كركر

يلايابابا هاتروح عالسجن

سمعتوا ياشعب ان في قانون هاينزل يدي الحق للولد لما ابوه يضربه او يسئ
معاملته انه يدخله السجن بعد مايقدم فيه بلاغ في القسم
يعني كل اب من الباهباهات لو بيقرا كلامي ده يلم نفسه لو عنده عيل...
أحسن مش هايحصله طيب
ولو بقى لسه متجوز جديد يستحسن يستخدم طريقة انظر حولك لتسليت النحل
قصدي تحديد النسل خالص.... يعني ياينتحر يايقتل مراته....
طبعا كل واحد متجوز هايفضل الحل التاني لانه اسهله  وفيه فرج من كل ضيق
واللي الفاس وقعت عنده في الراس خلاص وخلف عيل ولا اتنين يحاول انه
يرستأ أموره معاهم من دلوقتي اذا كان  صغير يدلعه باللعب والحلويات وكنتاكي والذي منه
وإذا كان كبير عليك بقى بحته حشيش او بانجو او مٌذة حلوه
ولو مش متجوز يبقى من دلوقتي  تدور على عروسة مش ناوية تجيب عيال
ايوه يابني اعمل حساب للزمن لان {اللي يحسب الحسابات في الهنا يبات}
وعلى فكرة الضرب انواع يعني القانون يعاقبك لو الضرب سبب جرح أو علم علامة
في الجسم او ساب اثر خفيف فلو مضطر مضطر تضرب ... يبقى بكيس المخدة
والمخده مش جواه طبعا  أو ايشارب مراتك ...خليك ذكي واوعاك تسيب ولا علامة حمرا
ولا حتى بامبي ..لان العواقب وخيمة ...إهئ إهئ 
هاتبقى نايم في بيتك في امان الله بتشخر زي الملايكة تلاقي الباب بيتهد على نافوخك
والبيه الظابط يقولك يلا يانور عين ابنك على القسم  احنا لقينا في الواد علامة بامبي.....
 ياعاق ياقليل الادب  ......اذا ماكانش ابنك عرف يربيك يبقى نربيك احنا
....عموما اذا ماقدرتش تكسب ابنك في صفك وتماين امورك معاه
خلي خيط رفيع  بينك وبينه ....جايز جايز يقوم لك محامي
او يبقى يشقر عليك في السجن وياخد لك عيش وزرنيخ..... قصدي وحلاوة
ونصيحة بقى من اخت ليكم....كل اب قبل ماينام لازم يروح لابنه ويساله
 بعد مايبوس ايده طبعا....راضي عليا يابني... واياك  واياك تمشي قبل مايرضى عليك
بالذمة ياشعبنا الحرية عندنا في بلادنا مقطعة بعضها اوي
وحقوق الانسان كاملة ومكملة مش فاضل ياعينى غيرالاب {ابن الذين ده} اللي ضرب
ابنه لما دخل البيت وفي ايده ازازة بيره
احنا عمالين ننزل لتحت  لتحت وبعدين بقينا في أسفل  سافلين ومش لاقين تحت ولا اسفل
اكتر من كده...فبنعمل ايه ؟؟ عمالين نحفر لتحت  بكل همه عشان نتدهور كمان وكمان
بلا خيبة جرا خيبة شادة خيبة لازقة برضه في خيبة
انتظر ردكم على اول مدونات كركر ... واللي ضحك أو ابتسم  لازم يعلق

أهلا بك

05/12/2008

،

11:51 م

.. من قبل masryeen

..

..

دائما مواضيعك شيقة لها طعم خاص
يملؤها الابتسام
دمتي متألقة دائما
...................
تحياتي

تعليق بدون عنوان

05/13/2008

،

04:35 ص

.. من قبل starlight

..

..

ههههههههااي
ضحكتيني والله يا اميرة على طريقة انظر حولك دي .
أظن دي طريقة جديدة من قيادتنا الحكيمة في تحديد النسل
ماقصدش أنظر حولك بتاعتك يا أمورة ..
أقصد قانون معاقبة الأب عندما يحاول أن يربي أبناءه .
يا ستي ... ماهي خربانة خربانة
عيال اليومين دولا أصلاً تفوقوا على كل مصطلحات التشرد والتبجح وقلة الأدب
يعني هتيجي على الأب وللا الأم ؟؟؟
خليهم يدوقوا نتيجة عمايلهم ههههههااي
غلبوا في دس الموانع والهرمونات في الفراخ والخضروات والفاكهة
قالوا يجربوا حاجة جديدة .. فكرة عبقرية .!!
مدونتك جميلة جداً
لا تقل جمال عن الآخرى
متابعة لكِ ولملائكتك الصغار
محبتي

هدوء ،

تعليق بدون عنوان

05/13/2008

،

07:50 ص

.. من قبل la7neshtiaa

..

..

والله دول ناس فاضية
اذا كانوا عايزين يعاقبوا البهبهات اللى بيضربوا ولادهم
يروحوا يعاقبوا ابو البلد الكبير احسن

وعموما اعتقد ان القانون الجاى هيكون
اللى يفكر يتحرك وميفهمش الدرس كويس
هيشنقووووووه

اشكرك على موضوعك
تحياتى
لحن اشتياق

لا داعي للإبتسام !

05/13/2008

،

08:14 م

.. من قبل lastdinner

..

..

الحقيقه الموضوع ممكن يكون كوميدي
لكن انا شايفه جد
و موافق عليه كمان
لأننا لسه متعلمناش يعني إيه حقوق إنسان و حقوق طفل
الموضوع مش ضرب و خلاص لكن فيه ابهات بتشغل أطفالها أو تجبلهم مرات أب تسود عيشتهم
لازم نفهم إن الأبويه و الأمومه حاجه و الإستعباد حاجه تانيه !
أخوكي حازم

الامر لله من قبل ومن بعد

05/13/2008

،

08:53 م

.. من قبل ameera1977

..

..

شكرا لك ياخي حازم على التعليق.. ولكن الحقيقة لازم نعرف مكانة الاب في الاسلام ولو كان ظالم
ولا يجوز باي حال من الاحوال التعاطف مع قانون حق يراد به باطل ....
اكيد كل حقوق الانسان منتهكة في مصر
فلا استطيع تصديق حسن نوايا من يقروا مثل هذه القوانين
لنصبح مسخ من العالم الغربي...
فاذا اكتملت حقوق الانسان وابسطها لقمةالعيش نبحث في هذه الخزعبلات

محدش واخد منها حاجه00

05/14/2008

،

01:13 م

.. من قبل rodhawp

..

..

اضحك الله00سنك
تحياتى

الله المعين

05/20/2008

،

04:09 م

.. من قبل flaan

..

..

يلا بيعين الله
كلها كام وسنة ويتريح الشعب المصري من المتقنع بزي الأب _مبارك_ ويتريحوا من كل حاشيته

جزيت الجنة ونعيمها

كركر أميرة أحلى من كركر اللمبي

05/21/2008

،

07:10 م

.. من قبل mounirbahi

..

..

اعتبريني سيدتي مجاملا ومنافقا وكذابا ..
فقط..أؤكد:
تملكين روح دعابة متميزة جدا..
وأسلوب في الحكي سلس وحبوب ينزع الابتسامة بصدق..
وحتى الضحك..الصافي.
والأكثر من هذا الفكر الراقي الذي يجعلك أرقى مما يضحك به كاتبو تفاهات اللمبي وغيره..
لك احترامي
وسلامي للعيال

اخجلت تواضعنا يااستاذ منير

05/30/2008

،

09:00 م

.. من قبل ameera1977

..

..

كم جميل ان يمتدح مدونتي شاعر كبير له ثقل مثلك

واتمنى ان اكون دائما على مستوى الثقة

دمت بخير

شكرا استاذ خيري

05/30/2008

،

09:00 م

.. من قبل ameera1977

..

..

على متابعتك مدونتي باستمرار
واتمنى الا تنقطع عنها ابدا

شكرا لك

تحياتي ابو الهيثم

05/30/2008

،

09:02 م

.. من قبل ameera1977

..

..

لك كل التحية

واتمنى ان اكون على مستوى ثقتكم في مدونتي كلما تدخلون لزيارتها

أرسل تعليق
من:	*  عضو مسجل: [ دخول / التسجيل ]
* عنوان الموقع:
* البريد الإلكتروني:
الموضوع:
* النص:
* الرمز: