كركر

أجازة عقبال عندكم

طبعا أنا باعتذر عن غيابي عنكم وعن (كركر وأم وتلات عيال)   الفترة دي وده بسبب عطلة الصيف واللي أنا مسافرة فيها حالياً  ومشغولة شوية ..طبعا باقول لكل الأصدقاء إني ماقدرش أأقصر في متابعة كتاباتهم

ولما تخلص الأجازة بإذن الله لنا عودة مع كل قلم وحرف جميل...

صيف جميل إن شاء الله عليكم جميعاً...وأجازة ممتعة للكل ...

وأكيد لما أرجع هايكون فيه حكايات كتييييييييييير نتكلم عنها..

نكته على الماشي مع كل احترامي للصعايدة..

2 صعايدة بيلعبوا شطرنج الملك مات مشلول..

أشوفكم على خير..

اضحك كركر من قلبك

أيها القوم الأعزاء هاتنحى في تدونتي دي عن الكتابة ..وأسيب موضوع فرفشتكم وضحككم لمن هم  أقدر مني بكثير خمس دقايق تنسوا فيها همومكم

بجد أنا باحب كل ماهو أبيض وأسود وباكره الألوان اللي بقت تحدف بلاوي على الواحد وهوا قاعد لا بيه ولا عليه

يحاولوا يضحكوك بالسكينة  أو بالموس  في وشك فتقول ااااااااااااااه وتفتح بقك يقوم يتهيألك ان انت بتضحك 

وبعد مايفوت ساعة من الفيلم وانا ماضحكتيش لسه ..أأقول ياربي يعني لو كنت قعدت مع عيالي مش كان أحسن ....كنت ضحكتيلي ضحكتين على قلمين على شخطتين وشلوتين تبقا السهرة تمام

لكن نجوم زمان بنضحك معاهم من القلب لأن مواقفهم خارجة من القلب ومواهبهم فذه بجد

الريادة بواسطة خالتي سعاده

شكر خاص أتوجه به إلى ستارنا ولايتنا ..هدوء صاخب على كل مجهوداتها معي في محاولة لتطوير شكل مدونتي واضافة أغنية مصاحبة للمدونة أشكرها من كل قلبي والشكر لايكفي..فهي لم تدخر جهدا في مساعدتي ابدا..وأود ان أشكر الاستاذ عبد العزيز على محاولته مساعدتنا بتنزيل الكود في مدونته ولكني لم أفهم التفاصيل الا بمساعدة رفيقة الدرب هدوء ..لهاالشكر الخالص واهديها الاغنية المصاحبة لمدونة كركر وقد اختارتا المطرب وجيه عزيز والذي له مذاق خاص ..يعبر عن هموم الشعب

 الواحد مش عارف ايه لازمة الكلام كل يوم والتاني عن الريادة الاعلامية في وطننا العربي
ريادة ايه بالذمة الكلمة اللي بتخلي ام الشخاشيخ تركبنا وتعفرتنا حابس حابس ..وخصوصا لو
حد مش مصري بيتكلم عن تقدم الإعلام في بلده ..وانجازات بلده العظيمة في الفضائيات البتنجانية..نفرد البوز
المتين وننفخ  النفاختين في الخدين ونلزق شفتنا الفوقانية في المناخير .ازاي الريادة العظيمة راحت مننا احنا المصريين؟؟
بلا وكسة والنبي ..خلينا نفوق بقا ريادة ايه اللي انت جاي تقول عليه (ياقلبي ياكتاكت ياما انت شايف وساكت)
سيبوني بقا أفش وأبعبع اللي في قلبي احسن افرقع منكوا ماتلاقونيش تاني..
ياخواتي هاتجنن كل ماأقلب على الفضائية المريخية البلوتية المصرية ألاقي برامج اغاني وبعدين برامج
طرب وبعدين بقا التغيير برامج كليبات..هوا ازمة الغلابة حصلت الفضائية المصرية كمان
اغاني اغاني اغاني ..بصوا معايا كده وانتوا الشاهدين والنبي
برنامج اتسلي معانا.سباق الزمن الجميل .النشرة الإخبارية  .برنامج ساعة طرب
  أغاني دوت كوم.برنامج البيت بيتك.موسيقى في الحي الغربي .سباق الاغنيات
يعني الحل ايه مع الناس دول اللي مابييطلوش يغنوا لا ليل ولا نهار والله في برامج تانية وانا ناسيها
 بيتكلموا فيها على مطرب ويجيبوا شوية مواهب شابة تحيي ذكراه السنوية .بدل يعني الهم
 والنكد والعياط عليه وقراية قران ونزور المدافن ونوزع جوافه وبلح حمضان
كل الفرح والهيصة والهيجان  ده على ايه ؟؟..ده ولا نصر اكتوبر المجيد ..لو مافيش فلوس نعمل برامج عدلة زي بقية الفضائيات
يبقا وحياة اعز ماعندكم (اللي هوا برنامج البيض بيضك)تشطبوا وتجيبوا ضلافها بقا وتريحونا بلا الريادة بلا خالتي سعاده
فضحونا في وسط الفضائيات المنحطة ..وخلوا رقبتنا قد حبه السمسم
ريادة ايه بس اتدلدلنا وبقينا ورا خالص عند بتاع الكشري اللي في اخر الشارع
وبعد الغنا والتطبيل والرقع والخبط وبوم بوم بوم ليل نهار لما ودانا طولت لفوق(زي أرانب يعني مش حاجة تانيه ياشريرين)
نقول اهم المذيعات بيطروا القعدة شوية  ومنتيجين للنسمات الباردة في الحر ده..تيجوا ياجماعة نقفل الصوت
ونريح ودننا من الزمامير والطراطير دي ونخليها فرجة بس ..تلاقي مناظر ماتسرش لا عدو ولا حبيب
هاموت اموت واعرف بيلموا المذيعات دول منين ..من على القهاوي .يكونش شباب عاطل عن العمل وعاملين له ماكياج
يجنن ..يخبل ..ويطير العقل..ولا جايبنهم من سجن القناطر قسم البلطجة النسائية
تلاحظ الضيف المسكين اللي بيجبوهم في البرامج الهايلة بتاعتهم .. قاعد قرفان والكآبه طالعه على وشه
مالوش نفس يبص للمذيعة بتيتا بيكلمها زي مايكون مخاصمها ..والله انا باعذره
أكيد بيعملوا طلبات التوظيف والشروط كالأتي:مذيعات الفضائيات للعمل في القنوات المصرية
1-السن لابقل عن54  سنة مع الشغل والنفاذ والرقم قابل للزيادة غير قابل للنقصان
2-الوزن لا يزيد عن 250 كيلو جرام يعني يشترط الرشاقة ويشترط ألا يزيد عدد التجاعيد في الوجه عن 32 تجعيده تتركز في منطقة الذقن والعين
3-حسن المظهر والاناقة وخصوصا الاهتمام ارتداء التاييرات اللامعة جدا جدا المرصعة بالترتر مع وضع وردة على الصدر
لايقل حجمها عن نصف متر حتي في اوقات الظهيرة
4-الشعر لابد ان يكون اصفر جدا (اشقر)بغض النظر عن لون البشرة حتى وان كانت كحلي او بني منقط باسود
5-لا يشترط اجادة ايا من اللغات ...فقط تكفي لغتنا العظيمة اللغة العربية ولا يشترط اجادتها التامة ..نقبل الركيكة
6-لا يشترط اجادة مخارج الحروف ..نقبل الألدغ وابو لته في لسانه والاحول
7-أهم شرط ان يكون له علاقة بالكوسة ابن محاور ..خال مصور ..جوز مخرج ..مرات مذيعة..والاقربون اولى بالمهلبية
والله ياخوانا كل اللي قلته مافيه ذرة مبالغة
من غير تريقة على خلق الله انا شفت مذيعة عندها حول في عنيها  ..ومذيع ألدغ مش بيعرف ينطق حرف الراء غير يقولها حرف إغ بس
وحاطينه في كل البرامج الكروية والنسائية والترفيهيية بيقول (الى لقاء اخغ واشوفكوا بوكغا وتصبحوا على خيغ)
يستهلوا التريقة طالما بقوا مذيعين ..والله دي نكته لوحدها مذيعة حوله ..ابصلها كويس وامقق عنيا
واقول ياربي هيا بتبصلنا احنا ولا للمخرج اللي في الكواليس..ولا خلصت النشرة واحنا مش واخدين بالنا
واللي مجنني كمان المذيعات رغم سنهم الكبير بيطلعوا على الشاشة ووشهم مليان حب شباب (طب ازااااااااااااااااي)
والمذيعة تلاقيها متختخة ولابسة بادي مفرقع من جنابه وبنطلون برمودا تحت الركبه كأن عندها 18 سنه ..
ياختي مابصتيش في مراية وانتي طالعة من البيت..والله تيته أحلى منك ..وناقص تعملي شعرك زعرورتين وتلبسي مريلة كحلي
المصيبة الكبيرة يوم مالقيت مترجم عظيم في فضائيتنا الحبوبة اللهلوبة في مهرجان استعراضي عالمي للاطفال في مصر بيقول لبنت
من كرواتيا تسال زميلتها وكانت اجنبية برضه (how old are she)
اقسم بالله ده حصل ..انا لقيت نفسي ميته على روحي من الضحك ..يانهار اسود ومنيل ..ياخلق هو دي بلد عايزة تتقدم
are she ياراجل طب خليها  r s t u v تبقا مفهومة شوية اديك على الاقل بتسمع صح الحروف بالترتيب
طبعا يااخواني في الكفاح من اجل الحق ..انا مش بادافع عن المذيعات على الفضائيات الصاروخية زي اللبنانية وغيرهم واللي فيها المذيعةبتشتري
مناديل وايشاربات تلبسها كفساتين سهرة حتى في عز الشتا والشتا هناك زي ماتعلموا حضاراتكم برد قارص وتلج ..بس هناك
بقا بيحاربوا البرد بالمناديل الصوف  اللي بيلبسوها
ولكن انا برضه باعترض على الكوسة في بلدنا اللي حصلت حتى المذيعات ..وكأن مصر مافيهاش بنات حلوين وفي نفس الوقت محترمين وشيك
واجهه يعني (مش  قصدي فاتريينه)
خديجة بن قنه مذيعة الجزيرة بعد الحجاب ..والله تضرب اي مذيعة مصرية من الحيزبونات اللي افشيين في كراسييهم من 84 سنة
فاتوا ولا هما محجبات ولا نيلة بس شكلهم يجيب الاسهال الحاد والمزمن من البلا اللي لاحقهم
ده غير البرامج التافهه اللي ميزانيتها ربع جنيه بيلموهم من جيوب العاملين في البرامج زي اتسلى معانا
حد شافه ياخوانا؟؟..في حد لغاية انهارده بيلعب( x o)على ورق اللحمة حتى..؟؟ مش في برنامج  في قناه فضائية بتنجانية عباسية
برامج تجيب التخلف للمشاهد لما يشوفها يجيله تلخلخ نفساني واهتزاز عاطفي وانحلال في التركيز وانحطاط مخيخي مع اصفرار حاد في البشرة
وكل ماينجح برنامج حواري في قناه مصرية تلاقي القنانة التانية تجري تعمل زيه بالظبط
البيت بيتك ..العاشرة مساء..90 دقيقة..نفس الاخبار بتتقال في 3 محطات في نفس الوقت بس  الذكاوة ايه بقا
العاشرة مساء كان واكل الجو ..قاموا عملوا 90 دقيقة من 9ونص يبدأ.. يكون الخبر اتقال مع معتز وبقا خلاص خبر بايت مع منى الشاذلي
اللي بيصعب عليا ويخليني أعيط الضيوف الغلابة ..اللي بيقف معتز ومنى يشدوا في دراعاتهم يمين وشمال ويقطعوا قميصه عشان يروح
قبل التاني في برنامجه ..وتلاقيه شعره اتنكش وبيلهث وفاتح بقه يقول نفس الكلام ويتسال نفس الاسئلة الحمضانة اللي لسه مجاوبها من دقيقة واحدة..
انا بس عاوزة ااقول ان الفضائيات الاخرى بيتصرف عليها كتير جدا وفيها ابهار بيشد اغلب المشاهدين العرب
بس برضه في الاخر هيا نسخ حمضانه من برامج اميريكية شهيرة (من سيربح المليون.الخاسر الأكبر.انتي احلى.كلام نواعم.العراب.ستار اكاديمي)
الفضائيات دي تطورت عن الفضائية المصرية بشكل كبير رغم ان الفضائية المصرية بدات من زمان من قبل النايل سات
يعني تدهورنا بالاوي لدرجة اننا ماحصلناش النسخ المحروقة من البرامج الاجنبية الشهيرة..امته الاعلام العربي هايطور نفسه بجد ويقنع المشاهد
ويوصل للعالمية وينشر الثقافة الصحيحة لدولنا الاسلامية والعربية ..ولا هانفضل تحت في القاع ماحدش يسمع عننا وكل العالم فوق شايفين بعضهم وفاهميين
ثقافات وحضارات مختلفة من خلال اعلام متميز..وطول مافي كوسة هايبقى فيه محشي والمحشي بيتخن المذيعات ومافيش فايدة يازغلول ياخويا

البوندوجه ياجبيصي ياولدي

مراتي ..ولا هيفاء وهبي

مراتي ..ولا هيفاء وهبي؟

انتوا معايا ياجماعة ان الرجالة انانين ولا لأ وخصوصا زمانا ده
ااقدر ااقولكم ان اغلب الرجالة اللي بيتفرجوا على الفضائيات وماأدراك مالفضائيات
واللي بتسرسبه (قصدي بترشه)علينا من الفاتنات الرشيقات الجميلات الدلوعات أمثال(اليسا صاحبة اكبر رقم قياسي
 في وزن السليكون في صدرها  وهيفاء الفيحاء الفرعاء صاحبة الوسط اللي محيطة 3 ميلمميتر ونانسي عجرم القطقوطة الننوسة
 الفسفوسة )اغلب الرجالة بيقارن بين مراته الغلبانة اللي قاعدة تربي العيال وبين الفاتنات دول والله حرام
اعرف راجل من قرايبنا ماسك مراته في الرايحة والجاية ...شفتي الستات اهي دي الستات ولا بلاش ستتات تحل من على المشنقة
بصي لنفسك في المراية خسي شوية وبطلي اكل محشي
اه لو الواحد كان معاه فلوس كان جدد شبابه مع مذه صغيره(تجدد ايه بس هيا رخصة عربية)
ياراجل يامعفن واالله انت حق ربنا تتقطع وتتشفى وتتحط في 3 اكياس كبار واحد لونه اسود والتاني بقا اسود والتالت برضه اسود
بس لما تتقطع يبقى مش بالساطور ..انصح كل زوجة بأصافة الضوافر حته حته من غير بنج عشان يتعذب على اصوله

يعني كل راجل بيذل مراته بشكلها اللي اتغير بعد الهم والغم اللي شايفاه بسلامتها على ايديه
يعني من كتر ياخويا مانت مهنيها اوي ..مانت مشغلها في البيت ولا الخدامة وموريها المر
يعني في الرايحة والجاية تقولها ماتعملي شعرك عند الكوافير وتغيري لونه هوا انتي مش شايفة الستات عاملين ازاي
تقوله هات ياحبيبي 120 جنيه
ياشيخة بلا هده وكلام فارغ سرحيه انتى ياروحي
ياراجل يامأياح مستخسر فيها ملاليم وعاوزها تبقى زي هيفاء وهبي
انت عارف هيفاء وهبي دي بيتصرف عليها كام عشان تطلع كده ..بتاع 35 عملية تجميع
طب ده حلال ولا حرام
الراجل ده مابصش لخلقته في المراية  وقال كلمة حق(والله كويس ان الست دي مستحمله اللي انا شايفه ده)
 ماشافش صلعته اللي بيزحلق عليها العيال في الشتا بعد ماالدنيا تمطر
ماشافش كرشه اللي مخبي ومحوش فيه  محشي وبط وفراخ و97 كيلو رز وتموين من 10 سنين فاتوا يفكوا ازمة الغلابة
الست وبتحمل وبطنها تكبر مع الحمل وده بياثر على شكلها وانت ياستاذ بطنك بتكبر ليه بالذمة ليك عذر
مش جايز مراتك قرفانة من سحنتك بس كاتمة في قلبها وبتسر
طب اتقي الله هيا واحدة زي هيفاء الفرعاء الجدعاء الفيحاء هاتبصلك على ايه حتى لو معاك فلوس
مش تحمد ربنا ان مراتك راضيه بيك تشوف سحنتك عالصبح وبالليل والضهر واناء الليل واطراف النهار
ومستحملة شخيرك اللي بيصحي الجيران اللي في الدور التاسع ويقوم الديوك من عششهم تدن نص الليل
فكرت انت مرة تحسن شكلك وتغير حياتك
فكرت تقوم من مكانك الي انت متبت فيه من 4 ساعات قدام التلفزيون تساعد الغلبانة اللي بتطبخ وتغسل وتنضف وتذاكر للعيال
وتدلع في سحنتك كمان ..قوم اتلحلح احرق شوية البلاوي اللي شايلها على قلبك
هوا انت ليك نفس.. والست مالهاش نفس تشوف حاجة عليها الطلا
مافكرتش مرة تروح للميكانيكي يظبطلك بلاويك ويعملك عمره ..الشكمان اللي مخروم في مناخيرك
الرفارف اللي ضربت لبره وكمان واحد اكبر من التاني
التانك بتاعك اللي معبيه دهن بدل البنزين
الإزاز القدامني المدغشش (عينك ياعني)اهو يركبلك مساحات
ولا تلبخ صلعتك دي لبخة زبل حمام جايز تزرع وتنبت من تاني كسبرة خضراء ولا بقدونس
يعني اتقي الله هوا الزمن ماشي عليها لوحدها ولا عليك انت كمان
يعني مافيش مراية تبص فيها ..
عايش في الماضي وفاكر نفسك حسونة فهمي...ياراجل انت بالكتير حسونة الفطاطري
بطلوا يارجالة تذلوا ستاتكم ....ده هما شايلين عنكم تعب كتير
انت بتشتغل وترجع من شغلك  تبقى عواطلي تلزق في الكنبة لما كرشك يدلدل وعيالك يتكعبلوا فيه وهما بيجروا ..
وتتأمر عليها وهيا برضه راجعة من الشغل زيك وتعبانة
ده حتى تلاقيها هيا اللي اشترت الحاجة من السوق
خلصت الغدا.. لسه كتير ..جعانيييييييييييييييييييين..ماتهز طولك قوم يامقطف
طب اعملي لنا كوبايةشااااااااااااااااااااي
يعني ماعندكش ذرة رحمة ...ده لو هارون الرشيد اللي هوا هااااااااااااااااااروووووووون الرشيد كان زمانه  قام عمل كوباية الشاي دي
ارحم الغلبانة دي شوية ..يتغدى ويقوم يشخر وهيا  تفضل صاحية تشطب مواعين وتذاكر للعيال وتحضر لسيادته هدومه وتكويها
الهي تتكوي يابعيد في نار جهنم يامفتري ياظالم
وعايزها تهتم بنفسها هيا لاقية وقت تغسل وشها حتى... انت مديها فرصة تشم نفسها
الست ربنا خلقها تتستت وتتدلع ..امال عاوزين تبقوا قوامون ازاي بس ؟؟؟ قوامون ببلاش ؟والله الست في مصر بتتحمل  بلاوي جوزها اللي
بيخليها تشيل حمل تقيل قد جبال الألب...مفكرتش في يوم الحساب هاتقول لربنا ايه؟
على العموم انا قلبي مع كل زوجة بتشتغل وتساعده كمان  في مصاريف البيت وقايمة بكل شغل البيت وبتذاكر لولادها وووووو   الخ
باحترمها ولا احترم جوزها اللي ربنا خلقه قوام عليها ..القوامة رجولة ومسئوليه وتحمل وخدمة من تقوم عليه وتلبية احتياجاته
وماحدش يقولي إن هيا اللي طالبت بالمساواة ...والله دول ضحايا ستات تانين مرفهات من مجتمع تاني هاي كلاس فاضيين قعدوا يطالبوا بالمساواة
لحد ماحملوا الستات الغلابة فوق طاقتهم وحطوهم في وضع لازم تشارك في مصاريف البيت عشان تعيش
وبعد كل ده عاوز يتجوز واحدة تانية اصغر واحلى وارفع ..والله الست لها حق في الساعه دي تدك جتته في سيخ محمي
على قنطار فحم ملتهب.. وتهوي بسرعة وتجيب الجيران معاها يهووا كمان ..وتعمل منه شيش بالوظ
الرحمة والعدل ..بلاش نكران جميل.. بلاش تجرح الست في انوثتها بمقارنتها بالعاهرات ولا انت ياخي عاوز واحدة دلوعة
تبسطك وتبسط الخلق كلها معاك زي اللي بنشوفهم دول
كل راجل بيقرا المدونة لازم تقدر مراتك صح ..وبطل تعيش في الاوهام بلا هيفاء وهبي بلا خيبة يعني انت كمان ياخويا
كنت مستر إيجيبت ..ولا حصلت مستر كاراتيه كمان..خليها في سرك بقا وخلي الطابق مستور

كل اللي فات ده للراجل الظالم لمراته وبيهنها ويجرحها من غير مايحس قد ايه كلماته تأذيها ..خلي بالكم ياقوم

واشكر كل اللي يحترم مراته وبيجبلها ولو منديل يؤية..ويقدرها ويحترمها ..كل الشكر

إتفضل انت .لا إنتي .لأ بقا انت

ايه اللي بيحصلنا ده ايه البلبلة دي ...لخبطونا ولخبطوا دماغنا حرام عليهم
الختان حرام ولا حلال ..المسيارحلال ولا حرام والشيخ ابورضعة ..وشيخ زواج المتعة...
خالد الجندي يحرم العرفي ويطلع متجوز عرفي من مسيحية
د. علي جمعة   2003    الختان مكرمة وله أصل في الشريعة والسنة
د .علي جمعة   2007 الختان حرام ولم يرد فيه نص شرعي
اذا كان ده المفتي امال صُباينه الصغيرين بيعملوا ايه؟؟؟؟؟
ياناس ياللي ماسكين السبحة ومربين الدقن .....ايه الهباب اللي بتهببوه ده؟
نفس الشيء حدث مع آراء الدكتور محمد سيد طنطاوي شيخ الأزهر التي كانت آراؤه السابقة تؤكد
 مشروعية الختان ومنها فتواه الصادرة عن دار الإفتاء عام 1987  والتي أكد فيها أنه طبقا للنصوص الشرعية وكتب السنة
 والفقه فإن الختان للرجال والنساء من صفات الفطرة التي دعا إليها الإسلام وحث علي الالتزام بها
 علي النحو الذي بينه رسول الله (ص )ليتراجع عن هذا الرأي أثناء مؤتمر
مؤسسة تارجت معلنا أن الختان مجرد عادة وأن الختان للرجال فقط  وأن أحاديث ختان المرأة رويت من أوجه مخدوشة
طبعا مش باتكلم في الختان ..انا باتكلم في مصداقية شيوخنا الكبار
  بالذمة دول بني ادمين نسمعلهم كلام ..ده الحرامي مابيغيرش مبدأه ولا كلمته.دول مكانهم بالكتير فقها يقروا في ترب الغفير...
وياكلوا قرص ميتين عل قد مقامهم برضه(يعني بالسمن البلدي)وبلح أبريمي وجوافة
او يشتغلوا حانوتيه بس دول لو شالوا ولي في خشبتهم يودوه النار
 واالله دول ممكن يأذوا الميتين ...الميتيين بيحتاجوا هدوء وسكينة وسلام.. ودول سبب كل بلبلة ولخبطة في دماغنا
يعني الميت من دول هايقولهم حرام عيكوا انتوا ورانا ورانا  سبنا لكم الدنيا جايين برضه ورانا
او يشتغلوا حانوتية (بس دول لو شالوا ولي  صالح على خشبتهم يودوه النار)
هايقابلوا ربنا ازاي ويقولوا له ايه... احنا ماشين حسب ماتقول الارصاد الجوية
في برنامج المذيع المبدع دائما  آحمد عبدون (صاحب برنامج الإتجاه المعاكس النسخة الشرشوحية المصرية)
اللي مابيرتاحش ولا يهناله بال غير لما يجيب اتنين دعاه مش طايقين بعض كل واحد ماسك نبوت في ايده مخبيه
تحت الترابيزة يرزعه في دماغ الشيخ اللي جنبه أثناء الفاصل حتى لاحظوا دايما ان شكلهم بيتغير بعد الفاصل    
في مرة مانساهاش جيه الجهبزالعظيم وهو  نجوم الدعوة  والفضائيات اللي ظهروا على الساحة (صبري عبد الروؤف )
كانوا بيتكلموا  عن قضايا اثبات النسب وقال بالحرف اللي زنا بواحدة وجاب منها عيل مايتجوزهاش يستغفر ربنا 3 مرات في اليوم
اما المراة تتحمل نتيجة غلطها كأنها يعني خلفت لوحدها بالانقسام الميتوزي
لانها فاجرة وزانية ومش عاوزين نفتح باب اثبات النسب بالDNAلان كل واحدة طمعانة في راجل غني هاتغريه وتوقعه وتخلف عيل
يقش كل حاجة ونبقى حققنا اللي هيا عاوزه ...كأن الراجل ده بريالة ..وياعيني مستني اي واحدة تشاورله ولا تغمزله  خلاص يقع من طوله
ويبقى مسلوب الإرادة بعد ماالست الشريرة خلته يشرب حاجة اصفرةى...ايه المنطق  الذكوري الاهبل ده
للاسف انا مش قادرة اصدق نقائهم وتدينهم ومظهرهم اللي غير مخبرهم
مرتين حصل موقف يدل على ان الناس دي الايمان مش في قلوبهم
واحدةشابة اتصلت وقعدت تعيط انا الزوجة التانية وجوزي اخد كل فلوسي ومش سائل فيا وحابسني ليل نهار في البيت وقاعد مع مراته الاولى
وانا بافكر ااقتله وهاقتله لو فكر يرميني وكانت منهارة جدا ...يقوم عبدون المذيع اللئيم يقولهم ل(سعاد صالح وفرحات المنجي)
طيب الدكتورة سعاد صالح هاتقابلك وتجيلك...انا افتكرت ان دموعها هاتنزل واحمد عبدون هايديها كلينكس تمسح بيه مناخيرها 0اسفه قصدي دموعها
الهانم  اتخضت واتنفضت وقالت لأ ..الشيخ فرحات هوا اللي يروح وفرحات  يقولها لأ انتي يادكتورة اللي تروحي ...لأ انت.. لأ انتي
والله مافي في قلوبهم لادين ولا رحمة ...طبعا هما فاضين لواحدة بتفكر تقتل جوزها من الظلم اللي هيا فيه..
والمرة التانيه برضه كان في خراب بيت واحدة ست والعيال هايشردوا  واستنجدت بيهم بس كانت في محافظة بعيدة عن القاهرة
قعدت تتخانق الام الحنون سعاد صالح مع الدكتور صبري انت اللي تروح   اتفضل .. لأ انتي.. لأ انت ..لأ بقا انتي
ده غير بقا لما اتنين دعاة محترمين..يجوا يقعدوا جنب بعض ويفتوا في امر من الامور كل واحد براي وكل واحد بشكل ولبس ودقن
ودي ست بطرحة وواحدة بخمار واحدة لابسة جوانتي وواحدة من غير واحدة عاملة حواجبها وواحدة لا
ومش مكفيهم ضيف او اتنين لا بقوا يجيبوا 3 اه والله ملكة يوسف ذرار جنب  امينة نصير  جنب سعاد صالح
والاخيرة بالذات(اللي واقفة دايما عند باب شقتها مستنية اي برنامج يطلبها تبقى جاهزة علطول)وكل واحدة ليها راي ومافيش واحد بتدي فرصة لغيرها يتكلم
لاهي اخلاق دعاة ابدا  ..تحس 3 ستات من امبابة عامليين قعدة مسطبة ونازلين لت وعجن
دول ناس كل اللي اتعلموه قشور الدين ...سبوبة يعني ..من برنامج لبرنامج وعبي في جيبك ياواد
هنا ندوة وهنا مؤتمر وهنا برنامج وهنا انا ضيف... على خط المحمول اتصل علطول تبقى دلدول..الهاتف الإسلامي والهاتف البتنجاني...الخ
كل ده استنزاف اموال الناس باسم الدين
لأ وكنا ناقصين كمان يطلعلنا أحمد عبدون هاتف الفضفضة ..بسلامته يبقا ايه في المجتمع عشان الناس تكلمه بعد نص الليل تفضفض(ايه اللي أخششه؟)
ويقولك ايه اي حاجة مضايقاك ...كلمني وانا هارد عليك بعد 24 ساعة يعني لو واحدة عاوزة تقتل جوزها ومنهارة تتصل  تفضفض وبعد يوم  كامل يكلمها
يكون الراجل  جوزها ..الشعب بيلم جثته المتعبية في اكياس من الشوارع والأنهار والترع والمستنقعات ..
ولا واحد يائس من عيشته بيفكر في الإنتحار ومتشعلق خلاص في البلكون
يتردد شوية ..يفتكر الإعلان ..يتصل بهاتف الفضفضة ..يتكلم ويعيط ويفضفض ويستنى ..ماحدش يرد ..بعد 24 ساعة لما دكتور عبدون يرد عليه
يكون الراجل ايديه تعبت من الشعلقة ماقدرش يتحمل ويصمد ..فوقع اتفشفش ..يعني برضه انتحر غصب عن عينه
ده غير فتوى ارضاع الموظفة زميلها في العمل (الشحط يعني يرضع من الست عشان يتحرم عليها)
لأ و كمان تغير له البامبرز  (الحجم العائلي للتوفير)وتحطله البزازة في بقه بس تعبيهاله شوربة كوارع..وتجيب له سرير هزاز 7 متر
الناس دول متسلطين علينا عشان كل يومين تلاته يفرقعوا قنبلة الناس تتلهي فيها ..وينسى الشعب مصايبه ورغيف العيش ونقعد نتكلم في المسيار وخلافه
هوا الشاب ياعيني طايل يتجوز عشان نقوله مسيار ونقيم سنه النبي(ص)في تعدد الزوجات والناس مش لاقيه الطوب تاكله
يعني مافيش شيخ عنده ضمير يتكلم على ظلم الحكام والمسئولين وسرقة الشعب من الحرمية الكبار وعقابهم عند ربنا ..
والتزوير في الإنتخابات وأزمة رغيف العيش وتدهور حالنا واقتصادنا بسبب الظلم البين الواقع على الشعب
اللي فضل لنا الحواجب حلال ولا حرام ورضاع الكبير والختان والحمام ندخله بالشمال ولا اليمين  ..الخ
والله الغرب له حق يستهزأ بينا..   امتى هايكون عندنا دعاة بجد مخلصين للإسلام وبس                                                                      

أزأز لب

جعان؟طب أزأز لب

مينا فينا مش بيحب اللب كلنا طبعا لزوم التسالي يعني لمة حلوة قدام التلفزيون مع فيلم يخليك تجيب اللي في بطنك لمحمد سعد
ولا قعدة رومانتيكية على الكورنيش ماتكملش من غير أزأزة اللب
وطبعا كلنا عارفين ان حكومتنا الرشيدة الجامده اوي صاحبة المخ الالمعي
حكومة الموبايلات والاتصالات (قصدي كلام نظيف عن التقدم اللي احرزته الحكومة المصرية السنة اللي فاتت بدليل ارباح
 شركات الاتصالات بالمليارات سنويا  هههههههه)ياحلاوة التقدم ياحلاوة
من الاخر ...حنية ماوردتش على الشعب ماتلاقيهاش في اي حكومة لاي شعب تاني في العالم
اسالوني ليه؟ قولتوا لي ليه
لان كل الحكومات في العالم بتدور على تلبية مطالب الشعب من غذاء وتعليم وصحة وانتاج وخلافه بس حكومتانا حكومة مزاج عالي
 احنا حاجة تانية ....من كتر الحنية بتسهر ويجافي عنيها النوم ...تفكر ازاي الشعب يتسلى يبقى لازم نزرع لب ..اه والله لب
مع تحريم زراعة القمح ...
لأن القمح بيكلف مصر جدا ماء واسمده وبيهلك التربة فاستيراده اوفر واسهل واقل تكلفة...ويعاقبوا الفلاح اللي يزرع قمح
طيب ....صدقنا الكلام وبعدين
 وصل بينا الحال دلوقتي ان نجيب رغيف العيش بالبطاقة او الرقم القومي يعني لو عيل عنده 12 سنة يفضل واقف جعان في طابور العيش
4 سنين لحد مايطلع الرقم القومي ده يكون الكشك خلص العيش
ولا واحدة ست كبيرة في السن ساقطة قيد معهاش بطاقة تموت من الجوع ولا تلف لفة صلاح السعدني في فيلم المراكبي(ساقط كيك)
بالذمة مش دي نكته احسن من نكت حماده سلطان
اسعار القمح زادت عالميا واستيراده بالغلا والكوا طيب مابنزرعش القمح ليه... حد يرد علينا ياخونا احنا مش عاجبينكم ولا ايه
هيا الحكومة دي جايه تحكمنا ولا مع نفسها وخلاص  ماحدش بيكلمنا ليه ويفهمنا ....بلاليص احناولا ايه؟
يعني دلوقتي هانغني اغنية عبد الوهاب المشهورة وغنوا معايا لو سمحتم
اللب ..الليلة الليلة ليلة عيدووووووووووو يارب تبارك تبارك وتزيدوووووووووووووو.....

 يارب تبارك يارب...يارب تبارك في اللب
يارب تبارك وتزيدوووووووووووووووووووووووووووووووووووووو تراارراااااااااااا
والسر الدفين هوا ان اللب ينتج عن زراعة البطيخ والكوسة والقرع ودول اكتر محاصيل حكومتنا بتفهم فيهم
(تفهم بس في البطيخ ومعاملاتها بالكوسةوبتقرع علينا)
أما بقى ياشباب  بعد مالحكومة الحنينة وفرت لك اللب مالكش حق تشتكي بعد كده خاااالص
تقول بطالة تقول ازمة سكن يبقى حرام عليك هوا انت مابتحمدش ربنا ابدا
مش كفاية بقينا نمرة واحد على العالم في انتاج وزراعة اللب بجميع انواعه
الاسمر والسوبر والخشب والسوري وتوفيره لكل مواطن باسعار مهاودة
بكرة ننزل الشوارع نلاقي اكشاك العيش بتبيع لب
ودي احدث الوسائل الحكومية لحل ازمة العيش لان رغيف العيش بيظهرجواه  حاجات مش ولا بد ....الحكومة بتعملها مفاجات لتسلية الشعب
قش ..عصايه... مسمار... راس فار (جمع الفار تكسب رغيفين مجانا)ده غير انه بيسبب طوابير وزحمة وخنافات
 وضرب وضغينة بين ابناء الشعب
اما اللب فيسبب توطيد الاواصر بين افراد الشعب اللي واقفين قدام الكشك يتسلوا باللب مع بعض في لقطة ود وتآلف جميلة
الحكومة هاتقول مش عاجبنكم خلاص ...يطلعوا لنا بقا القمح المتخزن من 15 سنة ابو سوس (المسرطن يعني)
اللي بيحوشوه  من ايام السادات  علشان القديم قيمته فيه برضه ....والله احنا مش عاجبنا العجب
لب نتسلى مش عاجبنا.... قمح مسرطن مش عاجبنا برضه
ده غير أزمة زراعة الذرة وأزمة عدم توفره...يعني الناس وجاعت ...
والبهايم نعمل معاهم ايه كل فلاح مربي بهيمة يخش عليها كل يوم الصبح وفي ايده قرطاس لب ويوشوشها في ودنها
(اسمر ولا ابيض)ويشغلها في التلفزيون عالم الحيوان عشان القعدة تحلو
 طب الشعب وهايأزأز والجاموسة الغلبانة دي تأزأز هيا كمان بدل الذرة والعلف
طب الحكومة ومتسلطة علينا وعلى الغلابة وحاطنا في دماغنا ياحنا ياهيا والبهايم كمان ...لا حول ولا قوة الا بالله
اما القطن اللي اشتهرنا بيه في الماضي طويييييييييييييل التيلة زي ماكنا بناخد في
سادسة ابتدائي قبل مايشلوها وبعدين سادسة بعد مارجعوها قبل مايشلوها تاني برضه وكنا بنصدره للعالم كله
سمحت لنا الحكومة بزراعة قليل من القطن بشرط انه يكون (أطوووووشة)ولفظ أطوشه معناه قصير جدا
 قصدي قصير التيلة (لان كل قصير مكير)
بجد بجد مش لاقيه حد يفهمني طب افهم ازاي
دي مؤامرة ولا ايه ...البلد مطحونة يقوموا بدل مايفكروا نزرع وننتج ..طالما احنا في ناحية العلم صفر على الشمال
نقوم نزرع لب ...هبل ده ولا ايه؟؟؟ طب مشوها خيار ...كانتالوب ..بصل ...بتنجان حتى  ة
عموما مش مهم الرغيف ...الشعب يجوع.. بس كمان القطن ؟يعني داخلين على مرحلة التعرية
طب حاجة من الإتنين ياعريان وبياكل.... ياجعان ومتغطي ..يعني بلدنا لاهيا صناعية ولا تجارية ولا زراعية امال ايه ؟؟بلدنا مهلبية
وانا بقا ربنا يستر عليا واكمل لكم المدونة الجاية
حسبي الله ونعم الوكيل

انت اللي غلطان مش تخلي بالك

انت اللي غلطان

في وطننا الحبيب وحكومتنا اللي مش حبيبة وكل الحكومات اللي فاتت واياك ماعاد يعودها تاني ....واللي جاية مين دايما اللي غلطان ؟؟؟...
احنا الشعب ؟؟ولا المسئولين اللي مش مسئولين من اساسه عن اي شئ؟؟
القطار اللي اتحرق وكان زي علبة السردين المقفولة وحرق ميات من الغلابة غلطة مين...
مش اللي كان بيعمل شاي وقهوة  على وابور في القطر وسواق القطر المجنون اللي ادار الازمة غلط
طيب والعبارة اللي غرقت وقتلت اكتر من الف روح غلطة مين
مش القبطان اللي ادار الازمة غلط وحسب التقرير أهمل في شراء الجرادل لنزح المياه من العبارة ....لكن ممدوح اسماعيل واللي بالي بالكم ..مساكين ياولداه ماكانوش يعرفوا ان الناس
عامالة تغرق ساعة ورا ساعة لحد مافات يوم بحاله...لازم برضه نعذرهم اصلهم كانوا قافلين الموبايل ونايمين ننا زي الملايكة اللي بقرون
ماشفتوش  المنافق مفيد فوزي لما عمل مقابلة وحوار مع ممدوح اسماعيل في لندن وكان هايخلينا نعيط لما قعد يحكي عن حالته الصحية
وانه في رحلةعلاج في لندن مش هربان ....وانه حتى مش هايقدر يتكلم ويجاوب على الاسئلة الا بصعوبه ياعيني وقعدنا عيطنا تلات نقط من عينينا لحد ماورمت من التاثر
وبعدها يجيبوه وهوا زي فحل الجاموس صحته بمب احسن من صحة البغال ...ودم الشهدا ملطخ بقه القذر
حتى رئيس حي شبرا الخيمة اللي غرقت في مياة المجارى....الناس راحت له يشتكوا ... قالهم خلي العيال تبلبط
ياراجل اتقي الله حرام على كرشك المنفوخ المدلدل ده
يعني نفسي اشوفك انت والمدام والعيال نازلين مع الشعب تبلبطوا في المجاري ويارب يارب كل اللي في بالي من خيرات جوه المجاري
وخصوصا حالات الإسهال الحاد .يلاقي طريقه لبقك الحلو اللي بينقط سكر
اما حادثة حريق مسرح ثقافة بني سويف فهو غلطة اللي كان ماسك الشمعة وهيا والعة من غير مايحط في جيبه ازازة مياه صغيرة يطفي بيها نتيجة عمايله
لكن الغلطان هوا مدير المسرح والموظف الغلبان اللي مسئول عن الصيانة ..مش وكيل الوزارةولا ياحبة عيني وزير الثقافة...اللي قدم استقالته
 في حركة كوميدية لحسني مبارك وكل ماحسني مبارك يمد ايده ياخد ورقة  الاستقالة يقوم الوزير يخطف الورقة تاني ورجع في كلامه تاني يوم الصبح
بعد ماقال اشمعنا يوسف والي قعد 75 سنة وزير ده انا حته لسه نونا وصغير عنه ...امال أسوق لوحاتي الفشيكيلية ازاي
عموما ده عقابه عند ربنا واحد يكون احول ويوقفوا روقة ده جنب لوحة من لوحاته ونقول للاحول نشن بالرصاصة على اللوحة
وانتوا عارفين الباقي بقا ماهواحول ....
اما المواطن الظالم البمبوطي الصياد السويسي اللي اتقتل في قناة السويس برصاص بارجة امريكية بحرية هوا برضة اللي طلع غلطان
ازاي ازاي يقرب من الاله المقدس ويوصل لبعد 200 متر بس .....مش برضة كان يخلي باله ويبطل عمايل الإرهاب دي
يعني مطلوب من الناس الصيادين الغلابة يمشوا في قناة السويس وهما رافعين اعلام بيضا مكتوب عليها تحيا امريكا وكوندا ليفة بايظ ...ويسقط بن لادن والظواهري و الرازي والجبرتي بالمرة
اما الشرطة واللي بتعمله في الشعب ...غلطة مييييييييين؟؟
فكلنا عارفين طبعا ان المواطن اللي اتحرق في قسم الشرطة هوا اللي غلطان ..هوا اللي كب الجاز على نفسه لانه كان يائس من رحمة ربنا
بس بقا واحد فتك يقول طب واشمعنا يعمل كده في قسم البوليس ...ااقولة لان الشربة في خربة الشعب
والمواطن اللي وقع من البلكونة ده هوا اللي غلطان لانه هوا اللي جري من الخوف... بس حسب التقرير زود السرعة شوية
فوقع من البلكونة قدام عياله ومراته ....الظابط مالوش دعوة ولا جوز الخيل اللي بيسموهم سفاء شرطة ...حتى غلا بة وعلى نياتهم
ويتحطوا عالجرح يولع
وهانفضل للابد ....مين اللي غلطان ؟؟؟؟ طبعا انت
اما المسئولين يعملون بنظام  الاقربون اولى بالمعروف... فهما شغلتهم طبعا يراعو مصالح بيتهم وعيالهم اولا.. مش انت ياغلبان هوا انت تقربله ايه
...يعني المسئول يخش على الكرسي تلاقيه حلو وسمبتيك... شوية بشوية تلاقيه عمال يتلغم  ويبقلظ ويتنفخ .وكرشه يكبريكبر يكبر....
لحد ماينهج ياعيني من كتر المسئوليه اللي شايلها في جيوبه ...اسفه قصدي على اكتافه

وحسبنا الله ونعم الوكيل

انت ياعم بص عالموبايل

بعد ماالناس ضحكت وفرفشت مع حلقتين مواصلتك لجهنم .نكمل بقى في أحوال شعبنا ..تعبان ومطحون صح؟ الاغلبية هيا الفقرا صح؟الناس مش لاقيه العيش الحاف صح؟ مش مكفيين بيوتنا عيش وزيت وسكر مش اللحمة
أمال نفسر بايه ظاهرة الكماليات اللي بقت موجودة في اغلب البيوت
الكل عنده دش ورسيفر الكل معاه موبايل (خط ولا كارت مش مهم بس المهم فترة السماح عشان نفضل نرن لبعطينا )المهم لازم يكون فيه موبايل
الراجل وعيلته ممكن يبقوا فقرا دقه والفقر داقق عضمهم وتلاقي الراجل شايل موبايل
والست ليها موبايل والواد الزبلة هوا كمان ليه موبايل
والموبايل ايه لازم لازم حسب احدث خطوط الموطة في تيمور الشرقية يبقى في الايد
تلاقي الراجل بنطلونه مليان جيوب وفاضية ... بس فرحان اوي وشايل الموبايل في ايده عشان الكل يقول الاستاذ عجمية معاه موبايل
الست شنطتها فيها كل غالي ونفيس بس الموبايل لازم يبقى في الايد ومدلدل منه سلسلة حرف (إع)لزوم الروشنة
وتلاقي الراجل بيشتغل موظف غلبان والعفن مالي حياته... وفي ايده موبايل حديث
هوا من البيت للشغل ومن الشغل للبيت... طب ماهو أساسا مكتبه عليه تليفون عشان مراته لو احتاجته ..وياختي خايفة عليه اوي لايطير.. هايروح فين يعني 
بس قال من كتر الحب ماهو مقطع بعضه بين المتجوزين الراجل معاه موبايل يرن للست والست ترن له .ولو الشحن خلص تبقى مصيبة الراجل يلف حوالين نفسه والنبي ياعم ماعندكش شاحن اصل الشحن خلص (يادي المصيبة بقى شرطة واحدة .. واحدة بس هاعمل ايه ياربي)قال يعني مستني مكالمة من احمد شوبير
ايوه ياحبيبتي انا في السوق اجيبلكم طماطم.. بس ده الكيلو بخمسه  جنيه خلاص بلاش بلاش...طب في هنا فراخ بس الكيلو ب12 جنيه ..بلاش بلاش طب خلاص ياحبيبتي .اقفلي انا في السكة اهوا وحضرلنا الطوب بقى اللي هاناكله على الغدا
يكون صرف في الموبايل 5جنيه اللي كان هايشتري بيهم الخضار
ونادر ان حد يشيل موبايل عشان يتكلم فيه ..كلهم شايلينه عشان يسمعوا الرنة ورنتك باسم حضرتك ..وفلوس بتتصرعالفاضي بتكلف شعبنا ملايين كل شهر تقع في الاخر في حجر بتوع فودافون (اقوى شبكة صيد في مصر)وموبينيل (رن من القلب)
والست كل مشاوريها الطشط المخروم اللي في الحمام و الحلة المصدية اللي في المطبخ
يعني كل الناس دول ماهماش بسبس مان ولا وزرا ولا دكاترة ممكن يجيلهم حالة طارئة البت تبقى في الكليه وراجعة بيتها وتقور لامها وهيا في التاكسي خلاص ياماما انا في التاكسي قدامي 5 دقايق ماتقلقيش ياحبيبتي
وتطلع على سلم البيت وتقول ايوه ياماما انا على السلم اهو
وامها تقولها (في الموبايل) وانا على الباب اهو ياحبيبتي (واساسا هما سامعين بعض من المنور)مش من الموبايل ..وانا ياماما قربت على الباب..وانا ياحبيبتي بافتح اهو... يتقابلوا وهما لسه فاتحيين الموبايلات {أحممممممممممممممممممد منىىىىىىىىىىىىى آسفة آسفة اصل اتلخبطت شوية .....ماماااااااااااا بنتي حبيتيييييييييييييييييييييي هييييييييييييييييييييييييييييييييه ...حمدالله على السلامة}
لا وايه ...مش مكفيهم ان كل ناموسة في بيتهم معها الموبايل..لازم يتغير كل سنه يبقى الراجل مش مكفي اهله... وابنه قاعد عواطلي يمضغ في لبان واخته فاتها القطر بسبب حالتنا الاقتصادية المعفنة ويقولوا لابوهم ايه:الموبايل ده بقى شكله فضيحة خالص ده انا باتكسف يابابا اطلعه قدام الناس لازم تغيره وتجيبلي ابو كاميرا
قال يعني هايصوروا الأمله.. البيت معفن والشوارع مليانة زبالة (أصل الحكومة ماعندهاش مكان تشيل فيه الزبالة فابتحوشها عند الشعب أمانة يعني) ومافيش فلوس
لرحلات جامدة لشارم او الغردقة يبقى هاتصوري ايه .والنبي الناس اتهفت في مخها
تلاقي واحد صعيدي في الشارع شايل موبايل لابس الجلباية ويقولك ايه ...وممكن مابيعرفش يقرا ولا يكتب ..الموبايل ده بكاميرا ويجدر ينجل ملفاااات من الكامبيوطر للموبايل وينجل ملفات من الموبايل للكامبيوطر و كمان رنات مجسمة وعطش الجيم)وحاطط عيله اليييساه ونانسي عشرم وبيصور فيتيو 60 دجيجة يابوووووووى
ورنتك بقى باسم حضرتك ولا رنة كابيل(couple)يعني باسم الواد والبت بتاعته
الموبايل يبقى احدث نوع (بخ95 )ولا الدمعة الحارقة ولا ترباتاتو..وصاحبه
 قميصه مأيح وبنطلونه مخروم من ورا وجزمته بيطل منها الشراب يتفرج على الدنيا الحلوة
وده يقول للي جنبه والنبي رصيدي خلصان... ماتحولي 5 جنيه وانا ابقى ارن لك
وكمثال عملي على التفاهة في استخدامنا للتكنولوبيا الحديثة ..احكيلكم حكاية شفتها
كنا راكبين باص مسافر على الطريق السريع وركبت جنبي واحدة شكلها على قد حالها
شوية وسمعت موبايل بيرن اتاريها شايلة موبايل..ردت على التليفون ..ايوه ياصاليييييح(صالح يعني)بصوت عالي يخرم الودان تقولش صالح ده في برلين
ايوه ياصالييييييح انت نمت ؟...طب عامل ايه دلوقتي ...كويس؟؟طب الحمد لله خد الدوا ماتنساش ياصاااااالييييييح
وتقفل ...دقيقتين والموبايل يرن تااني ...ايوه ياصااااااالييييييييح..ليه كده؟
طب إيس درجة حرارتك وقولي ...تقفل شوية والتليفون يرن تاااااني وترد بصوت عاااااااااالي ايوه ياصااااالييييييح انت سامعني ...كام الحرارة ..طب كويس نام بقى وادفى كويس عشان تعرق ياصااااااااليييييح
 اللي في الباص حمدوا ربنا . صالح هاينام ونستريح كلنا اللي ينام شويه واللي يهدي اعصابه من صالح ومراته
وانا ااقول ياربي صالح ده ايه اللي طلعلنا في ورقة البخت ..لما صالح متنيل  كده سايباه وقرفانا احنا ليه بس
دقيقتين...ورن الموبايل تاااني ..ترد ايوه ياصااااليييح مانمتش؟؟؟طيب عندك مضاد حيوي في التلاجة كويس اوي اسمه اموكسي خد منه ياصااااليييح مع السلامة
كلنا عماليين ننفخ ودماغنا وجعتنا من الست دي وصالح بتاعها
شوية والموبايل رن تاااني  والناس تستغفرربنا وصابرين...ترد بصوت عاااااالي ..ايوه ياصاااااليييييييح عندك في التلاجة صنيية البطاطس اللي انا عاملها .سخن ياصالييييييييح وكل انت والعيال
خلاص احنا قربنا ياصاااليييييييح فاضل 10 دقايق واكون عندكم
قلنا خلاص بقى الحمد لله اديها رايحة له وهانستريح منهم هما الاتنين
مافيش دقيقة والموبايل رن تاني قام واحد شاب من اللي قاعدين خاطف منها التليفون وفتحه وقال: جرى ايه ياصاااالييييح انت .هوا انت مش عيان يأخي ماتخش تنام وتريحنا وبطل كلام في الموبايل بقى
كل اللي في الباص قعدوا يضحكوا والست قفلت الموبايل بعد ماتكسفت من نفسها
مش برضه بلدنا فيها حاجات اهم نتشغل بيها غير الموبايل والرنات
بالذمة ايه التفاهة اللي بقينا فيها دي
احنا شعبنا كان عنده حضارة في تفكيره وتصرفاته ايه اللي جرا ياهل ترى؟؟

مواصلتك إلى جهنم حلقة(2)

حلقة (2)

ثانيا:التاكسيات
اما انت بقى لو مش وش بهدلة يبقى هاتفكر في التاكسي
هاتنزل من بيتك بدري عن ميعاد مشوراك وتعمل حساب ساعة على الاقل زيادة.. بتاعة انتظار التاكسي
لانك هاتقف وهاتستنى اي تاكسي يعطف عليك عشان يقف لك  هوا اساسا مش هايبصلك
حتى لو فاضي لانه ممكن بيتفسح
ولو بص لك هايحتقرك ويبص لك  من فوق لتحت
والذوق اللي فيهم هايعملك بايده لا وعلى وشه ابتسامة الموناليزا
خلي بالك لازم شكلك يبقى وحلو ومستحمي عشان جايز يعجبه شكلك
وياريت تمسك في ايدك وردة حمرا ....ليه بقى؟؟؟
لانه لو وقف لك ..لا يمكن تحط رجلك في عتبة التاكسي الا لماتقوله رايح فين الاول فلو  ماعجبوش المكان اللي انت رايحه ..جايز لو تقدم له ورده يرضى يركبك
وتكون في منتهى الادب وانت بتتكلم معاه  يعني تقوله(لو سمحت ياباشا ممكن تسمعني)واياك تنرفزه
وفيه شرط كمان اوعى تاخد حد معاك لان اي سواق بياخد واحد بس عشان وهوا ماشي يركب زبون واتنين وتلاته على حجرك من باب توطيد الاواصر بين المواطنين وبعضهم
سواقين التاكسي في بلدنا بيعملوا اللي هما عاوزينه في الزبون
كل ده يهون بس الامان والسلامة فين بقى ؟؟ في بلدنا مش موجودة ابدا
في تاكسيات في مصر من سنه 1880 من ايام محمد  علي تلاقي التاكسي من دول ماشي وبيشمشم على قتيل او شكله كده رايح ياعلى المدافن ياعلى الاخرة
والله احنا بنشوف تاكسيات من معجزات القرن عبارة عن متحف متنقل من ايام المظ  وعبده الحامولي .. ازاي لسه بتمشي لحد دلوقتي.. ومين اللي بيدي لها ترخيص تمشي بيه بحالتها المعفنة دي
من نوادري مع التاكسيات..  واللي تبين حال الموصلات في بلدنا عامل ازاي
ـــ انا مرة كنت راكبة تاكسي وفي الطريق شفنا واحدة ست تخينة جداجدازي كده  بتشاور لنا وقف لها السواق من غير مايستأذني طبعا
ركبت .ولسه هاتفتح الباب لقيتها بتغمز بعنيها زي اشارة أو كلمة السر.اتاريها مخبية
وراها طابور عيال ماكانوش باينين من تخنها
ولقيتها بتقول : ياسناء بت ياوفااااء تعالي امال فين هنااااء ركبتوا كلكم؟ لسه ياماما   ياولااااااء تعالي هنا في مكان اهو هنا قدام
انا لقيت نفسي زي اللي راكب ميكروباص وكل اللي يدخل يستريح فوقه حتى كنت باحاول ابص على الطريق عشان اعرف انا وصلت عند بيتنا ولا لسه ماكنتش قادرة اشوف السكة كويس بسبب القبيلة اللي كانت قاعدة فوقي وكنت غطسانة وسطهم
ــــ وركبت مرة تاكسي  جايب كنب  الانتريه بتاع بيتهم وحاطه قدام وورا وسانده بعامود
حديد  كبير بعرض التاكسي من جوه مدقوق من الجنبين
ـــ وسواق تاني مركب  تلفزيون وبيتفرج عليه اكتر مابيتفرج على الطريق
ـــ وسواق تاني لابس حزام امان عشان المخالفات والعربية اساسا موديل 1900
قبل اختراع حزام الامان لكن  هوا بقى ناصح جايب قماشه سودا ومخيط حته  في الكرسي وحته في ضهر الكرسي
ـــ وسواق ركبت معاه واكتشفت انه اطرش مابيسمعش ههههههههههههه
يعني لايسمع زباين ولا كلاكسات ولا حاجة ابدا
وانا كمان ماعرفش لغة الاشارة بقيت اشاورله يمين شمال واخبط عليه عشان يقف
ـــ وتاكسيات كتير يبقى قافل الشباك في عز الحر تجي تفتح من الاوكرة ماتلاقيهاش
وتبوس رجله عشان يرضى يديك الاوكرة اللي حاططها في الدرج قال بيحافظ عليها
وبعد ماتفتح  الشباك  ترجعها تاني
ـــ وتاكسي ركبته ماكانش له إزاز  لاقدام ولا الشبابيك زي طفطف راس البر بالظبط
وبعد مانزلت وروحت لقيت  تراب وهباب الشوارع كله على وشي
اما اظرف واغرب موقف هوا اللي جاي ده
كنت مع اختي  في مشوار ومروحين البيت وقفنا تاكسي شكله عجب من جوه
تحس انه مالوش ماركة  باختصار هوا كان حلة كبيرة وجمعوا فيها كل انتيكات وتحف
العربيات القديمة
مشينا والتاكسي مشخشخ عالاخر وانا واختي عمالين نتمرجح يمين وشمال وننط لفوق وتحت زي اللي راكبين وابور طحين
صابرين وساكتين يقوم يجي للسواق مكالمة موبايل.. يرد عليه ويقول: لا والله رحت للميكانيكي ولسه ماصلحهاش  بعدين سكت شوية ورد وقال: لاااا مانا ماشي بيها
كده انهارده بس ..وربنا يستر بقى واليوم يعدي على خير اديني ماشي بالراحة
بصيت لاختي وهيا بصت لي .. واحنا فاتحين بقنا... هانموت ولا ايه ؟؟؟
فيه ايه ياترى ؟؟وقلبنا قعد يدق من الخوف... العربية هاتولع ولا ايه الله يخرب بيت اليوم اللي ركبنا  فيه معاك
شويه ولقيناه مزود السرعة على الاخر..وبعدين بيقولنا ياهوانم قبل مايجي المكان اللي هاتنزلوا فيه بعشر دقايق على الاقل قولولي
بصينا لبعض تاني انا واختي واحنا مش فاهمين حاجة
وصلنا لحد بيتنا قولناله بس هنا لو سمحت
ماوقفش برضه قلنا تاني بصوت عالي هنا لو سمحت ... برضه ماشي بالتاكسي بنقول لحضرتك هنا البيت فات وعدى
قالنا مش قايل لكم تقولولي قبلها بمده
اسف ..ماقدرش اعملكم حاجة الموضوع خرج من ايدي
العربيه مافيهاش فرامل هاتفضل ماشيه لحد ماتقف لوحدها
بصيت لاختي مافيهاش فراااااااااااامل ... يالهوييييييييييييييييييييي
وفضلنا ماشيين والتاكسي ماشي بسرعة من غير فرامل ..فين وفيييييين لما هديت السرعة شوية شوية  ووقف بعيد عن بيتنا يجي كيلو ونص ونزلنا انا واختي نضحك في الشارع بهستريا لنجاتنا من موت محقق
بالذمة دي احوال مواصلات تخص ارواح البني ادمين
يعني  لا اتوبيس نافع ولا تاكسي حتى الميكروباص بيشيل اكتر من طاقته 7 مرات
يبقى مليان على اخره وتلاقي التباع بيقول فاضي وعتبة عتبة عبتة
في الدول المتقدمة الواحد يوقف التاكسي ويركب من غير مايقوله مقدما رايح فين
ويوصله لحد بيته مش يقوله انزل هنا وكمل الباقي مشي
ولا يمكن يركب زبون مع زبون تاني
فين وزير النقل وايه اللخبطة دي وقلة النظام والسبهلله اللي هاتودينا في داهية
رحمتك يارب

مواصلتك إلي جهنم حلقة(1)

                       
ايه رايكم في حال المواصلات في بلدنا في ايامنا الكحلي  المنقطة باسود دي؟؟؟؟
عالعموم انا رايي ان  المشي اسرع واسهل واكرم وأمان
لو فكرت تنزل من بيتك عشان تروح مشوار  يبقى لازم تحسبها صح
هاتركب مواصلات يبقى نهار مش فايت ان شاء الله
اولا الاتوبيسات
لازم وانت نازل من البيت تكون واد سبور يعني لابس شورت مثلاوكوتشي من النوع الخفيف وتكون واخد تدريبات كويسة على العدو السريع وحمل الاثقال وكمان
لعبة الترابيز المشهورة في السيرك
طبعابتسالوا ليه؟؟هاقول لكم
العدو... عشان اول ماتلمح الاتوبيس جاي تبدا في الجري لانه طبعا السواق  مش هايقف لك(انت فاكر نفسك مين ياخي)
وإوعى ماتمسكش فيه كويس وهوا بيجري أحسن ممكن نهايتك تبقى زي فيلم الارض وتبقى زي محمود المليجى (الارض العطشااااااااانة نرويها بدمانااااااااا)ده انت اللي هاتغني وهوبيسحلك في الشارع...اوعى ايدك تسيبه حتى لو كنت بتتسحل
وماتخافش هاتوصل برضه مشوارك بس شكلك هايبقى متغير شويه
وعموما اذا لحقت تركب بعد ماتكون اجتازت كل الاختبارات اللازمة
يبقى فاضل حمل الاثقال ...حد يسالني ليه
ااقوله لانك جايزتضطر تشيل راكب على رجلك لفترة طويلة وشعبنا متعود يشيل بعضه في الازمات  بس في عز الكتمة  والحر  هاتشوف العجب وتشم بلاوي ربنا يعافينا

واحنا وماتخافش هاتوصل برضه بس شكلك هايبقى متغير شويتين
كل ده اذا كان حظك كويس ولقيت مكان داخل الاتوبيس لان في الغالب مافيش مكان تقف فيه مش تقعد ...فهاتلاقي زحمة جامدة على الباب وده طبعا لان الباب اكتر حته فيها طراوه وتبقى اول واحد ينزل لو الاتوبيس وقف مش لان الاتوبيس زحمة لاسامح الله أما لعبة الترابيز....حد يسالني ليه
 لانك بعد ماتشعلق في بابه لازم تمسك يايد واحده والايد التانيه تطلع الفلوس وتبقى شبه حته الغسيل اللي  منشورة بمشبك واحد والهوا بيطوحها يمين وشمال
وجايز جدا وانت مدلدل بره كده يجي اتوبيس تاني يزنقك فاتتفعص بينهم ..او تتشبك في اتوبيس تاني معدي وتبقى متفسخ بين الاتنين يامسكين
ودي خطة الدولة الجديدة للتخلص من 800 مواطن يوميا لمايسقط من الاتوبيس سهوا وهوا ماشي وده طبعا لاهمال المواطن في تدريباته على لعبه الترابيز......
بس حاذر جدا لان لاعب الترابيز تحته شبكه انما انت يامسكين ...اهئ اهئ اهئ وفي الحالة دي مش هاتقدر توصل للاسف
عموما لو نجيت من كل الاهوال دي يبقى فاضل اخر حاجة
طفاية حريق صغيرة في جيبك لان اول حته هاتولع اللي قدام ودي فايدة  انك تكون من اللي  متشعلقين في الباب ورا ...وطبعا السواق الغلبان ماعندوش طفاية
ويستحسن دايما ماتبقاش جوه الاتوبيس وقت الحريقة لانه الزحمة مش هاتخليك تعرف تخرج هاتعمل ذكي وتفكر في الشبابيك ريح نفسك ...مابتفتحش أو مفتوحة نص نص  يعني ماتكفيش غير نصك الفوقاني او التحتاني اللي يخرج بره الحريقة..وانت اختار.
ماتخافش هاتوصل مشوارك برضه بس شكلك هايبقى متغير 3شويات
 نصك هايبقى على بني محروق شوية والنص التاني سليم ان شاء الله
وبعد مابقيت نص سوا...وتجي محطتك اخيرا في احتمال كبير انك ماتقدرش
تنزل فيها لان فيه ركاب تانين بيبقى ليهم راي تاني ودول بقى اللي في المحطة بيستنوا
الاتوبيس اول مايوصل يطلعوا يركبوا فورا من غير مايدولك فرصةتنزل محطتك اللي انت اساسا شفت الاهوال عشان توصلها وتلاقي نفسك بقدرة قادر لسه برضه جوه الاتوبيس بتبدا رحلتك من  تاااااااااااااااني بعد مافشلت في نزول محطتك لاهمالك واللكاعة بتاعتك
ماحدش اخد باله وهوا متشعلق مرة ان فيه عربيات نص نقل معديه جنبك بتنقل ركاب
 من نوع تاني
....(بهاااااااايم)(جمايس على معيزوخلافه)واقفين محترمين بهوات كل واحد ليه مكانه .. وكمان جايبين لهم اكل ...مافيش بهيم منهم متشعلق ولا طاير ولا شايل على حجره بهيم تاني
طبعا وانت متشعبط تلاقيك بتبصلهم بعين الحسد ....اه يامكار
تستاهل حد قالك اطلع من بيتك .. مش عارف {ان من خرج من داره اتقل مقداره}
مافيش  حاجة في بلدنا تحترم الناس ولاتحسسهم بآدميتم الناس في بلدنا تعبانة اوي بجد وابسط الحقوق الادميه مش موجودة
يامسئولين ارحموا الشعب ده كفاية مهانة بقى
انتظروا الحلقة (2)... من مواصلتك الي جهنم

الرجولة والستوتة

 الرجولة والسُتوتة
تفتكروا ياجماعة ان ايامنا الكحلي المقلمة باسود ..اليومين دول في حاجة إسمها رجولة ؟
للاسف لا .... بس ماتزعلوش مني هيا دي الحقيقة
لو انت راجل ياللي بتقرا مدونة كركر ...عندي ليك سؤال
لو في مواصلة عامة(اكيد لو ماعندكش عربية زي بقية المصريين المدعوكيين في  الفقر)
لكن بقى لو عندك عربية مش هاعتقك ليك سؤال برضه
نرجع تاني وانت في الباص مليان وانت قاعد متجصطن وواحدة ست واقفة جنبك
هاتسيب مكانك ولا لأ؟؟
لو لأ يبقى ..انت سوري يعني سوري ماعندكش دم... واطلع من مدونتي حالا
ده طبعا اذا ماكانش عندك عذر زي الدوالي او الطحال او عرق النسا
 لوانت من النوع التاني ......ابو عربية
لو شايف واحدة ست مع جوزها في الشارع حامل وتعبانة على وش ولادة وإنت شايف مافيش
تاكسي يوصلهم ...هاتقف لهم؟؟؟
لو لأ يبقى إخص بجد... واطلع برضه من مدونتي حالا
احنا شعبنا يستاهل الهم والنكد اللي هوا فيه لاننا مابقاش فينا رجولة بجد
والرجولة بتبدا من ابسط الاشياء اللي اتكلمنا فيها
لكن اللي انا باشوفه مايطمنش
تلاقي الواد من دول زي الفلق والبغل الاسترالي ...شاب في عز هبابه قاعد
متكبب على الكرسي والوليه ياعيني كبيرة في السن ... جنبه واقفه وشايلة
 اكياس على قلبها ولسانها مدلدل لبره من كتر التعب وهوا بيضحك ويهرأ مع اللي جنبه
بصراحة بيبقى هاين عليا اهفه قلم على خلقته وانتف له السكسوكة اللي شبه التفه
اللي بيعملوها دلوقتي في الدقن واشده من السلسة اللي في رقبته اشنقه بيها
وامسك اللبانة اللي في بقه اخربشه بيها لحد مايخر الدم...
واقوله ماتقوم يابأف قامت قيامتك واتنصب ميزانك
بجد والله حاجة تزعل فين الرجالة راحوا فين
الابن مابيسالش على امه ... وماشي ورا مراته وبس
وجايز يرمي امه في دار للمسنين..ويقولها خليك هنا  يامامتي لحد ماأصلح السيفون
ويتهرب من اخته لو محتاجة خدمة او مساعدة او مشوار...
ولا يسال  على مرات اخوه واولاده لو كان اخوه مثلا مسافر ويشوف محتاجين ايه
الست بتبقى واقفة في طابور عيش او بنك او مصلحة حكومية وسط رجالة كتير
مافيش واحد يقولها اتفضلي انتي الاول .كل واحد بيقول يلا نفسي  ...والباقي يولع
طب والستوتة... الستوتة بقى ده معنى كبير يشمل الام والزوجة والبنت
بس فيه ضعف وحنان.اعتقد ان صعب يتاثر بمرور الزمن لانه غريزه قويه من عند ربنا
عموما الميزان مختل ...رجالة كتير في دنيتنا لا يستحقوا في خانة الجنس في البطاقة
الشخصيةالا لقب ذكر ونحط بين قوسين(معلقة صغيرة ذكورة على لترين ستوتة)
يوم ماالرجولة ترجع تاني والراجل يبقى راجل بجد حالنا هايتغير 
 الجدعنة بجد... مش موجودة عشان كده احنا نستاهل نتسك على قفانا
من الرايح واللي جاي أكيد فيه خلل في بيوتنا في تربية عيالنا اللي في الاخر
يكبروا ويبقوا اشباه رجال
تلاقي الواد شحط طويل عريض ولابسلي بنطلون قال ايه (لو ويست)
(LOW WAIST)وجيوبه منفضه.. طويييييييييل زي النخلة والبنطلون وسطة
واقع على الحروكروك ....لو بس وطى شوية يجيب حاجة من على الارض ...
هاتشوف العجب ومناظر ماتسرش لا عدو ولا حبيب...ده غير الروائح الكريهةالمنبعثة
 من هذه المناطق ياخويا استر نفسك يعني هاتورينا حاجة عدلة أوي
عاملي فيها الفتى الجذاب ابراهيم سعيد
الشباب كل همه دلوقتي حاجتين البنطلون  اللي هايقع منه في الشارع وهوا ماشي سانده
بايده ....والحاجة التانيه هيا الجل ...الجل ده مهم جدا عشان تعمل نيو شوك
تليثه الاول بالطين وبعدين توقفه بالنشا لفوق شبه بتاع سفن اب (فيدو ديدو)
وبعد كده تغير لون الشوشه من قدام فوحلؤي او الهافان الجربان...ويفتح صدره
عشان عنده كم شعره  في صدره تاعبينه وهما كلهم 3منمرهم 1و2و3 قال يعني
 عامل شوية سكس بتاع احمد رمزي حتى لوكان هوا شبه توفيق الدقن
معقول دي كل اهتمامات الناس دي... اد كده بقينا تافهين
واخيرا مصائر الشعوب لا تتغير الا بالرجال ...وليس الذكور

ميلودي تجيب لك الشلل

ماحدش خد باله ياشعب إن قناه ميلودي دي مش مظبوطة
بجد والله ليها حركات نص كم (كم ايه ده مافيش كم خالص)
إعلاناتها مستفزة جدا جدا ...تبقى في امان الله بتشوف الفاصل الغبي اوي بتاعهم ده ....
ومستحمل وصابر ...بتاع الواد الصغير 12 سنه ده التخين اوي هوا...
 واخوه وامهم  بتضرب الواد أخوه  بغباء برضه  
وهو بيغني فرحان في اخوه اللي قتلته امه....
 لسه هاتفوق وتقول ايه القرف ده تلاقي فجاه
اعلانات جوه نفس الاعلان الغبي عن ملابس داخلية ساخنة جدا
ايه اللي بيحصل ده ؟؟؟
شويه بعد  ماتشم نفسك وتقول استغفر الله العظيم...
يطلعلك الفيل الغبي{توتو عضلات} بتاعهم رمز القوة ولابس لبس (برميل مان)
وهو والله شبه الطشط المخروم ولحمه عمال يلعب زي الجيلي الاصفرفي التلاجة ...
وكل اللي يشوفه يترعب منه رعب ويجري ينقذ نفسه من الوحش الهائج والثور الساذج
مع ان الحل بسيط جدا كل قوي مهما كانت قوته عنده نقطة ضعف
وبرميل مان ده حله ..دبوس صغير في كرشه بس تبعد بسرعة عشان قوة الرياح
وضرب وعنف وكلام غبي ومستفز(ميلودي تجيب  لك الشلل)
فجاه تطلعلك فاتنة القللي والدويقه الاولى بوووووووووبيييييييييييييييييي
اللي هوا (دلع كلب يعني)
بعد مانفخت البالونتين اللي في صدرها عند العجلاتي ...
المخرج قالها انفخي على قد ماتقدري يابوبي ولازم يبانوا كويس وهما طايرين في الهوا
قالتله :ليه يأستاذ ؟؟؟ قالها: طبعا يابوبي لان البالونة شغلتها تطير في الهوا
بالذمة الناس مابقاش عندها دم ايه اللي بيحصل ده ايه؟؟
بجد قناه مريبة انا شكيت فيها بالحاسة الساسة اللي عندي
وفعلا تثبت الرؤيا
واقرا خبر بيقول ميلودي بتمويل يهودي إسرائيلي
قلت فعلا بامارة ياحلوين لو فاكرين موضوع مقتل اشرف مروان
{(الله اعلم)اللي ثارت ضجة حواليه هوا معنا ولا معاهم}
لما انقتل.... القناه قفلت يومين وتعازي وقران كريم.. وقعدنا كلنا نوأوأ
الله يرحمه ويحسن اليه... قلت عيلته من حقها تحزن
بعد ماليومين خلصوا وقروا القران على روح الراجل
استفتحوا بفيلم التجربة الدانماركية للمتصابي عادل امام..مع الصاروخ
المنفوخ  السخسوخ... نيكول سابا
الراجل ياولاد الذين لسه دمه مابردش ولسه مالموش بقيت جتته من عالارض
من تحت البلكونة ...وإنتوا ماصدقتوا بعد ماالشيخ خلص القران من هنا
رحتوا فاتحين الكباريه من هنا... ماعليش  ماعليش   {الحزن في القلب مش في القلع}
ولاحظ اعلاناتهم عن الافلام كلها مشاهد ساخنة عارية من القماش
الصوف او الدمور ولا الكستور أو أي نوع ومسموح فقط بالنايلون لتشجيع الصناعات الحديثة
مع مراعاة لبسه لفتره وجيزه ثم يخلع عشان ريحة العرق... ده غير الفواصل
اللي تخليك ترجع اللي في بطنك طبعا الستات بس اللي هاترجع
انما الرجالة نفسها هاتتفتح للدنيا على ايد بوووبي وامثالها...
بس بجد اليهود عارفين العرب عاوزين ايه وبيفكروا ازاي فيخشوا من الحتت دي
عشان النايم يفضل نايم...والغفلان يشخر كمان وكمان
حتة ثقافة بقى نتكلم جد شوية...
لما الاتحاد السوفيتي انهار ...الإسرائيلين جروا بسرعة يجيبوا العلماء الروس
بابخس الرواتب يشتغلوا في اسرائيل{فضاء وروسيا متقدمة فيها جدا ونووي وغيره}
اما العرب جروا برضة بسرعة في الاوكازيون يلحقوا يجيبوا الراقصات الروسيات
ههههههههههه
هيا البلد ناقصة انحطاط ياعالم
واخيرا ميلودي تتسبب في  الشلل وتتحدى الهبل وتغرقك في البلل
والريموت في ايدكم وكل واحد ينام على الجنب اللي يريحه

يلايابابا هاتروح عالسجن

سمعتوا ياشعب ان في قانون هاينزل يدي الحق للولد لما ابوه يضربه او يسئ
معاملته انه يدخله السجن بعد مايقدم فيه بلاغ في القسم
يعني كل اب من الباهباهات لو بيقرا كلامي ده يلم نفسه لو عنده عيل...
أحسن مش هايحصله طيب
ولو بقى لسه متجوز جديد يستحسن يستخدم طريقة انظر حولك لتسليت النحل
قصدي تحديد النسل خالص.... يعني ياينتحر يايقتل مراته....
طبعا كل واحد متجوز هايفضل الحل التاني لانه اسهله  وفيه فرج من كل ضيق
واللي الفاس وقعت عنده في الراس خلاص وخلف عيل ولا اتنين يحاول انه
يرستأ أموره معاهم من دلوقتي اذا كان  صغير يدلعه باللعب والحلويات وكنتاكي والذي منه
وإذا كان كبير عليك بقى بحته حشيش او بانجو او مٌذة حلوه
ولو مش متجوز يبقى من دلوقتي  تدور على عروسة مش ناوية تجيب عيال
ايوه يابني اعمل حساب للزمن لان {اللي يحسب الحسابات في الهنا يبات}
وعلى فكرة الضرب انواع يعني القانون يعاقبك لو الضرب سبب جرح أو علم علامة
في الجسم او ساب اثر خفيف فلو مضطر مضطر تضرب ... يبقى بكيس المخدة
والمخده مش جواه طبعا  أو ايشارب مراتك ...خليك ذكي واوعاك تسيب ولا علامة حمرا
ولا حتى بامبي ..لان العواقب وخيمة ...إهئ إهئ 
هاتبقى نايم في بيتك في امان الله بتشخر زي الملايكة تلاقي الباب بيتهد على نافوخك
والبيه الظابط يقولك يلا يانور عين ابنك على القسم  احنا لقينا في الواد علامة بامبي.....
 ياعاق ياقليل الادب  ......اذا ماكانش ابنك عرف يربيك يبقى نربيك احنا
....عموما اذا ماقدرتش تكسب ابنك في صفك وتماين امورك معاه
خلي خيط رفيع  بينك وبينه ....جايز جايز يقوم لك محامي
او يبقى يشقر عليك في السجن وياخد لك عيش وزرنيخ..... قصدي وحلاوة
ونصيحة بقى من اخت ليكم....كل اب قبل ماينام لازم يروح لابنه ويساله
 بعد مايبوس ايده طبعا....راضي عليا يابني... واياك  واياك تمشي قبل مايرضى عليك
بالذمة ياشعبنا الحرية عندنا في بلادنا مقطعة بعضها اوي
وحقوق الانسان كاملة ومكملة مش فاضل ياعينى غيرالاب {ابن الذين ده} اللي ضرب
ابنه لما دخل البيت وفي ايده ازازة بيره
احنا عمالين ننزل لتحت  لتحت وبعدين بقينا في أسفل  سافلين ومش لاقين تحت ولا اسفل
اكتر من كده...فبنعمل ايه ؟؟ عمالين نحفر لتحت  بكل همه عشان نتدهور كمان وكمان
بلا خيبة جرا خيبة شادة خيبة لازقة برضه في خيبة
انتظر ردكم على اول مدونات كركر ... واللي ضحك أو ابتسم  لازم يعلق

مدونة كركر

هذه هي مدونتي الجديدة
واحب ان اعرفكم بنفسي فانا crazy mother
صاحبة مدونة( أم وتلات عيال)     وبما اني ملولة جدا واحب التجديد دائما
وان ادون افكار جديدة فإني سأستمر بمدونة أم وتلات عيال
وابدا مدونتي الجديدة وهي (كركر)    وهي افكار عامة وخواطر
تخص حياتنا وايامنا متنوعة سياسية إقتصادية دينية  فنية وأتمنى أن تنال
إعجابكم وسأحرص على ان تحمل روح الدعابة والفكاهة التي عرفتونها عني
والتي جذبتكم لمدونتي الأولي 
إنتظروا أول مقال في مدونتي الجديدة وأتمنى منكم زيارتها وإبداء آرائكم التي اعتز بها دائما