان في طابور العيش
4 سنين لحد مايطلع الرقم القومي ده يكون الكشك خلص العيش
ولا واحدة ست كبيرة في السن ساقطة قيد معهاش بطاقة تموت من الجوع ولا تلف لفة صلاح السعدني في فيلم المراكبي(ساقط كيك)
بالذمة مش دي نكته احسن من نكت حماده سلطان
اسعار القمح زادت عالميا واستيراده بالغلا والكوا طيب مابنزرعش القمح ليه... حد يرد علينا ياخونا احنا مش عاجبينكم ولا ايه
هيا الحكومة دي جايه تحكمنا ولا مع نفسها وخلاص  ماحدش بيكلمنا ليه ويفهمنا ....بلاليص احناولا ايه؟
يعني دلوقتي هانغني اغنية عبد الوهاب المشهورة وغنوا معايا لو سمحتم
اللب ..الليلة الليلة ليلة عيدووووووووووو يارب تبارك تبارك وتزيدوووووووووووووو.....

 يارب تبارك يارب...يارب تبارك في اللب
يارب تبارك وتزيدوووووووووووووووووووووووووووووووووووووو تراارراااااااااااا
والسر الدفين هوا ان اللب ينتج عن زراعة البطيخ والكوسة والقرع ودول اكتر محاصيل حكومتنا بتفهم فيهم
(تفهم بس في البطيخ ومعاملاتها بالكوسةوبتقرع علينا)
أما بقى ياشباب  بعد مالحكومة الحنينة وفرت لك اللب مالكش حق تشتكي بعد كده خاااالص
تقول بطالة تقول ازمة سكن يبقى حرام عليك هوا انت مابتحمدش ربنا ابدا
مش كفاية بقينا نمرة واحد على العالم في انتاج وزراعة اللب بجميع انواعه
الاسمر والسوبر والخشب والسوري وتوفيره لكل مواطن باسعار مهاودة
بكرة ننزل الشوارع نلاقي اكشاك العيش بتبيع لب
ودي احدث الوسائل الحكومية لحل ازمة العيش لان رغيف العيش بيظهرجواه  حاجات مش ولا بد ....الحكومة بتعملها مفاجات لتسلية الشعب
قش ..عصايه... مسمار... راس فار (جمع الفار تكسب رغيفين مجانا)ده غير انه بيسبب طوابير وزحمة وخنافات
 وضرب وضغينة بين ابناء الشعب
اما اللب فيسبب توطيد الاواصر بين افراد الشعب اللي واقفين قدام الكشك يتسلوا باللب مع بعض في لقطة ود وتآلف جميلة
الحكومة هاتقول مش عاجبنكم خلاص ...يطلعوا لنا بقا القمح المتخزن من 15 سنة ابو سوس (المسرطن يعني)
اللي بيحوشوه  من ايام السادات  علشان القديم قيمته فيه برضه ....والله احنا مش عاجبنا العجب
لب نتسلى مش عاجبنا.... قمح مسرطن مش عاجبنا برضه
ده غير أزمة زراعة الذرة وأزمة عدم توفره...يعني الناس وجاعت ...
والبهايم نعمل معاهم ايه كل فلاح مربي بهيمة يخش عليها كل يوم الصبح وفي ايده قرطاس لب ويوشوشها في ودنها
(اسمر ولا ابيض)ويشغلها في التلفزيون عالم الحيوان عشان القعدة تحلو
 طب الشعب وهايأزأز والجاموسة الغلبانة دي تأزأز هيا كمان بدل الذرة والعلف
طب الحكومة ومتسلطة علينا وعلى الغلابة وحاطنا في دماغنا ياحنا ياهيا والبهايم كمان ...لا حول ولا قوة الا بالله
اما القطن اللي اشتهرنا بيه في الماضي طويييييييييييييل التيلة زي ماكنا بناخد في
سادسة ابتدائي قبل مايشلوها وبعدين سادسة بعد مارجعوها قبل مايشلوها تاني برضه وكنا بنصدره للعالم كله
سمحت لنا الحكومة بزراعة قليل من القطن بشرط انه يكون (أطوووووشة)ولفظ أطوشه معناه قصير جدا
 قصدي قصير التيلة (لان كل قصير مكير)
بجد بجد مش لاقيه حد يفهمني طب افهم ازاي
دي مؤامرة ولا ايه ...البلد مطحونة يقوموا بدل مايفكروا نزرع وننتج ..طالما احنا في ناحية العلم صفر على الشمال
نقوم نزرع لب ...هبل ده ولا ايه؟؟؟ طب مشوها خيار ...كانتالوب ..بصل ...بتنجان حتى  ة
عموما مش مهم الرغيف ...الشعب يجوع.. بس كمان القطن ؟يعني داخلين على مرحلة التعرية
طب حاجة من الإتنين ياعريان وبياكل.... ياجعان ومتغطي ..يعني بلدنا لاهيا صناعية ولا تجارية ولا زراعية امال ايه ؟؟بلدنا مهلبية
وانا بقا ربنا يستر عليا واكمل لكم المدونة الجاية
حسبي الله ونعم الوكيل

أميـــــــــــــــــــــرة بتقول كلام فـــــــــــــــــــــــــارغ

05/24/2008

،

10:13 م

.. من قبل AbouMazen

..

..

كلام فاضى كلام فارغ ....استهلاك للوقت والمجهود

نفسى الكلام مره يودى لسكه ..بدل الكلام اللى لا يودى ولا يجيب

________________

اللمضه اميرة .. حضرتك ابتديتى المقال بمصيبه كارثه

(مينا فينا ) ايه مينا اللى فينا دى ؟؟؟!!!
احنا شعب مسلم يا هانم .. قال مينا قال بطالوا دا واسمعوا دا ..

____________

مينا مينا يا أميرة .. بتلقحى على الراجل وتفكريه بمينا موحد القطرين .. الذى حكم فوحد .. وانجز ,, وعمر
ليه كدا الراجل عنده الضغط حرام عليكى يا شيخه (على راى سعيد صالح ) كشفت راسى وكنست عليكى السيده والحسين ,,,,,,,,, يا شيخه حرام عليكى

______________

الكارثه الاكبر ان حضرتك وبكل عدم احساس بالمسئوليه بتقولى

حكومتانا .......ايه يا هانم هو فيه خيار وفقوس اشمعنا يعنى حكومتانا .. وشويه شويه تقولى رحنتنا

عشنا وشوفنا

______________________

حضرتك عماله تتريقى على الدكتور احمد نظيــــــــــــــــــــــــف

وعماله تجيبى وتحطى على راس البلد اللى جه منها

عايزه ايه يعنى ؟ لا بجد مش فاهم عايزه ايه ؟
خلاص من بكره نجيب حكومه رشيد
ولا حكومه عز
ولا تكونيش طمعانا فى حكومه الشاذلى

عايزه ايه ؟ والله بتكلم جد ومش هزار طلباتك

لو انتى متصوره ان الدكتور نظيف لو مشى الامور هتتعدل لو انتى متصوره ان اى اسم من اللى طرحتهم او اللى مجوش على بالى هيفرق

اسمحلى يبقى كلامك فاضى


يا اهل الخير

دى مدونه قديمه هنشرها لعلها تفيد
اميرة حرام عليكى يا شيخه

==================
الرابط
http://aboumazen.ektob.com/65631.html

تعليق بدون عنوان

05/24/2008

،

11:50 م

.. من قبل maysaa

..

..

عارفة يا اميرة .. لما بقرأ مقالاتك او اي مقال ناقد حتى هنا في بلدنا .. بعجز عن الكلام .. بحتار فعلا .. حزن العالم بيسكني على الكل من راس الهرم لقاعدته لان المركب واحدة والمصير واحد او يمكن لاني عاجزة احدد انا فين؟؟
بتمنالك التوفيق .. واعذريني على الاطالة بس من المي

ميساء

أزأز كابوريا

05/25/2008

،

12:23 ص

.. من قبل masryeen

..

..

أميرة هانم
أتمني من حكومتنا الرشيدة تخلينا نأزأز كابوريا مش لب
و الشعب يمشي يغنى الأغنية الشهيرة لأحمد زكي
أزأز كابوريا
أنا في اللابوريا
ليلي و نهاري يا بيه
تحياتي

ليس كلاما فارغا استاذ عبد العزيز

05/25/2008

،

01:56 ص

.. من قبل ameera1977

..

..

مع احترامي لنقدك ....
تأمل ماكتبته جيدا ابومازن ستعرف انه ليس فارغا
لنا ان نلوم حكوماتنا المتعاقبة واحده تلو الاخرى طالما
ارتضوا ان يتحملوا المسئولية
وليس عيبا ان نلوم الحكومات فالعيب كل العيب ان نقول
لاداعي لان نلوم الحكومة
فهل نحن افراد نتحكم في مصائرنا? ...ابدا وانت تعلم هذا
في بلادنا العربية لامجال للتغير ولا فرصة تولد فتترك لتكبر فتغير من الاحوال ...فقط الامن المركزي والداخلية
اما انا في مدونتي تكلمت عن السياسات الخاطئة للحكومات المتعاقبة وليست الحالية فقط
فنتاج اكثر من 35 سنه ادارات خاطئة ادت لإنهيار المحصول الزراعي في مصر والتي كانت تشتهر بالقمح والقطن وخلافه.... فعلى من نلوم الشعب ام متخذي القرار
يصح قولك بلاش نلومالحكومة فقط اذا كان الشعب شريكا في القرارات
وبعدين بتقول فعل مافيش و كلام في كلام من غير مانرسى على بر
المدونات ياسيدي كلها كلام في كلام وافكار ليس اكثر
فيها متنفس لنا فلا تكمم افواهنا يكفينامن نحن فيه من قهر ...واسمح لي لا مدونتك ولا مدونتي هاتوصلنا لسكة في الأخر ....زي ماطلبت في ردك أو ستغير شيئا في وطننا
فقط دعنا نتكلم وهذا اضعف الايمان ...وليس اهدار للوقت والمجهود كما تتحدث ...وشكرا لاهتمامك بقرآة مدوناتي
اميرة

حرّر بواسطة ameera1977 في 05/25/2008 عند 02:31 ص

بس انا بحب اللب جدا

05/25/2008

،

02:35 ص

.. من قبل fadiabatisha

..

..

شوفى يا اميرة الرائعة

كلامك من الذهب الخالص

وتسلمى دائما بهذه الروح

وبكل اسف واقعنا بحاجة الى معجزة منا نحن

من شعب ساكت على القهر والتجويع

وخلينا نأكل لب

اه يا خوفى يغلوه هوكمان او يوذعوه على البطاقات

ولك اختى الحبيبة كل التحية والتقدير

فادية

تعليق بدون عنوان

05/25/2008

،

02:27 م

.. من قبل starlight

..

..

على مهلك شوية يا استاذ ابو مازن
أنت شايف ايه حلو في حكومتنا علشان تدافع عنها بالعصبية دي ؟
دا شوية وحكومتنا هي اللي هتأزأزنا وتمصمص عضمنا كمان .
معكي كل الحق يا اميرة
وبعدين مين ذكي ( اقصد العكس ) اللي قال أن القمح بيحتاج كمية كبيرة من المية ؟
مين قال أنه بيجهد التربة ؟
طول عمرنا نعرف أنه من المحاصيل اللي مابتحتجش كمية كبيرة من المية
ولا بيحتاج ظروف مناخية معينة علشان نزرعه
علشان كدا بيتزرع في معظم دول العالم في ظروف مناخية متباينة
طيب نقول ايه على الرز ؟؟ اللي بيحتاج مية تغطيه طول فترة نموه
ربنا يستر ليمنعوا زراعته هو كمان !!
والله تبقى مصيبة
ناكل طوب أحسن
تعرفي يا اميرة .. مصر والسودان كانوا لوحدهم بينتجوا أكتر من 80% من القطن طويل التيلة
اللي هو أحسن وأفضل قطن في العالم
تعالي شوفي القطن في مصر بقى عامل ازاي ؟
اقتصاد بلدنا من سيئ لأسوأ يا أميرة
والناس عايزة تعيش وخلاص
لكن حياة ايه دي مع الزل والهوان وهدر للكرامة ؟
ليه مانقمش كلنا مع بعض ونغير ؟
ليه نقف نتفرج على قلة قليلة من الناس ونشوف هيعملوا ايه ؟
نصقف لهم لو نجحوا وقدروا يغيروا .
أو نحمد ربنا أننا ماكناش معاهم لما جه الأمن المركزي وخدهم ورا الشمس
والله حاجة تفجر المرارة وترفع الضضغط
سلام يا أميرة
أنا حسة أن ضغطي ارتفع

شكرا ميساء وهدوء

05/25/2008

،

05:07 م

.. من قبل ameera1977

..

..

اشكركم على متابعة مدوناتي وتفهمكم الكامل لما اقصده فيها.....

وضحكتيني ياهدوء... وانتي بتقولي الحكومة هاتمصمصنا
هوا ده فعلا اللي ناقص

اشكر مروركم العطر
اميرة


حرّر بواسطة ameera1977 في 05/25/2008 عند 05:32 م

الفاضلة : أميرة

05/25/2008

،

07:10 م

.. من قبل AbouMazen

..

..

استاذة أميرة ..اشكرك على تعقيبك الصريح

المبنى على ثلاث اسس

مفيش فى ايدينا حاجة ، احنا هنا بنقول كلام فى كلام ، بنفضفض عن نفسنا بدل الخنقه

وايدتك الاستاذة هدوء ... بل وسألت هو انت بدافع عن الحكومة ليه وبكل الحماس ده .؟

فى حين وضعت فادية يداها على الجرح مباشرتاَ

(وبكل اسف واقعنا بحاجة الى معجزة منا نحن

من شعب ساكت على القهر والتجويع )

ســــــــــــــــــــــــاكت لا اظن انما مقضيها ازازه ودردشه

___________

هذا ردى ... وببساطه

حضرتكم لو تابعتم المقال الذى نشرت رابطه لوضحت لكم الصورة ( من وجهه نظرى طبعا ) وما اقصده من ان الحكومه مجرد واجهه لنظام سياسى قائم

اميرة انا سالتك وانت ِ مش جاوبتى .. نغير نظيف وننجيب مين من رموز الحزب الوطنى .. انا ذكرت منهم نماذج

اى حد هيجى هيكمل ما بدأه سابقوه ..لان ده فكر نظاااااااام ..

ومع هذا انا هنقل لكم المدونه هنا ...طالما الظروف لم تسمح لكم بزيارتها بالامس !!!
_________________________________

(1) الحزب الحاكم
(2)السيد السكندرى صديق قديم كتبت له هذا الرد فواق ما قالته الاستاذه اميره


**********************

يا ايها الناس لا تستمعوا لمن يلوم الحكومه

إِنه يلوم حكومة نَظيف ، يقول_ من تحت لتحت _ انتم خربتم البلد

ان تلك الطريقه فى عرض الامور تخدم السيد / النظام (1)القائم فى مصر ، منذ سنوات مضت ونحن نسمع عن الاصلاح الاقتصادى ....(هنبيع البلد )
بس مردود ده عليكم رخاء ومش ليكم وحدكم _لا_ بل لاولادكم واحفادكم !!!!!!

احفادنا احنا برضوا يا ظلمه ؟ !!!!!!!!!

يا ناس ما كتبه السكندرى (2) يُحمل فيه (نظيف) كل الكوارث من معاهده معسكر ديف الى غلاء البيضه (الواحده ) (45-75) قرش

يا ناس ........ ان اى وزير فى هذا الوطن يعمل وفقا لتوجيهات النظام (بناء على توجيهات السيد/النظام )

منذحكومه السيد/ عاطف صدقى ، كمال الجنزورى ، عاطف عبيد ، احمد نظيف .

من من هؤلاء مسؤول ؟ ، من منهم استطاع يوما ان يكون له وجهه نظر وراى
كل هؤلاء وغيرهم من اطراف النظام
حتى الطبيب
يخرج بعد اجراء عمليه قيصرية ناجحة ،
فيقف ويصرح .... العملية نجحت والام بخير ........حسب توجيهات السيد / النظام .
_________

ما افهمه . ان لهذا البلد حكومه ، فاذا كانت تلك الحكومه _تعين _ من اختيار السيد /النظام
وتعمل حسب توجهاته وتنفذ افكاره وخططه ومشروعاته
عملا بمبداء (زكى قدرة )
فاذا البلد غرقت فى الغلاء والفساد والرشوه وضياع الديمقراطيه ومحاربه كل معارض
فهنا لابد ان نشير باصابع الاتهام الى السيد (النظام )
وليس للحكومة يا اميرة ... ليس دفاعا عن الحكومه ولكن معرفه الداء تودى الى معرفه الدواء


حرّر بواسطة AbouMazen في 05/26/2008 عند 07:49 م

أميرة...دائما

05/26/2008

،

05:50 م

.. من قبل Anonymous

..

..

والله لاأدري كيف ترددت في كتابة تعليقي..
مباشرة بعد اللحظات الممتعةالتي قضيتها مع اللب برغم عنف المأساة التي تثيرينها...انحدرت نزولا كي احتفي تعليقابما كتبت..
أوقفني تعليق أبومازن وكان تعليقا قاسيا إلا أنه يحمل اسئلة تحجبها الضحكة الصافية التي ارتسمت ،
ونحن لانسأل كي لانحزن.
وأردت أن أعلق على بعض ماكتب، فوجدت هدوء تأخذ الكلمة..
وقلت في نفسي بعدما وجدت اللهجة المصرية هي المسيطرة:
إنها قضية داخلية وشأن محلي...
وترددت..
وباختصار أنت تحفة في كتابة المونولوج الساخر...
أقرأك وأنا أستحضر أي وجه كوميدي فأضحك واصفق.

عظمة على عظمة ياست!

أنا المُعلق أعلاه

05/26/2008

،

07:35 م

.. من قبل mounirbahi

..

..

لم أنتبه الى أني اكتب التعليق أعلاه باسم مجهول ...
تقبلي اعتذاري ..

العظمة فقط لشاعرنا العظيم

05/26/2008

،

07:54 م

.. من قبل ameera1977

..

..

استاذنا الكبير شرف لاي مدون ان تزور مدونته وتدخل تقرا كلماته لتنيرنا بارائك السديدة
وبعد كل هذا تتردد في كتابة تعليق ...فقط لانه شان داخلي ...لا تحرمنا استاذ باهي من كلماتك وارائك
فهي جديرة بان نقف عندها ونتأملها جيدا فانت استاذنا الكبير ذو خبرة وثقافة ينطق بهما شعرك ...فلا تتردد ابدا في مناقشتنا ابدا في امر من الامور
كلنا اخوه عرب ...ومايضيق به صدرنا يشعر به اخوان لنا في بلاد شقيقة حبيبة لقلوبنا

وعموما استاذ باهي لقد تعرفت على شخصيتك من روعة كلماتك في التعليق حتى وان نسيت كتابة اسمكم الكريم
وشكرا

دمتي يافادية بخير

05/26/2008

،

10:17 م

.. من قبل ameera1977

..

..

عذرا يافادية في تاخيري في الرد عليكي

اديكي ياستي شايفة الهجوم الكاسح من ابو مازن

المهم ان انتي قلقتيني بجد ممكن اللب يغلى طب وساعتها الحل ايه

اميرة

أضحك الله سنك

05/27/2008

،

04:11 ص

.. من قبل AbouMazen

..

..

ياه ...ياه يا أميرة

هجوم ابو مازن الكاسح ..!!!

يا أميرة هو هجوم وقد يكون كاسح ...لكن لمين وضدد مين ؟

اياكى تظنى انه هجوم على شخصك ...فانتِ لكى كل التقدير والاحترام والمحبه والتبجيل ...مش كلام مذوق ولا كلام مجاملات ، يمكن مبعرفش اقول الكلام الجميل مثل الاصدقاء الافاضل من اعضاء المدونات .. لكن كلامك سلوك من ذهب .. ودائما ما رسمتى على جدار القلب قبل الشفاه بسمه بطعم الرقه والشفافية
وللعلم انا لا اجامل في ..الوطن والادب

لهذا واكثر منه يعز عليا جدا جدا جدا ان تظنى انه هجوم كاسح ضددك

لكنة وببساطه احب ان اسمى الاشياء باسمائها .. هجومك على الحكومه يصلح فى النرويج ..حيث تداول السلطه .. تذهب الحكومه وتاتى اخرى بفكر وسياسه ومنطق وحلول ..انما نحن فى زمن الفراعين

نحيى زمن شالوا الضوا حطوا شاهين ...قالتها فادية بكل الوضوح الشعب الساكت .. الساكت على الظلم والجور
الى متى يا اميرة ..هذا السؤال اجابته ليست عندى ولا عندك

لكن فلنتفق انه لن ياتى المغاربه مثلا لحل مشاكلنا مع الحزب الحاكم فى مصر ...لن يحدث هذا !!
انه اما ان نقوم نحن بحل المشكله ومواجهه الامر بواقعيه

وتانى لا نظيف ولا حكومه نظيف ولا الف حكومه غيرها سوف تصنع غير ما تراه القيادات العليا والسيد النظام

فى ناس فى مصر ترى انه افضل من غيره ، فى الشارع بيقولوا دا شبع (يقصدوا النظام ) اللى هيجى بعده هيمصمص فينا حتى النخاع ، وكانه كتب علينا الاستكانه

صديقى الاستاذ مصريين رد على موضوعك هذا فى المدونه عندى

حيث علق سيادته على المقال (بفكاهه المصرين المعهوده ) قائلا اوووووووعى يكون قصدك اللى بالى بالك (مشيرا الى الرئيس مبارك ) واعقب قائلا انا عندى عيال عايز اربيهم خلينى ماشى جو الحيط
ورغم علمى التام انه يمزح لا اكثر

الا انى كتبت قائلا
تبقى مصيبه ان احنا نربى اولادنا على السير جانب الحيط وجو الحيط وتحت الحيط

ولحد امته ،،،،،،،،،

قال الشاعر

((حد ضامن يمشى امن او مأمن يمشى فين ))
واشهد ان لا اله الا الله


طالما اسعدنى وجودى ضمن مريدى مدونتك الجميلة ... لكن ما باليد حيلة
اشكر لكى سعه صدرك والى لقاء

حرّر بواسطة ameera1977 في 05/28/2008 عند 07:12 ص

http://multqa.net/

07/ 8/2008

،

07:23 ص

.. من قبل Anonymous

..

..

http://multqa.net/

أرسل تعليق
من:	*  عضو مسجل: [ دخول / التسجيل ]
* عنوان الموقع:
* البريد الإلكتروني:
الموضوع:
* النص:
* الرمز: