كركر

مواصلتك إلي جهنم حلقة(1)

                       
ايه رايكم في حال المواصلات في بلدنا في ايامنا الكحلي  المنقطة باسود دي؟؟؟؟
عالعموم انا رايي ان  المشي اسرع واسهل واكرم وأمان
لو فكرت تنزل من بيتك عشان تروح مشوار  يبقى لازم تحسبها صح
هاتركب مواصلات يبقى نهار مش فايت ان شاء الله
اولا الاتوبيسات
لازم وانت نازل من البيت تكون واد سبور يعني لابس شورت مثلاوكوتشي من النوع الخفيف وتكون واخد تدريبات كويسة على العدو السريع وحمل الاثقال وكمان
لعبة الترابيز المشهورة في السيرك
طبعابتسالوا ليه؟؟هاقول لكم
العدو... عشان اول ماتلمح الاتوبيس جاي تبدا في الجري لانه طبعا السواق  مش هايقف لك(انت فاكر نفسك مين ياخي)
وإوعى ماتمسكش فيه كويس وهوا بيجري أحسن ممكن نهايتك تبقى زي فيلم الارض وتبقى زي محمود المليجى (الارض العطشااااااااانة نرويها بدمانااااااااا)ده انت اللي هاتغني وهوبيسحلك في الشارع...اوعى ايدك تسيبه حتى لو كنت بتتسحل
وماتخافش هاتوصل برضه مشوارك بس شكلك هايبقى متغير شويه
وعموما اذا لحقت تركب بعد ماتكون اجتازت كل الاختبارات اللازمة
يبقى فاضل حمل الاثقال ...حد يسالني ليه
ااقوله لانك جايزتضطر تشيل راكب على رجلك لفترة طويلة وشعبنا متعود يشيل بعضه في الازمات  بس في عز الكتمة  والحر  هاتشوف العجب وتشم بلاوي ربنا يعافينا

واحنا وماتخافش هاتوصل برضه بس شكلك هايبقى متغير شويتين
كل ده اذا كان حظك كويس ولقيت مكان داخل الاتوبيس لان في الغالب مافيش مكان تقف فيه مش تقعد ...فهاتلاقي زحمة جامدة على الباب وده طبعا لان الباب اكتر حته فيها طراوه وتبقى اول واحد ينزل لو الاتوبيس وقف مش لان الاتوبيس زحمة لاسامح الله أما لعبة الترابيز....حد يسالني ليه
 لانك بعد ماتشعلق في بابه لازم تمسك يايد واحده والايد التانيه تطلع الفلوس وتبقى شبه حته الغسيل اللي  منشورة بمشبك واحد والهوا بيطوحها يمين وشمال
وجايز جدا وانت مدلدل بره كده يجي اتوبيس تاني يزنقك فاتتفعص بينهم ..او تتشبك في اتوبيس تاني معدي وتبقى متفسخ بين الاتنين يامسكين
ودي خطة الدولة الجديدة للتخلص من 800 مواطن يوميا لمايسقط من الاتوبيس سهوا وهوا ماشي وده طبعا لاهمال المواطن في تدريباته على لعبه الترابيز......
بس حاذر جدا لان لاعب الترابيز تحته شبكه انما انت يامسكين ...اهئ اهئ اهئ وفي الحالة دي مش هاتقدر توصل للاسف
عموما لو نجيت من كل الاهوال دي يبقى فاضل اخر حاجة
طفاية حريق صغيرة في جيبك لان اول حته هاتولع اللي قدام ودي فايدة  انك تكون من اللي  متشعلقين في الباب ورا ...وطبعا السواق الغلبان ماعندوش طفاية
ويستحسن دايما ماتبقاش جوه الاتوبيس وقت الحريقة لانه الزحمة مش هاتخليك تعرف تخرج هاتعمل ذكي وتفكر في الشبابيك ريح نفسك ...مابتفتحش أو مفتوحة نص نص  يعني ماتكفيش غير نصك الفوقاني او التحتاني اللي يخرج بره الحريقة..وانت اختار.
ماتخافش هاتوصل مشوارك برضه بس شكلك هايبقى متغير 3شويات
 نصك هايبقى على بني محروق شوية والنص التاني سليم ان شاء الله
وبعد مابقيت نص سوا...وتجي محطتك اخيرا في احتمال كبير انك ماتقدرش
تنزل فيها لان فيه ركاب تانين بيبقى ليهم راي تاني ودول بقى اللي في المحطة بيستنوا
الاتوبيس اول مايوصل يطلعوا يركبوا فورا من غير مايدولك فرصةتنزل محطتك اللي انت اساسا شفت الاهوال عشان توصلها وتلاقي نفسك بقدرة قادر لسه برضه جوه الاتوبيس بتبدا رحلتك من  تاااااااااااااااني بعد مافشلت في نزول محطتك لاهمالك واللكاعة بتاعتك
ماحدش اخد باله وهوا متشعلق مرة ان فيه عربيات نص نقل معديه جنبك بتنقل ركاب
 من نوع تاني
....(بهاااااااايم)(جمايس على معيزوخلافه)واقفين محترمين بهوات كل واحد ليه مكانه .. وكمان جايبين لهم اكل ...مافيش بهيم منهم متشعلق ولا طاير ولا شايل على حجره بهيم تاني
طبعا وانت متشعبط تلاقيك بتبصلهم بعين الحسد ....اه يامكار
تستاهل حد قالك اطلع من بيتك .. مش عارف {ان من خرج من داره اتقل مقداره}
مافيش  حاجة في بلدنا تحترم الناس ولاتحسسهم بآدميتم الناس في بلدنا تعبانة اوي بجد وابسط الحقوق الادميه مش موجودة
يامسئولين ارحموا الشعب ده كفاية مهانة بقى
انتظروا الحلقة (2)... من مواصلتك الي جهنم

اميرة علشان خاطرى بلاش سيرة جهنم

05/18/2008

،

11:38 م

.. من قبل fadiabatisha

..

..

اصلها يا اميرة مش ناقصة

خليها مواصلاتك الى الجنة

لان الذى سيصبر على هذا العذاب

اكيد سيكون له عند الله الثواب

وكعادتك يا اميرة ادخلتى السعادة والابتسامة الينا

تصدقى بالله انا بأنتظر كتابتك وبحبها جدا

ويارب ارحمنا دنيا واخرة

فادية

شرف لي يافادية

05/19/2008

،

01:04 ص

.. من قبل ameera1977

..

..

شرف لي يافادية ان تنتظري مدونتي لتقرايها

وهذا يقلقني كثيرا حتى اقدم لكم دائما ماينال اعجابكم

وشكرا لمتابعتك وتشجيعك لي
دمتي بخير

فين أيام .. يا وابور قولي .. و الجوز الخيل

05/19/2008

،

01:59 ص

.. من قبل masryeen

..

..

ولا تاكسي الغرام
احنا حتى مش محصلين زمن .. زحمة يا دنيا زحمة
كان الله في عونا احنا اصحاب الموتورجل
بس روحك خفيفة مرحه
تعيشي و تمتعينا دايما بأفكارك الرائعة
تحياتي

أرسل تعليق
من:	*  عضو مسجل: [ دخول / التسجيل ]
* عنوان الموقع:
* البريد الإلكتروني:
الموضوع:
* النص:
* الرمز: