كركر

انت ياعم بص عالموبايل

بعد ماالناس ضحكت وفرفشت مع حلقتين مواصلتك لجهنم .نكمل بقى في أحوال شعبنا ..تعبان ومطحون صح؟ الاغلبية هيا الفقرا صح؟الناس مش لاقيه العيش الحاف صح؟ مش مكفيين بيوتنا عيش وزيت وسكر مش اللحمة
أمال نفسر بايه ظاهرة الكماليات اللي بقت موجودة في اغلب البيوت
الكل عنده دش ورسيفر الكل معاه موبايل (خط ولا كارت مش مهم بس المهم فترة السماح عشان نفضل نرن لبعطينا )المهم لازم يكون فيه موبايل
الراجل وعيلته ممكن يبقوا فقرا دقه والفقر داقق عضمهم وتلاقي الراجل شايل موبايل
والست ليها موبايل والواد الزبلة هوا كمان ليه موبايل
والموبايل ايه لازم لازم حسب احدث خطوط الموطة في تيمور الشرقية يبقى في الايد
تلاقي الراجل بنطلونه مليان جيوب وفاضية ... بس فرحان اوي وشايل الموبايل في ايده عشان الكل يقول الاستاذ عجمية معاه موبايل
الست شنطتها فيها كل غالي ونفيس بس الموبايل لازم يبقى في الايد ومدلدل منه سلسلة حرف (إع)لزوم الروشنة
وتلاقي الراجل بيشتغل موظف غلبان والعفن مالي حياته... وفي ايده موبايل حديث
هوا من البيت للشغل ومن الشغل للبيت... طب ماهو أساسا مكتبه عليه تليفون عشان مراته لو احتاجته ..وياختي خايفة عليه اوي لايطير.. هايروح فين يعني 
بس قال من كتر الحب ماهو مقطع بعضه بين المتجوزين الراجل معاه موبايل يرن للست والست ترن له .ولو الشحن خلص تبقى مصيبة الراجل يلف حوالين نفسه والنبي ياعم ماعندكش شاحن اصل الشحن خلص (يادي المصيبة بقى شرطة واحدة .. واحدة بس هاعمل ايه ياربي)قال يعني مستني مكالمة من احمد شوبير
ايوه ياحبيبتي انا في السوق اجيبلكم طماطم.. بس ده الكيلو بخمسه  جنيه خلاص بلاش بلاش...طب في هنا فراخ بس الكيلو ب12 جنيه ..بلاش بلاش طب خلاص ياحبيبتي .اقفلي انا في السكة اهوا وحضرلنا الطوب بقى اللي هاناكله على الغدا
يكون صرف في الموبايل 5جنيه اللي كان هايشتري بيهم الخضار
ونادر ان حد يشيل موبايل عشان يتكلم فيه ..كلهم شايلينه عشان يسمعوا الرنة ورنتك باسم حضرتك ..وفلوس بتتصرعالفاضي بتكلف شعبنا ملايين كل شهر تقع في الاخر في حجر بتوع فودافون (اقوى شبكة صيد في مصر)وموبينيل (رن من القلب)
والست كل مشاوريها الطشط المخروم اللي في الحمام و الحلة المصدية اللي في المطبخ
يعني كل الناس دول ماهماش بسبس مان ولا وزرا ولا دكاترة ممكن يجيلهم حالة طارئة البت تبقى في الكليه وراجعة بيتها وتقور لامها وهيا في التاكسي خلاص ياماما انا في التاكسي قدامي 5 دقايق ماتقلقيش ياحبيبتي
وتطلع على سلم البيت وتقول ايوه ياماما انا على السلم اهو
وامها تقولها (في الموبايل) وانا على الباب اهو ياحبيبتي (واساسا هما سامعين بعض من المنور)مش من الموبايل ..وانا ياماما قربت على الباب..وانا ياحبيبتي بافتح اهو... يتقابلوا وهما لسه فاتحيين الموبايلات {أحممممممممممممممممممد منىىىىىىىىىىىىى آسفة آسفة اصل اتلخبطت شوية .....ماماااااااااااا بنتي حبيتيييييييييييييييييييييي هييييييييييييييييييييييييييييييييه ...حمدالله على السلامة}
لا وايه ...مش مكفيهم ان كل ناموسة في بيتهم معها الموبايل..لازم يتغير كل سنه يبقى الراجل مش مكفي اهله... وابنه قاعد عواطلي يمضغ في لبان واخته فاتها القطر بسبب حالتنا الاقتصادية المعفنة ويقولوا لابوهم ايه:الموبايل ده بقى شكله فضيحة خالص ده انا باتكسف يابابا اطلعه قدام الناس لازم تغيره وتجيبلي ابو كاميرا
قال يعني هايصوروا الأمله.. البيت معفن والشوارع مليانة زبالة (أصل الحكومة ماعندهاش مكان تشيل فيه الزبالة فابتحوشها عند الشعب أمانة يعني) ومافيش فلوس
لرحلات جامدة لشارم او الغردقة يبقى هاتصوري ايه .والنبي الناس اتهفت في مخها
تلاقي واحد صعيدي في الشارع شايل موبايل لابس الجلباية ويقولك ايه ...وممكن مابيعرفش يقرا ولا يكتب ..الموبايل ده بكاميرا ويجدر ينجل ملفاااات من الكامبيوطر للموبايل وينجل ملفات من الموبايل للكامبيوطر و كمان رنات مجسمة وعطش الجيم)وحاطط عيله اليييساه ونانسي عشرم وبيصور فيتيو 60 دجيجة يابوووووووى
ورنتك بقى باسم حضرتك ولا رنة كابيل(couple)يعني باسم الواد والبت بتاعته
الموبايل يبقى احدث نوع (بخ95 )ولا الدمعة الحارقة ولا ترباتاتو..وصاحبه
 قميصه مأيح وبنطلونه مخروم من ورا وجزمته بيطل منها الشراب يتفرج على الدنيا الحلوة
وده يقول للي جنبه والنبي رصيدي خلصان... ماتحولي 5 جنيه وانا ابقى ارن لك
وكمثال عملي على التفاهة في استخدامنا للتكنولوبيا الحديثة ..احكيلكم حكاية شفتها
كنا راكبين باص مسافر على الطريق السريع وركبت جنبي واحدة شكلها على قد حالها
شوية وسمعت موبايل بيرن اتاريها شايلة موبايل..ردت على التليفون ..ايوه ياصاليييييح(صالح يعني)بصوت عالي يخرم الودان تقولش صالح ده في برلين
ايوه ياصالييييييح انت نمت ؟...طب عامل ايه دلوقتي ...كويس؟؟طب الحمد لله خد الدوا ماتنساش ياصاااااالييييييح
وتقفل ...دقيقتين والموبايل يرن تااني ...ايوه ياصااااااالييييييييح..ليه كده؟
طب إيس درجة حرارتك وقولي ...تقفل شوية والتليفون يرن تاااااني وترد بصوت عاااااااااالي ايوه ياصااااالييييييح انت سامعني ...كام الحرارة ..طب كويس نام بقى وادفى كويس عشان تعرق ياصااااااااليييييح
 اللي في الباص حمدوا ربنا . صالح هاينام ونستريح كلنا اللي ينام شويه واللي يهدي اعصابه من صالح ومراته
وانا ااقول ياربي صالح ده ايه اللي طلعلنا في ورقة البخت ..لما صالح متنيل  كده سايباه وقرفانا احنا ليه بس
دقيقتين...ورن الموبايل تاااني ..ترد ايوه ياصااااليييح مانمتش؟؟؟طيب عندك مضاد حيوي في التلاجة كويس اوي اسمه اموكسي خد منه ياصااااليييح مع السلامة
كلنا عماليين ننفخ ودماغنا وجعتنا من الست دي وصالح بتاعها
شوية والموبايل رن تاااني  والناس تستغفرربنا وصابرين...ترد بصوت عاااااالي ..ايوه ياصاااااليييييييح عندك في التلاجة صنيية البطاطس اللي انا عاملها .سخن ياصالييييييييح وكل انت والعيال
خلاص احنا قربنا ياصاااليييييييح فاضل 10 دقايق واكون عندكم
قلنا خلاص بقى الحمد لله اديها رايحة له وهانستريح منهم هما الاتنين
مافيش دقيقة والموبايل رن تاني قام واحد شاب من اللي قاعدين خاطف منها التليفون وفتحه وقال: جرى ايه ياصاااالييييح انت .هوا انت مش عيان يأخي ماتخش تنام وتريحنا وبطل كلام في الموبايل بقى
كل اللي في الباص قعدوا يضحكوا والست قفلت الموبايل بعد ماتكسفت من نفسها
مش برضه بلدنا فيها حاجات اهم نتشغل بيها غير الموبايل والرنات
بالذمة ايه التفاهة اللي بقينا فيها دي
احنا شعبنا كان عنده حضارة في تفكيره وتصرفاته ايه اللي جرا ياهل ترى؟؟

ما شاء الله يا اميرة

05/22/2008

،

01:26 ص

.. من قبل fadiabatisha

..

..

اختى الحبيبة اميرة

ماشاء الله روعة كتابتك اكثر من رائعة

صادقة فى كل حرف

تنقلين واقعاً كلنا عايشين فيه

تفاهة صبغت حياتنا , عبرت عنها بمنتهى خفة الظل

يارب يبارك فيكى ويسعدك

ودمتى بألف خير

فادية

رائئئئئئئئئئئئئئئئئئئئئئئئئئئئئئئعة

05/22/2008

،

01:42 ص

.. من قبل masryeen

..

..

بجد موضوعاتك مليئة بالابتسام و البهجة رغم مرارة الواقع المحكي فيها
اتذكر حين أقرأ لك العملاق يوسف عوف ببرامجه الاذاعية الكوميدية اللاذعة للواقع ( مثل : مين بيضحك علي مين )
اتساماتنا تنتظر مدونتك دوما كي ننسي معها الواقع
ولكي تحياتي

مساء الفل.. بكتب هنا لان الرصيد خلص

05/22/2008

،

01:43 ص

.. من قبل AbouMazen

..

..

الموبايل ..!!

الموبايل قصة وحدوته اكبر من صالح ومراته اللى راكبة(الباص) ..

الموبايل اللى انا عندى منه اتنين ... واحد للعمل ..ماركة قديمة عليها القيمة ... عشان لو وقع فى ستين داهيه

وواحد بكامرتان علشان المناسبات ..

اول مرة اشوف الموبايل كان سنه 1998 وانا يومها استغربت .. انت يا اخى شارى البتاع ده ليه ، اذا كان محدش من اللى نعرفهم معاه واحد يبقى انت شايله ليه
ايامها كان ثمنه يجى ثلاث اربع الف جنيه

لكن خلاص زمن البراءه ولا وفات

___________________

الموبايل ... يعنى اعلانات وعروض وفنون تسوقيه
حاجه كدا زى اللى بيبيع الهوا فى ازايز

تعرفى وبدون مبالغه ان اغلب المشكله الاقتصادية اللى بتمر بها مصر سببها الموبايل

عندك مثلا ً انا عندى موبايل والمدام كذالك انا بتكلم كتير والمدام بترن وبس

وطبعا انا قلبى مش بيطاوعنى اسيبها ترن فأتصل انا

وكتير اسال نفسى هو قبل 98 كنا عايشين ازاى من غيره
فعلا لو الشحن خلص او الرصيد نفذ تبقى مشكله
مش علشان احمد شوبير لا والله .. لكن انا واحد من الناس .. وجدت انه مهم فاشتريته ..الايقاع صار اسرع من ان يتحمل تأخر فى الاتصال او الانتظار لاقرب كابينه

كان ممكن دلوقتى اايدك على طول الخط لكن حبيت الاول اقول انى لا الوم الناس كم فعلتى فانا منهم

_________

المأساه الكبرى للموبايل على الاقتصاد المصرى

1 - فى المتوسط يدفع الفرد من 78 مليون نسمه
حوالى 50 شهريا ً مضروبه فى 30 مليون نسمه (يحملون موبايل كاخر احصائيه ) يساوى 15,000,000,000

2- خمسه عشر مليار جنية ...ربنا يذيد ويبارك
هذه الخمسه عشر مليار ...حُرم منها السوق الاقتصادى فى مصر لانها وببساطه ذهبت من حوزه الناس الى حوزه شخص او مجموعه اشخاص

فى حين ان مسارها الطبيعى .. كان الشراء من المحال التجاريه .. او العقاريه وخلافه

فاذا كان المواطن سوف يذهب هذا الشهر لشراء قميص بمبلغ الخمسين جنيه

فهناك محل وبالمحل تاجر وبياع وعامل نظافه

وهذا المحل سوف يشترى بضاعته من مصنع وبالمصنع ماكينه وخمسه صناع

ويستخدمون سياره للنقل بها سائق وتباع

يشترون قطع غيار للسياره الخ

لما تغير مسار الخمسه عشر مليار لتذهب الى اصحاب شركات المحمول

توقف المواطن عن شراء القميص واكتفى التاجر بنفسه بعد فصله للعامل والبائع

وقله الكميه المطلوبه من المصنع فقل النقل وهكذا فى كل اوجه الحياه ومناحيها .

والحل عندى ليس فى ترك الموبايل تماما فهذا لم يعد ممكننا ولكن دعوتى الى الترشبد فى استخدامتها
والبداء فى حمله توعيه مضاده للاعلانات و فنون التسويق

وللدوله الحق فى دفع اصحاب شركات المحمول (نصير وساويرس ) لضخ تلك الاموال فى السوق مرة اخرى فى هئيه استثمارات صناعيه وتجارية
بدلا من خروجها للخارج كاستثمارات خارجية
_________________

ناخد نفس ونرجع لصالح

زمان زمان فى الاربعينيات كان هنا شخص يدعى يحى الحسينى ..كان يعيش واهله فى قريتنا وكان لاهل القريه بمثابه جحا الذى لا تنقطع نوادره

خرج يحيى الحسينى راكبا دابته متجها الى احدى القرى المجاوره ..فهو وبلا فخر كان المسئول عن (تزين ) وتهذيب شعر اهل القريه وما فى زمامها من كفور وعزب

ركب دابته وحمل الشطنه (المنفاخ ) التى تحتوى على عده واداواته

وفى الطريق ناده صالح ودار الحوار

يحيى يركب حماره سائرا بمحازه الترعه متجها الى احدى العزب المنتشره حول القرية
صالح يجلس فى ارضه المزروعه بالبرسيم

ينادى يا يحيى يا يحيى ويشر اليه بالتحيه
انت رايح العزبه .. وفيرد عليه ......ايوه تأمرنى بحاجه ابلغها للعيال

وهنا يقوم صالح ذاهبا اليه ممسكا بحبل الدابه

وهو يشكر يحيى ويقول
تعالى احلقلى قبل ما تروح العزبه لانى لن الحق بك فانا لا اغادر الارض قبل المغرب ووقتها تكون انت قد عدت ولن استطيع حلق شعر راسى هذا الاسبوع

يقتنع يحيى ويقرر ان يحلق لصالح راسه سريعا
ينزل من على الدابه , يفرش الغبيط ( شوال كبير من الخيش ) يجلس صالح ومن خلفه يركز يحيى على ركبتاه معاملا شعر الراس بحرفيه ومهاره

ويثرثر كما هى عادته ذاكرا هذا وهذه من الناس حتى يقاطعه صالح بسؤال

قوللى يا يحيى ان مات الحمار يحيى ؟
فيبتسم يحيى وهو يلكزه فى كتفه
ايوه يا صالح ان كان الحمار صالح !!!

هههههههههههه يضحكان ويصل ضحكهم الى القريه والعزبه والعزب المجاوره نادره يتندر بها الناس الى يومنا هذا ..انتشرت وحفظناها كابرا عن كابر
دون موبايل ولا يحزنون

عذرا اثقلت عليكِ بالكتابة هنا بس اعمل ايه قد نفذ رصيدنا



حرّر بواسطة ameera1977 في 05/22/2008 عند 09:50 ص

صباح الخير يا أميرة

05/22/2008

،

02:08 م

.. من قبل starlight

..

..

بحبك يا أحلى أميرة .. تعرفي ليه ؟
لأن خرجتيني من جو الكآبة لجو الضحك ــ بس الضحك على خيبتنا
سخريتك من واقعنا شيقة وممتعة جداً
لأنها تحكي الواقع بأسلوب درامي لذيذ
أظن يمكن أن نطلق عليه ذلك المصلطح ( الكوميديا السوداء )
المشكلة ليست في الموبايل في حد ذاته ولا في التكنولوجيا بشكل عام
المشكلة فيمن يستخدمون هذه التكنولوجيا بشكل خاطئ
المفروض أن الكتنولوجيا بكل أنواعها وجدت لتخدم مصالحنا وتزيد من دخل الفرد
لكن بجهل الناس لأهدافها هذه تحولت إلى النقيض تماماً
أنا معي موبايل .. لم اشتريه إلا بعد أن اقتنعت بأهيمته وذلك بعد موقف جعلني أقر بضرورته
ولا أتكلم فيه عادة إلا إذا كنت خارج البيت وللضرورة ـ ليس بخلاً ولكني عملية جداً ولا أحب خلط الأمور ببعضها.
عجبتني النظرة الإقتصادية للأستاذ أبو مازن وتحليله لقانو السوق وأؤيده فيها تماماً ( بحكم دراستي للإقتصاد )
المفروض الموبايل وحتى التليفون العادي وُجد ليخدم هدف معين وليس للثرثرة والدردشة ( فلكل مقام مقال )
إذا استطعنا أن نزن كل الأمور بميزانها المناسب سوف نعرف الهدف من كل شئ ونحاول الوصول له
مرة آخرى يا أميرة
قضاياكِ التي تطرحيها لنا في غاية الاهمية
وأسلوبكِ الذي تكتبي به يزيل مرارتها ليحولها لقطعة سكر .. مثلكِ
في انتظار جديدكِ
محبتي
هدوء ،

تعليق بدون عنوان

05/22/2008

،

02:17 م

.. من قبل AhmedAlmuslim

..

..

السلام عليكم ورحمة الله وبركاته

يمكننا أن نلخص مثل هذه المشكلة في شيء واحد وهو حب المنظرة والتفاخر بين الناس حتى بما لا يستطيعوا تحمل تبعاته .

لي ملاحظة بسيطة يا أميرة يا أختي وهي قولك نحن شعب كان عنده حضارة " ربما أشرتي إلى الفراعنة " فأنا أريد أن أنبهك ألا تجعلين ولائك للفراعنة أو انتمائك واجعلي ولائك للإسلام ولنبي الإسلام محمد صلى الله عليه وسلم وكفى بذلك انتماء .

دعينا من الفراعنة فقد ولى أمرهم وانتهوا وبقي لنا الإسلام ، أعاننا الله وإياك على أن نكون من أفضل المسلمين وأن نرضي الله دوما والسلام ختام

كفاية سخرية من مشاكلنا بقا

05/22/2008

،

03:07 م

.. من قبل Anonymous

..

..

الاخت العزيزة
رجاء عدم السخرية المتكررة منا في كتاباتك
يبدو أنك من المرفهين الذين لا حملون هما لشئ
تبحثين عن الابتسامة و لو علي حساب غيرك
حرام عليكي
لا يسخر قوم من قوم
اتق الله فينا
و السلام عليكم

كفاية سخرية من مشاكلنا بقا

05/22/2008

،

04:21 م

.. من قبل ameera1977

..

..

كنت اتمنى من كاتب التعليق صاحب عنوان (كفاية سخرية)ان يدخل باسمه ويعلن بصراحة ان هذا هو رايه

أما انا فلا تتهمني باتهامات مع عدم علمك بشئ عني وعن حياتي ولست في نفس الوقت مطالبة بتوضيحها في مدوناتي
اما الاسلوب الساخر ياسيدي فهو ليس بجديد على المصريين ان كنت منهم واشهر كتابنا والاقرب لقلب الشعب هم الساخرين من الالامنا مثل احمد بهجت
وشاعرنا العظيم احمد فؤاد نجم
وشر البلية مايضحك وكفنا هما وغما مما نرى من احوال في بلدنا تدمع لها القلوب فلنخفف اذا بقليل من السخرية
وانا مصرية ولست من كوكب اخر
وان كنت حقا كما تقول لااحس بالالام البسطاء لما اهتممت بكتابة مدونة عن اسراف المحتاجين من شعبنا في كماليات نشهدها باعينا في شوارعنا كل يوم باسلوب يزيد من معانتهم

اما اذا كنت من الذين لايحبون الكتابات الساخرة فهذا رايك واحترمه ولك اذا اردت ان ترفض كتاباتي ولا تتابعها بعد الان

واحب ان تدخل على الرابط هذا لتقرأ جيدا عن فن وادب السخرية المشهور عربيا
http://www.xx5xx.com/vb/showthread.php?t=22839
وهذا جزء منه

ألم الناس ليس مادة للكتابة، لكن حينما يتعلق الأمر بالكتابة الساخرة فهناك مسوغات كثيرة للكاتب، يعلّق عليها أملاً بالتغيير أو التبصير بالواقع بطريقة ساخرة خفيفة. السخرية ليست هدفاً بقدر ما هو التعبير عن الآلام والأحلام وحزن الناس والأحداث، وأمور الحياة اليومية.

يعبرون عن الآلام والأحزان بطريقتهم الخاصة، ويقدمون هموم مجتمعهم على شكل ابتسامات ومفارقات، ربما لأن الانسان لا يستطيع العيش حزينا طوال الوقت، وفي عصرنا المتسارع هذا نبحث دائما وطوال الوقت عن شيء ينسي الإنسان همومه ويصُُيرها ألطف وأرق مما هي في الحقيقة.

هؤلاء الأدباء أو الصحفيون يكتبون ما لديهم باللهجة الشعبية حينا وبالفصحى حينا آخر، ولكل كاتب منهجه وطريقته التي يمتاز بها عن غيره من الكُتاب، لكن ما يشترك به كل هؤلاء هو حب الأرض والشعب ونبذ القهر والظلم.

الأدب الساخر تنطوي تحته أنواع: فهناك الشعر الساخر، القصة الساخرة والخاطرة والمقالة الصحفية الساخرة، وكلها طرائق متعددة لقول ما يشغل بال الكاتب في الحياة من حوله، ليتناول التناقضات في المجتمع، الممارسات السلبية، الأحداث والشخصيات السياسية، المشاكل الإجتماعية وحتى النفسية والمادية، وغيرها من المواضيع التي لا تنتهي.

أحمد رجب من مصر، محمد الماغوط، وزكريا تامر وشريف الراس من سوريا، إميل حبيبي ومحمود شقير من فلسطين ومن السعودية أحمد قنديل، لهؤلاء المكانة الأبرز عربياً في الكتابة الساخرة، وأسماؤهم لمعت وعرفت من خلال ما قدموه لهذا الأدب.



حرّر بواسطة ameera1977 في 05/22/2008 عند 04:50 م

ربنا يفرجها

05/25/2008

،

01:19 ص

.. من قبل flaan

..

..

ايصال الفكرة للناس بروح الفكاهة فن لا يجيده اي احد
فلربما اجاد الكتابة من عاش المعاناة دون ان يكون له صلة بلعم البلاغة والكتابة فالقلب ينبض للقلم بالكلمات
وشر البلية ما يضحك
عموما اعاننا واياكم الله
وربنا يفرجها

عفريت الموبايل

05/30/2008

،

03:21 ص

.. من قبل نجلاء فتحي

..

..

أختي الحبيبه أميرة
موضوع فعلا خطير ورائع في نفس الوقت ده حتى الزبال معاه موبايل وبتاع الأنابيب على رأيك يا أميرة مش لقيين ياكلوا بس المهم الموبايل يبقى في إيدهم المهم يبقى في إيدهم
بالنسبة للأخ اللي بيقول السخرية وإنك مش شايله هم حاجةأنا اللي أعرف أميرة شخصيا ولا هيه مرفهه ولامن اللي مابيشيلوش هم
مافيش مصري في العالم مش شايل هم وأولا وأخيرا مفيش في الدنيا راحه، قال تعالى ( وخلقنا الإنسان في كبد)
وبالنسبة للسخرية مفيش سخرية ياعم إنت نايم ولاإيه ولامش من بلدنا وعايش في كوكب تاني
أناعن نفسي ولادي نفسهم في الموبايل مع إنهم كبار
لكن مش لقياله أهمية ، مصاريف على الفاضي وفشخرة
وربنا يهدينا جميعا

حاله

07/19/2008

،

02:09 م

.. من قبل Anonymous

..

..

انا حارس مرمى كويس ممكن يا كابتن احمد تودينى اى نادى واتمنى نادى المقاولون العرب وعايز اقول لحضرتك حاجه كمان احنا حالتنا وحشه جدا انا من طنطا من قرية نفيا لو حضرتك تعرفها ان اتمرنت فى مدرسة كورة القدم باستاد طنطا وانا احبك جدا وانا كمان اصورت مع حضرتك فى نادى السكه الحديد بطنطا فى شهر رمضان ممكن ياكابتن احمد اخد مع حضرتك ميعاد هنا بطنطا وممكن كمان رقم التليفون اسمى 0محمد صلاح عقده رقم تليفونى171527514
ده رقمى ورقم خالى
0118287370

أرسل تعليق
من:	*  عضو مسجل: [ دخول / التسجيل ]
* عنوان الموقع:
* البريد الإلكتروني:
الموضوع:
* النص:
* الرمز: