كركر

الرجولة والستوتة

 الرجولة والسُتوتة
تفتكروا ياجماعة ان ايامنا الكحلي المقلمة باسود ..اليومين دول في حاجة إسمها رجولة ؟
للاسف لا .... بس ماتزعلوش مني هيا دي الحقيقة
لو انت راجل ياللي بتقرا مدونة كركر ...عندي ليك سؤال
لو في مواصلة عامة(اكيد لو ماعندكش عربية زي بقية المصريين المدعوكيين في  الفقر)
لكن بقى لو عندك عربية مش هاعتقك ليك سؤال برضه
نرجع تاني وانت في الباص مليان وانت قاعد متجصطن وواحدة ست واقفة جنبك
هاتسيب مكانك ولا لأ؟؟
لو لأ يبقى ..انت سوري يعني سوري ماعندكش دم... واطلع من مدونتي حالا
ده طبعا اذا ماكانش عندك عذر زي الدوالي او الطحال او عرق النسا
 لوانت من النوع التاني ......ابو عربية
لو شايف واحدة ست مع جوزها في الشارع حامل وتعبانة على وش ولادة وإنت شايف مافيش
تاكسي يوصلهم ...هاتقف لهم؟؟؟
لو لأ يبقى إخص بجد... واطلع برضه من مدونتي حالا
احنا شعبنا يستاهل الهم والنكد اللي هوا فيه لاننا مابقاش فينا رجولة بجد
والرجولة بتبدا من ابسط الاشياء اللي اتكلمنا فيها
لكن اللي انا باشوفه مايطمنش
تلاقي الواد من دول زي الفلق والبغل الاسترالي ...شاب في عز هبابه قاعد
متكبب على الكرسي والوليه ياعيني كبيرة في السن ... جنبه واقفه وشايلة
 اكياس على قلبها ولسانها مدلدل لبره من كتر التعب وهوا بيضحك ويهرأ مع اللي جنبه
بصراحة بيبقى هاين عليا اهفه قلم على خلقته وانتف له السكسوكة اللي شبه التفه
اللي بيعملوها دلوقتي في الدقن واشده من السلسة اللي في رقبته اشنقه بيها
وامسك اللبانة اللي في بقه اخربشه بيها لحد مايخر الدم...
واقوله ماتقوم يابأف قامت قيامتك واتنصب ميزانك
بجد والله حاجة تزعل فين الرجالة راحوا فين
الابن مابيسالش على امه ... وماشي ورا مراته وبس
وجايز يرمي امه في دار للمسنين..ويقولها خليك هنا  يامامتي لحد ماأصلح السيفون
ويتهرب من اخته لو محتاجة خدمة او مساعدة او مشوار...
ولا يسال  على مرات اخوه واولاده لو كان اخوه مثلا مسافر ويشوف محتاجين ايه
الست بتبقى واقفة في طابور عيش او بنك او مصلحة حكومية وسط رجالة كتير
مافيش واحد يقولها اتفضلي انتي الاول .كل واحد بيقول يلا نفسي  ...والباقي يولع
طب والستوتة... الستوتة بقى ده معنى كبير يشمل الام والزوجة والبنت
بس فيه ضعف وحنان.اعتقد ان صعب يتاثر بمرور الزمن لانه غريزه قويه من عند ربنا
عموما الميزان مختل ...رجالة كتير في دنيتنا لا يستحقوا في خانة الجنس في البطاقة
الشخصيةالا لقب ذكر ونحط بين قوسين(معلقة صغيرة ذكورة على لترين ستوتة)
يوم ماالرجولة ترجع تاني والراجل يبقى راجل بجد حالنا هايتغير 
 الجدعنة بجد... مش موجودة عشان كده احنا نستاهل نتسك على قفانا
من الرايح واللي جاي أكيد فيه خلل في بيوتنا في تربية عيالنا اللي في الاخر
يكبروا ويبقوا اشباه رجال
تلاقي الواد شحط طويل عريض ولابسلي بنطلون قال ايه (لو ويست)
(LOW WAIST)وجيوبه منفضه.. طويييييييييل زي النخلة والبنطلون وسطة
واقع على الحروكروك ....لو بس وطى شوية يجيب حاجة من على الارض ...
هاتشوف العجب ومناظر ماتسرش لا عدو ولا حبيب...ده غير الروائح الكريهةالمنبعثة
 من هذه المناطق ياخويا استر نفسك يعني هاتورينا حاجة عدلة أوي
عاملي فيها الفتى الجذاب ابراهيم سعيد
الشباب كل همه دلوقتي حاجتين البنطلون  اللي هايقع منه في الشارع وهوا ماشي سانده
بايده ....والحاجة التانيه هيا الجل ...الجل ده مهم جدا عشان تعمل نيو شوك
تليثه الاول بالطين وبعدين توقفه بالنشا لفوق شبه بتاع سفن اب (فيدو ديدو)
وبعد كده تغير لون الشوشه من قدام فوحلؤي او الهافان الجربان...ويفتح صدره
عشان عنده كم شعره  في صدره تاعبينه وهما كلهم 3منمرهم 1و2و3 قال يعني
 عامل شوية سكس بتاع احمد رمزي حتى لوكان هوا شبه توفيق الدقن
معقول دي كل اهتمامات الناس دي... اد كده بقينا تافهين
واخيرا مصائر الشعوب لا تتغير الا بالرجال ...وليس الذكور

شر البلية ما يضحك

05/17/2008

،

12:46 ص

.. من قبل masryeen

..

..

الله عليكي و علي خفة دمك
ظريفة بجد
و مواضيعك تلمس حياتنا و لكن مع خفة ف الروح و الاسلوب دون تعقيد .. سلس .. سهل ممتنع
بتخففي عنا هموم الحياة بظرفك في مناقشة الموضوع
ههههههههههههههه ااااااااااييييييييي بطنى بتوجعنى م الضخك ههههههههههههه ااااااااااييييييييي
ربنا يفرحك زي ما فرحتينا و نستينا همومنا
تحياتى

جميل تعليق المهندس مصريين

05/17/2008

،

01:25 ص

.. من قبل AbouMazen

..

..

جميل تعليق المهندس محمود مصريين

فعلا شعب ابن نكته ...... ويحب يهراء على راى حمادة سلطان ...يوووه قصدى اميرة سلطان

__________

يا ابله اميرة : الست المصرية منذ عام 1936 وهى بتطالب بالمساوه .... قوم الرجاله الظالمين من الظلم

يقولوا هتتعبى (وقرا فى بيوتكن ) الستات تقول ابدا ً هنطلع يعنى هنطلع
الرجاله الظالمين من الظلمه
يقولوا تنحشرى فى المواصلات ليه زحام وقله قيمه
يقولوا احنا قدها وقدود

يا بنت الناس خليكى فى بيتك ... الدنيا بقت وحشه
و النفوس المريضه زادت دا يقول كلمه خادشه ودا يلمس لمسه خادشه برضوا واحد يقف وعشره يهراو

_____________
تصرخ وتقول ملكش دعوه انا عايزه احقق ذاتى الست تساوى الرجل ... هو انت عايز جاريه تقعد تربى لك العيال
ولا انا اتعلمت علشان اتحبس فى البيت

الراجل الظالم المفترى ...يتحايل عليها ويبوس اديها
خليكى فى البيت متصانه وسيبى الشقى والغلب للرجاله
وكفايه عليكى مسؤليات البيت والاطفال
تعترض تشجب وتنادى بالاستقلال التام _________

عارفه يا انسه اميرة
اوقات كتير وانا راجع من التحرير
القى بنات واقفه جانب الكرسى اللى انا قاعد عليه
لو البنت محجبه او منتقبه ... ست كبيره او راجل عجوز
كفيف او مصاب
هقوم ....

بنت بقى من اللى من فوق هالله هالله ومن تحت يعلم الله والناس اللى فى الاتوبيس

والله لما تنزرع زرع بصل ولو هتقوم قيامتها

اصل البنات بعيد عنك بقوا عايزين قطم رقبيهم

الرائعة اميرة

05/17/2008

،

02:31 ص

.. من قبل fadiabatisha

..

..

ما شاء الله ربنا يبارك فيك وفى روحك التى تسعد قلوبنا

شوفى يا اميرة انت جبتى من الاخر خالص

صادقة انت جدا فى الوصف المضحك

اننا نواجه مشكلة وحلها

ربما فى ابنائك وابنائى

نطلعهم رجالة بحق وحقيقى

مش مجرد( بين البنين)

ولك يا اميرة كل الشكر

وربنا مايحرمناش من خفة دمك الرائعة

فادية

تعليق بدون عنوان

05/18/2008

،

01:17 م

.. من قبل starlight

..

..

صدقتي أميرة فيما طرحتي
لقد بدأت الرجولة والنخوة والشهامة ( موضة قديمة ..)
من يتصف بها أظن هو من يطلقون عليه ( بيئة ) غير متحضر ، رجعي .متخلف
أظن أن تلك الظاهرة كما قلتِ أميرة .. هي أزمة تربية .
أين الوالد من الابن عندما يرتدي مثل هذه الملابس ؟
أو تلك الوشوم أو تسريحات الشعر التي تشبه شعر الشمبانزي أو الحلقات التي يغرزها في أنحاء جسمه كأنه .......
أين القدوة في البيت ؟أين التوجيه في المدارس؟ أين وأين وأين ؟؟؟
...................................

لا أظن يا استاذ أبو مازن أن معنى المساواة تتعارض مع احترام الرجل للمرأة
بل بالعكس .. أظنهما مستاويان يكملان بعضهما الآخر
أوظن أن ظروف الحياة والمعيشة هذه الأيام تجبر الطرفين على أن تخرج المرأة للعمل
مساهمة في توفير الضروريات للأسرة .. وليس الكماليات.
أظن أن أغلب الشباب هذه الأيام لا يتقدم إلا لمن لديها عمل أو مال .
والله لا أعيب عليهم أبداً ..
وإنما أُعيب على زماننا الذي أهدر كرامتنا من أجل الحصول على حقنا في الحياة
..............
أميرة لسانك ينطق بما اختنقت به صدرونا .
رائعة بما تطرحين من قضايا اجتماعية خطيرة
لكِ كل الشكر ومحبتي .

بسم الله الرحمن الرحيم

05/18/2008

،

01:58 م

.. من قبل rodhawp

..

..

قل هل يستوي الطيب والخبيث و لا الظلمات ولا النور00
صدق الله

ربنا يكرمك

05/20/2008

،

04:32 م

.. من قبل flaan

..

..

بالنسبة للفقرة الاولى المختصة بالمواصلات
الحمد لله عنا في غزة من بعد الحصار وقلة الوقود
صار معظم السيارات _اقصد الرجال الملتزمة منهم واللي عندها دم _
صار الواحد فيهم لما يكون ما شي بالسيارة ما يكون لوحدة بالسيارة ولكن يكون معاه اي حدا بيلاقيه في الطريق بيستنى مواصلة
هذا طبعا بنصح وارشاد من اخواننا في حماس للجميع بضرورة الوقوف مع بعضنا اليعض لمواجهة هذه الازمة والحمد لله المعظم استجاب للاشي هذا والناس صار عندها تأقلم والحمد لله.
اما بالنسبة للبناطيل وغيره ما بعرف اقول للأسف ما عندي خبرة ولا الحمد لله انه ما عندي خبرة ولكن بافضل اقول الحمد والشكر لله انه اكرمنا بعدم الخبرة في هالامور ..
ربنا يحفظ ويكرمك اختنا الكريمة
وجزيت الجنة ونعيمها

أرسل تعليق
من:	*  عضو مسجل: [ دخول / التسجيل ]
* عنوان الموقع:
* البريد الإلكتروني:
الموضوع:
* النص:
* الرمز: