كركر

انت اللي غلطان مش تخلي بالك

انت اللي غلطان

في وطننا الحبيب وحكومتنا اللي مش حبيبة وكل الحكومات اللي فاتت واياك ماعاد يعودها تاني ....واللي جاية مين دايما اللي غلطان ؟؟؟...
احنا الشعب ؟؟ولا المسئولين اللي مش مسئولين من اساسه عن اي شئ؟؟
القطار اللي اتحرق وكان زي علبة السردين المقفولة وحرق ميات من الغلابة غلطة مين...
مش اللي كان بيعمل شاي وقهوة  على وابور في القطر وسواق القطر المجنون اللي ادار الازمة غلط
طيب والعبارة اللي غرقت وقتلت اكتر من الف روح غلطة مين
مش القبطان اللي ادار الازمة غلط وحسب التقرير أهمل في شراء الجرادل لنزح المياه من العبارة ....لكن ممدوح اسماعيل واللي بالي بالكم ..مساكين ياولداه ماكانوش يعرفوا ان الناس
عامالة تغرق ساعة ورا ساعة لحد مافات يوم بحاله...لازم برضه نعذرهم اصلهم كانوا قافلين الموبايل ونايمين ننا زي الملايكة اللي بقرون
ماشفتوش  المنافق مفيد فوزي لما عمل مقابلة وحوار مع ممدوح اسماعيل في لندن وكان هايخلينا نعيط لما قعد يحكي عن حالته الصحية
وانه في رحلةعلاج في لندن مش هربان ....وانه حتى مش هايقدر يتكلم ويجاوب على الاسئلة الا بصعوبه ياعيني وقعدنا عيطنا تلات نقط من عينينا لحد ماورمت من التاثر
وبعدها يجيبوه وهوا زي فحل الجاموس صحته بمب احسن من صحة البغال ...ودم الشهدا ملطخ بقه القذر
حتى رئيس حي شبرا الخيمة اللي غرقت في مياة المجارى....الناس راحت له يشتكوا ... قالهم خلي العيال تبلبط
ياراجل اتقي الله حرام على كرشك المنفوخ المدلدل ده
يعني نفسي اشوفك انت والمدام والعيال نازلين مع الشعب تبلبطوا في المجاري ويارب يارب كل اللي في بالي من خيرات جوه المجاري
وخصوصا حالات الإسهال الحاد .يلاقي طريقه لبقك الحلو اللي بينقط سكر
اما حادثة حريق مسرح ثقافة بني سويف فهو غلطة اللي كان ماسك الشمعة وهيا والعة من غير مايحط في جيبه ازازة مياه صغيرة يطفي بيها نتيجة عمايله
لكن الغلطان هوا مدير المسرح والموظف الغلبان اللي مسئول عن الصيانة ..مش وكيل الوزارةولا ياحبة عيني وزير الثقافة...اللي قدم استقالته
 في حركة كوميدية لحسني مبارك وكل ماحسني مبارك يمد ايده ياخد ورقة  الاستقالة يقوم الوزير يخطف الورقة تاني ورجع في كلامه تاني يوم الصبح
بعد ماقال اشمعنا يوسف والي قعد 75 سنة وزير ده انا حته لسه نونا وصغير عنه ...امال أسوق لوحاتي الفشيكيلية ازاي
عموما ده عقابه عند ربنا واحد يكون احول ويوقفوا روقة ده جنب لوحة من لوحاته ونقول للاحول نشن بالرصاصة على اللوحة
وانتوا عارفين الباقي بقا ماهواحول ....
اما المواطن الظالم البمبوطي الصياد السويسي اللي اتقتل في قناة السويس برصاص بارجة امريكية بحرية هوا برضة اللي طلع غلطان
ازاي ازاي يقرب من الاله المقدس ويوصل لبعد 200 متر بس .....مش برضة كان يخلي باله ويبطل عمايل الإرهاب دي
يعني مطلوب من الناس الصيادين الغلابة يمشوا في قناة السويس وهما رافعين اعلام بيضا مكتوب عليها تحيا امريكا وكوندا ليفة بايظ ...ويسقط بن لادن والظواهري و الرازي والجبرتي بالمرة
اما الشرطة واللي بتعمله في الشعب ...غلطة مييييييييين؟؟
فكلنا عارفين طبعا ان المواطن اللي اتحرق في قسم الشرطة هوا اللي غلطان ..هوا اللي كب الجاز على نفسه لانه كان يائس من رحمة ربنا
بس بقا واحد فتك يقول طب واشمعنا يعمل كده في قسم البوليس ...ااقولة لان الشربة في خربة الشعب
والمواطن اللي وقع من البلكونة ده هوا اللي غلطان لانه هوا اللي جري من الخوف... بس حسب التقرير زود السرعة شوية
فوقع من البلكونة قدام عياله ومراته ....الظابط مالوش دعوة ولا جوز الخيل اللي بيسموهم سفاء شرطة ...حتى غلا بة وعلى نياتهم
ويتحطوا عالجرح يولع
وهانفضل للابد ....مين اللي غلطان ؟؟؟؟ طبعا انت
اما المسئولين يعملون بنظام  الاقربون اولى بالمعروف... فهما شغلتهم طبعا يراعو مصالح بيتهم وعيالهم اولا.. مش انت ياغلبان هوا انت تقربله ايه
...يعني المسئول يخش على الكرسي تلاقيه حلو وسمبتيك... شوية بشوية تلاقيه عمال يتلغم  ويبقلظ ويتنفخ .وكرشه يكبريكبر يكبر....
لحد ماينهج ياعيني من كتر المسئوليه اللي شايلها في جيوبه ...اسفه قصدي على اكتافه

وحسبنا الله ونعم الوكيل

احنا اسفين ياحكومتنا الرشيدة

05/23/2008

،

09:34 م

.. من قبل fadiabatisha

..

..

صح يا اميرة احنا اللى غلطانين والغلط راكبنا

مين قالنا نركب هذا القطار , والطائرات عملوها لمين

ثم زعلانين ليه من ممدوح اسماعيل , ده الراجل نقل 1000 شهيد للجنة مرة واحدة , ومخدش كلمة شكر

ثم انت نسيتى كلام احمد نظيف اننا شعب لم ينضج بعد...

يعنى هذه الحرائق كانت اثناء طبخ الشعب ليصل الى النضج...

وحتى فاروق حسنى الوزير الفنان اللى مضحى بفنه ومش عاجب ..

فيها ايه يعنى لما المسرح يتحرق ....ما الاوبرا اتحرقت وبعدين التيار السلفى بيحرم الفن ..

علشان تعرفوا ان وزير الثقافة بيفهم فى الدين...

مرة ثانية اكتب بالاصالة عن نفسى وبالنيابة عن شعب مصر((( الذى لم يختارنى ))) اشمعنى انا يعنى!

احنا اسفين يا حكومة وربنا يريحكم مننا كلنا

ودمتى يا احلى اميرة بألف خير

فادية

حرّر بواسطة fadiabatisha في 05/24/2008 عند 12:49 ص

تعليقك يافادية مدونة بجد

05/23/2008

،

11:33 م

.. من قبل ameera1977

..

..

كم هو تعليق جميل اجمل مم كتبه قلمي انا
وشكرا لكي على متابعتي باستمرار وتشجيعي

أميرة

بل كل الشكر لك ولروحك الرائعة

05/24/2008

،

12:47 ص

.. من قبل fadiabatisha

..

..

اميرة الغالية

بدون اى مجاملات بالفعل كتابتك اكثر من رائعة

تمنحنا ضحكة وفكر وعمق

ربنا يبارك فيك وفى اولادك

ودائما فى انتظار كتاباتك المتميزة

فادية

حرّر بواسطة fadiabatisha في 05/24/2008 عند 12:48 ص

الشعب خطاء لأن الحاكم لا يخطئ

05/24/2008

،

05:08 ص

.. من قبل mounirbahi

..

..

أبدعت يا أميرة
كوميديا ساخرة سوداء هي مزيج من كتابات فؤاد نجم والماغوط.
..............
عرفت بعض الأحداث والشخصيات وغاب عني البعض الآخر.
فقط أضيف بأن تحميل الشعب أخطاء الحاكم العربي مسالة طبيعية.
أذكري لي حاكما عربيا واحدا من الملوك الى الامراء الى الرؤساء الخالدين من لايردد تلفزيونه الرسمي بأنه القائد المفكر العبقري المعلم الأب ووحيد القرن أقصد 100سنة طبعا.
كما الأب التقليدي الذي لايرضى بأن يظهر بليدا وضعيفا أمام أبنائه الصغار،تراه يراجع مع ابنه الفرنسية بالصراخ والتوبيخ و هو لايفهم حرفا فيها.
وكما المعلم التقليدي الذي لايرضى بأن يقول لا أعرف إذا أعجزه تلميذ بسؤال،فيلتف ويتاتئ ويغير الموضوع.
الحاكم لايخطئ،وسأحكي لك حكاية كشاهد:
خرج مرة احد الملوك في رحلة صيد،وكان الخدم يضعون الطريدة أمام الملك ويهتفو ن:
سيصيبها سيدنا.
طااااخ
أصابها سيدنا
وهكذا كلما أصاب طريدة يهتفون بنشوة واكبار:
أصابها سيدنا
إلا أن الطريدة الأخيرة عندما هتف الخدم:سيصيبها سيدنا
أطلق الملك النار فأخطأها وهربت،فارتبك الخدم ولم يعرفوا ماهم فاعلين ،حتى وجد كبيرهم الحل وصاح:
عفا عنها سيدنا.

فهمت أيتها السيدة المبدعة النبيلة؟
الحاكم العربي لا يخطئ ابدا.
تقديري العميق

فهمت القصة ياستاذ باهي

05/24/2008

،

04:49 م

.. من قبل ameera1977

..

..

فهمتها وأعيها جيدا
فحكامنا العرب افضل في الحقيقة من انبياء اخطئوا من قبل
لانه لم يذكر ان حاكما عربيا اخطأ في حياته ابدا

اما المظلوم فسيظل مقهورا مخطئا تحت وطاة الظلم يعاني

رغم ملاحاظاتي التي لاتنتهي على العالم الغربي الا انهم يستحقوا ماهم فيه من حضارة وتقدم
لان الامر عندهم يسند لاهله بحق ولا ظلم بين المراطنين
اما الحاكم هناك يخطئ ويجد من يحاسبه
لكنا نحن العرب نستحق لفظة دول العالم الثالث

فالمظلوم لا ينتصر والظالم لا يعاقب

شكرا لاهتمامك ومرورك الكريم

ماشي !

05/24/2008

،

05:25 م

.. من قبل lastdinner

..

..

ماشي الحكومه وحشه لكن الشعب أخباره إيه؟
مش الحكومه دي من الشعب ؟ ولا من فنلندا ؟؟
وو لو جت حكومه تانيه و تالته و رابع و عاشره مش تعمل كده برضه؟
سلميلي عل الشعب
أخوكي حازم

أرسل تعليق
من:	*  عضو مسجل: [ دخول / التسجيل ]
* عنوان الموقع:
* البريد الإلكتروني:
الموضوع:
* النص:
* الرمز: