كركر

ميلودي تجيب لك الشلل

ماحدش خد باله ياشعب إن قناه ميلودي دي مش مظبوطة
بجد والله ليها حركات نص كم (كم ايه ده مافيش كم خالص)
إعلاناتها مستفزة جدا جدا ...تبقى في امان الله بتشوف الفاصل الغبي اوي بتاعهم ده ....
ومستحمل وصابر ...بتاع الواد الصغير 12 سنه ده التخين اوي هوا...
 واخوه وامهم  بتضرب الواد أخوه  بغباء برضه  
وهو بيغني فرحان في اخوه اللي قتلته امه....
 لسه هاتفوق وتقول ايه القرف ده تلاقي فجاه
اعلانات جوه نفس الاعلان الغبي عن ملابس داخلية ساخنة جدا
ايه اللي بيحصل ده ؟؟؟
شويه بعد  ماتشم نفسك وتقول استغفر الله العظيم...
يطلعلك الفيل الغبي{توتو عضلات} بتاعهم رمز القوة ولابس لبس (برميل مان)
وهو والله شبه الطشط المخروم ولحمه عمال يلعب زي الجيلي الاصفرفي التلاجة ...
وكل اللي يشوفه يترعب منه رعب ويجري ينقذ نفسه من الوحش الهائج والثور الساذج
مع ان الحل بسيط جدا كل قوي مهما كانت قوته عنده نقطة ضعف
وبرميل مان ده حله ..دبوس صغير في كرشه بس تبعد بسرعة عشان قوة الرياح
وضرب وعنف وكلام غبي ومستفز(ميلودي تجيب  لك الشلل)
فجاه تطلعلك فاتنة القللي والدويقه الاولى بوووووووووبيييييييييييييييييي
اللي هوا (دلع كلب يعني)
بعد مانفخت البالونتين اللي في صدرها عند العجلاتي ...
المخرج قالها انفخي على قد ماتقدري يابوبي ولازم يبانوا كويس وهما طايرين في الهوا
قالتله :ليه يأستاذ ؟؟؟ قالها: طبعا يابوبي لان البالونة شغلتها تطير في الهوا
بالذمة الناس مابقاش عندها دم ايه اللي بيحصل ده ايه؟؟
بجد قناه مريبة انا شكيت فيها بالحاسة الساسة اللي عندي
وفعلا تثبت الرؤيا
واقرا خبر بيقول ميلودي بتمويل يهودي إسرائيلي
قلت فعلا بامارة ياحلوين لو فاكرين موضوع مقتل اشرف مروان
{(الله اعلم)اللي ثارت ضجة حواليه هوا معنا ولا معاهم}
لما انقتل.... القناه قفلت يومين وتعازي وقران كريم.. وقعدنا كلنا نوأوأ
الله يرحمه ويحسن اليه... قلت عيلته من حقها تحزن
بعد ماليومين خلصوا وقروا القران على روح الراجل
استفتحوا بفيلم التجربة الدانماركية للمتصابي عادل امام..مع الصاروخ
المنفوخ  السخسوخ... نيكول سابا
الراجل ياولاد الذين لسه دمه مابردش ولسه مالموش بقيت جتته من عالارض
من تحت البلكونة ...وإنتوا ماصدقتوا بعد ماالشيخ خلص القران من هنا
رحتوا فاتحين الكباريه من هنا... ماعليش  ماعليش   {الحزن في القلب مش في القلع}
ولاحظ اعلاناتهم عن الافلام كلها مشاهد ساخنة عارية من القماش
الصوف او الدمور ولا الكستور أو أي نوع ومسموح فقط بالنايلون لتشجيع الصناعات الحديثة
مع مراعاة لبسه لفتره وجيزه ثم يخلع عشان ريحة العرق... ده غير الفواصل
اللي تخليك ترجع اللي في بطنك طبعا الستات بس اللي هاترجع
انما الرجالة نفسها هاتتفتح للدنيا على ايد بوووبي وامثالها...
بس بجد اليهود عارفين العرب عاوزين ايه وبيفكروا ازاي فيخشوا من الحتت دي
عشان النايم يفضل نايم...والغفلان يشخر كمان وكمان
حتة ثقافة بقى نتكلم جد شوية...
لما الاتحاد السوفيتي انهار ...الإسرائيلين جروا بسرعة يجيبوا العلماء الروس
بابخس الرواتب يشتغلوا في اسرائيل{فضاء وروسيا متقدمة فيها جدا ونووي وغيره}
اما العرب جروا برضة بسرعة في الاوكازيون يلحقوا يجيبوا الراقصات الروسيات
ههههههههههه
هيا البلد ناقصة انحطاط ياعالم
واخيرا ميلودي تتسبب في  الشلل وتتحدى الهبل وتغرقك في البلل
والريموت في ايدكم وكل واحد ينام على الجنب اللي يريحه

نظريه المؤامره !

05/14/2008

،

10:38 م

.. من قبل lastdinner

..

..

ياريت بلاش نظريه المؤامره عشان نعرف نشوف إللي ورانا
عموماً حتي لو تمويل إسرائيل عملنا إحنا إيه؟؟
و بنات مصر في كل الفضائيات مذيعات و مغنيات و راقصات شبه عريانات برضه مؤامره إسرائيليه؟؟
علي فكره بوبيييييييي مصريه !
نفسي نعترف بأخطائنا مره واحده في حياتنا !!
أخوكي حازم

ميلودي تجيب لك العلل

05/14/2008

،

11:14 م

.. من قبل masryeen

..

..

معاكي حق دي قناة فظيعه لا تحترم مشاهديها مسفة في اعلاناتها و واضح أن اعلاناتهم لها هدف
ثانيا الأخ الذي ينكر نظرية المؤامرة .. واضح أنه لا يري الا ما يريد أن يراه فقط .. ربما يكون لليهود دور في هذه القناة ربما .. ولكن لا أحد ينكر مكرهم بنا
ختاما ميلودي تجيب لك العلل
لكي منى كل الود و التقدير

بجد دمك زى العسل

05/15/2008

،

12:33 ص

.. من قبل fadiabatisha

..

..

يا اميرة مش قادرة ابطل ضحك حرام عليكى يا شيخة

على كل هى اعلانات غلسة ولكن يبدو ان ده اللى بيكسب

واعتقد ان الفلوس بتزل النفوس

ولا عزاء لاى ببوبى

فادية

اميرة حازم مصريين فادية

05/16/2008

،

03:03 م

.. من قبل AbouMazen

..

..

الأفاضل والفضليات

انا كتبت اسمائكم انتم الاربعه لان انتم من اكثر الناس المحببه ارائهم بالنسبه لى

___________ نناقش بقى

أميرة

حضرتك لو بتحضرى دكتوراه فى القناة لن تخرج بكل تلك التفاصيل .

ودى مشكله فى حد ذاتها عندنا جميعا ً
انتِ شايفه ان القناه على خطأ ليه بتروح ايدك على زر الريموت وتفتحيها .. بترجعى لما بتشوفى بوبى والرجاله فرحنين ..

القنوات دى عايشه على الاعلانات ..لانها قنوات كثيفه المشاهدة .. فاصحاب المنتجات بيروحوا يعلنوا فيها

ببساطه مش تدخلى وانا كمان مش هدخل والجميع كذلك ..وقتها فقط سوف يتوقف اصحاب القناه على بث هذه البذائات .. مش علشان الشرف ، انما علشان الناس ترجع والاعلانات تزيد .

____________ حازم ..هندسة

بوبى ..مش مصرية ، لبنانيه وهى زوجة لاعب الكرة الشهير ، أبراهيم سعيد

صحيح مش مهم جنسيتها ايه ..لانها حتى لو مصرية فهذا لا يعفيها امام الله مما تفعله وتقدمه من لحم رخيص

__________________

مصريين المؤمره ليست بالحته

يعنى انا مش متصور ان اليهود قاعدوا مع بعض واتفقوا ان البنت اللى اسمها بوبى ( اسمها فالاعلان ) تعرى الصدر فشباب العالم العربى (يريل ) ويكسبوا هما الحرب

لا طبعا !!

انما تعالى نحسبها ... افرد الخريطة

مصر تتوسط العالم القديم .. جنوباً السودان
حرب فى الجنوب وحرب فى الشرق

غرب مصر ليبيا من حصار لحصار ويحكمها ايضا (حصار)

والشمال وما ادراك ما الشمال العالم الاول مثل امريكا وانجلترا وفرنسا والمانيا
والعالم الثانى مثل هولندا والدنمارك وايطاليا واسبانيا

والعالم الثالث مثل تركيا واسرائيل واليونان

ثم مصر ... مصر التى فى خاطرى

المؤامرة موجوده ,,, موجودة

ليس على مصر وحسب بل على هذه المنطقه من العالم

ثروات الشرق .. مغول وصليبين وتتار واسرائيل وانجلترا وفرنسا وامريكا

الكل يغزوا تلك المنطقه من العالم ...طمعا فى ثروه وازهاق لروح المقاومه فيها

_______فادية

هم يبكى وهم يضحك
سعداء طبعا لفصاحه اميرة ,, وما تملكه من روح الفكاهه والظرف

لكن هى المصريه تعلمت عبر قرون ان تسخر من مشاكلها
مثلنا جميعا نشكوا تارة ونسخر من الهم تارة ,, نبتلع الظلط ..دون التحرك لتغيرة

شكرا ابومازن

05/16/2008

،

08:11 م

.. من قبل ameera1977

..

..

سعيدة جدا بارائك والتي تثري النقاش ..مش هارد على جزئية الاخ حازم او مصريين او فادية
ارد على مايخصني
وهو اني لم اشاهد كل هذه التفاصيل على ايام طوال اتابع فيها القناه بشغف... ولكنها فترات عابرة لاتخلو منها قناتهم من هذه البذائات...وقبل كتابتي للمدونة بفترة طويلة قررت فعلا عدم مشاهدتها ...ورفض عقلي هذه السخافات..
وبعدين لو ماكنتش شفت هبلهم ده كنت هاتقروا تدوينتي
وتضحكوا ازاي....اتمنى منك دائما زيارة مدوناتي وإثرائها بالنقد..........وشكرا لاهتمامكم جميعا

وانا هركب دش

05/17/2008

،

01:08 ص

.. من قبل AbouMazen

..

..

استاذة اميرة
انا حكمت على حسب ما رويتى لكن العدل يقول
اركب دش وشوف بعينى وبعد كدا احكم اذا كانت البلونات طبيعى ولا منفوخه عند عجلاتى (ههههههههه)
مساء الفل

أرسل تعليق
من:	*  عضو مسجل: [ دخول / التسجيل ]
* عنوان الموقع:
* البريد الإلكتروني:
الموضوع:
* النص:
* الرمز: