كركر

مواصلتك إلى جهنم حلقة(2)

حلقة (2)

ثانيا:التاكسيات
اما انت بقى لو مش وش بهدلة يبقى هاتفكر في التاكسي
هاتنزل من بيتك بدري عن ميعاد مشوراك وتعمل حساب ساعة على الاقل زيادة.. بتاعة انتظار التاكسي
لانك هاتقف وهاتستنى اي تاكسي يعطف عليك عشان يقف لك  هوا اساسا مش هايبصلك
حتى لو فاضي لانه ممكن بيتفسح
ولو بص لك هايحتقرك ويبص لك  من فوق لتحت
والذوق اللي فيهم هايعملك بايده لا وعلى وشه ابتسامة الموناليزا
خلي بالك لازم شكلك يبقى وحلو ومستحمي عشان جايز يعجبه شكلك
وياريت تمسك في ايدك وردة حمرا ....ليه بقى؟؟؟
لانه لو وقف لك ..لا يمكن تحط رجلك في عتبة التاكسي الا لماتقوله رايح فين الاول فلو  ماعجبوش المكان اللي انت رايحه ..جايز لو تقدم له ورده يرضى يركبك
وتكون في منتهى الادب وانت بتتكلم معاه  يعني تقوله(لو سمحت ياباشا ممكن تسمعني)واياك تنرفزه
وفيه شرط كمان اوعى تاخد حد معاك لان اي سواق بياخد واحد بس عشان وهوا ماشي يركب زبون واتنين وتلاته على حجرك من باب توطيد الاواصر بين المواطنين وبعضهم
سواقين التاكسي في بلدنا بيعملوا اللي هما عاوزينه في الزبون
كل ده يهون بس الامان والسلامة فين بقى ؟؟ في بلدنا مش موجودة ابدا
في تاكسيات في مصر من سنه 1880 من ايام محمد  علي تلاقي التاكسي من دول ماشي وبيشمشم على قتيل او شكله كده رايح ياعلى المدافن ياعلى الاخرة
والله احنا بنشوف تاكسيات من معجزات القرن عبارة عن متحف متنقل من ايام المظ  وعبده الحامولي .. ازاي لسه بتمشي لحد دلوقتي.. ومين اللي بيدي لها ترخيص تمشي بيه بحالتها المعفنة دي
من نوادري مع التاكسيات..  واللي تبين حال الموصلات في بلدنا عامل ازاي
ـــ انا مرة كنت راكبة تاكسي وفي الطريق شفنا واحدة ست تخينة جداجدازي كده  بتشاور لنا وقف لها السواق من غير مايستأذني طبعا
ركبت .ولسه هاتفتح الباب لقيتها بتغمز بعنيها زي اشارة أو كلمة السر.اتاريها مخبية
وراها طابور عيال ماكانوش باينين من تخنها
ولقيتها بتقول : ياسناء بت ياوفااااء تعالي امال فين هنااااء ركبتوا كلكم؟ لسه ياماما   ياولااااااء تعالي هنا في مكان اهو هنا قدام
انا لقيت نفسي زي اللي راكب ميكروباص وكل اللي يدخل يستريح فوقه حتى كنت باحاول ابص على الطريق عشان اعرف انا وصلت عند بيتنا ولا لسه ماكنتش قادرة اشوف السكة كويس بسبب القبيلة اللي كانت قاعدة فوقي وكنت غطسانة وسطهم
ــــ وركبت مرة تاكسي  جايب كنب  الانتريه بتاع بيتهم وحاطه قدام وورا وسانده بعامود
حديد  كبير بعرض التاكسي من جوه مدقوق من الجنبين
ـــ وسواق تاني مركب  تلفزيون وبيتفرج عليه اكتر مابيتفرج على الطريق
ـــ وسواق تاني لابس حزام امان عشان المخالفات والعربية اساسا موديل 1900
قبل اختراع حزام الامان لكن  هوا بقى ناصح جايب قماشه سودا ومخيط حته  في الكرسي وحته في ضهر الكرسي
ـــ وسواق ركبت معاه واكتشفت انه اطرش مابيسمعش ههههههههههههه
يعني لايسمع زباين ولا كلاكسات ولا حاجة ابدا
وانا كمان ماعرفش لغة الاشارة بقيت اشاورله يمين شمال واخبط عليه عشان يقف
ـــ وتاكسيات كتير يبقى قافل الشباك في عز الحر تجي تفتح من الاوكرة ماتلاقيهاش
وتبوس رجله عشان يرضى يديك الاوكرة اللي حاططها في الدرج قال بيحافظ عليها
وبعد ماتفتح  الشباك  ترجعها تاني
ـــ وتاكسي ركبته ماكانش له إزاز  لاقدام ولا الشبابيك زي طفطف راس البر بالظبط
وبعد مانزلت وروحت لقيت  تراب وهباب الشوارع كله على وشي
اما اظرف واغرب موقف هوا اللي جاي ده
كنت مع اختي  في مشوار ومروحين البيت وقفنا تاكسي شكله عجب من جوه
تحس انه مالوش ماركة  باختصار هوا كان حلة كبيرة وجمعوا فيها كل انتيكات وتحف
العربيات القديمة
مشينا والتاكسي مشخشخ عالاخر وانا واختي عمالين نتمرجح يمين وشمال وننط لفوق وتحت زي اللي راكبين وابور طحين
صابرين وساكتين يقوم يجي للسواق مكالمة موبايل.. يرد عليه ويقول: لا والله رحت للميكانيكي ولسه ماصلحهاش  بعدين سكت شوية ورد وقال: لاااا مانا ماشي بيها
كده انهارده بس ..وربنا يستر بقى واليوم يعدي على خير اديني ماشي بالراحة
بصيت لاختي وهيا بصت لي .. واحنا فاتحين بقنا... هانموت ولا ايه ؟؟؟
فيه ايه ياترى ؟؟وقلبنا قعد يدق من الخوف... العربية هاتولع ولا ايه الله يخرب بيت اليوم اللي ركبنا  فيه معاك
شويه ولقيناه مزود السرعة على الاخر..وبعدين بيقولنا ياهوانم قبل مايجي المكان اللي هاتنزلوا فيه بعشر دقايق على الاقل قولولي
بصينا لبعض تاني انا واختي واحنا مش فاهمين حاجة
وصلنا لحد بيتنا قولناله بس هنا لو سمحت
ماوقفش برضه قلنا تاني بصوت عالي هنا لو سمحت ... برضه ماشي بالتاكسي بنقول لحضرتك هنا البيت فات وعدى
قالنا مش قايل لكم تقولولي قبلها بمده
اسف ..ماقدرش اعملكم حاجة الموضوع خرج من ايدي
العربيه مافيهاش فرامل هاتفضل ماشيه لحد ماتقف لوحدها
بصيت لاختي مافيهاش فراااااااااااامل ... يالهوييييييييييييييييييييي
وفضلنا ماشيين والتاكسي ماشي بسرعة من غير فرامل ..فين وفيييييين لما هديت السرعة شوية شوية  ووقف بعيد عن بيتنا يجي كيلو ونص ونزلنا انا واختي نضحك في الشارع بهستريا لنجاتنا من موت محقق
بالذمة دي احوال مواصلات تخص ارواح البني ادمين
يعني  لا اتوبيس نافع ولا تاكسي حتى الميكروباص بيشيل اكتر من طاقته 7 مرات
يبقى مليان على اخره وتلاقي التباع بيقول فاضي وعتبة عتبة عبتة
في الدول المتقدمة الواحد يوقف التاكسي ويركب من غير مايقوله مقدما رايح فين
ويوصله لحد بيته مش يقوله انزل هنا وكمل الباقي مشي
ولا يمكن يركب زبون مع زبون تاني
فين وزير النقل وايه اللخبطة دي وقلة النظام والسبهلله اللي هاتودينا في داهية
رحمتك يارب

بنضحك من غلبنا

05/19/2008

،

11:10 م

.. من قبل fadiabatisha

..

..

اميرة انت ماحصلتيش

بجد والله.... صادقة جدا فى كتابتك

وموت من الضحك وانا اتأمل احولنا

بفكر اشترى طيارة وخلاص ,

هو يعنى جمال مبارك والا احمد عز احسن منى فى ايه

ودائما فى انتظار ما تكتبين

فادية

اضحك كركر

05/20/2008

،

02:44 م

.. من قبل masryeen

..

..

إوعه تفكر
إإإإإإإإإإإإإإإإإإإإإإإإإإإإإإإإإإإإإإإوعه
فعلا شر البلية ما يضحك
تحياتي

شرا لكي يافادية

05/20/2008

،

06:24 م

.. من قبل ameera1977

..

..

شكرا لمداومتك على قراة مدونتي المتواضعة

واكيد انتي احسن من احمد عز وجمال مبارك 100 مرة
لانك مننا واحنا منك

تحية

05/21/2008

،

12:00 م

.. من قبل maysaa

..

..

عزيزتي الاميرة

مصاعب الحياة تزداد باستمرار .. كل انسان يواجهها بطريقته الخاصة .. اشكرك على روحك المرحة التي تزين مقالاتك


ميساء

شكرا ميساء

05/30/2008

،

08:57 م

.. من قبل ameera1977

..

..

بل انا اشكرك على اعجابك بمدونتي المتواضعة

وليعين الله هذا الشعب المسكين

أرسل تعليق
من:	*  عضو مسجل: [ دخول / التسجيل ]
* عنوان الموقع:
* البريد الإلكتروني:
الموضوع:
* النص:
* الرمز: